Read Sumi Naga YEKIKITHI AKINIU 17 Bible Online

YEKIKITHI AKINIU 17 - Sumi Naga bible

YEKIKITHI AKINIU 17

¹Jehosafat no papu Asa thelilo akukau shiluve eno Israilmi shou pa kuka shikumto kitheluve.

²Pano Juda lo putukhasu puakeu phughi lo ngo Juda ghakhulo eno Efraim ghakhu lo Asa no aphughi khipaqo leluve keno tipaqolo ghushimi ngowo pe.

³AMPEU no Jehosafat kumghatsu kughengu pano papu kuxu atughulo kishi shiche keno tipau papeke eno Baal mllamoe.

⁴Pano papuno mlla chekeu Lhou qeche, Alhou zah kutsu gholuke eno Israilmi kukamino shiche keu laghi papemoe.

⁵AMPEU no Jehosafat pelo Juda kukaqha shou akumto shi peithalu kepu shipe eno timi kumtsuno pa lau tughotili sughiche ike paye kinikulu shiluve eno shishe akiqheu lono pa gihu kepu shiluve.

⁶Paye AMPEU qeni keulo akijivilo ke eno Juda lo asu-atu kumlla-a ngo Ashera lhouliu jukimihi kumtsu kutsaleve tsuke.

⁷Pano kakeu mpe akuthuu lo Juda phughiqo lo kutsupiye penike pano sakiphemi hipaqo puwu: Benhail, Obadia, Zekharia, Nethanel eno Mikaya.

⁸Levimi toku eno achinemi kinino panongu gholo kumtsa wue. Levimi ye hipaqo ke: Shemaya, Nethania, Zebadia, Asahel, Shemiramot, Jehonathan, Adonija, Tobija eno Tobadonija eno achinemi pama jeno Elishama ngo Jehoram.

⁹Panonguno AMPEU wu Ayehza kaku pesu Juda lo taun kumtsulo wu puzu tipau pesu timiqo shikapiye ke.

¹⁰Acheaxulo akukaqha akeqo kumtsu Akukau Jehosafat sasu aghu shimsa penikeu shi AMPEU no shivetsu.

¹¹Filistiyami khamino Jehosafat lau tsandiyi kutomo eno tughotili kutau suwotsu eno Arabmi khamino pa lau bheri 7,700 eno ane 7,700 suwo tsuke.

¹²Tighenguno Jehosafat ye akumto shi alau alau thuwuluve. Juda qhalo pano aghukhuqoki ngo aphughiqo shilu

¹³eno tipaqo lo kuchukini kutomo suwo pekutsupe qhiluke. Jerusalem lo pano kijemi ajekipimi pututa limi kiqi lono sawo qhilu.

¹⁴Juda lagha lono ighi keu Adna pelo aghushimi shou zahtsuu shilupe eno pa qholo ghushimi 3,00,000 ake.

¹⁵Tipau shelono Jehohanan, pa qholo ghushimi 2,80,000 ake,

¹⁶eno akuthuuno Zikhri nu Amasia, pa gholo ghushimi 200,000 ake. (Amasia ye pa likhi pa kutoshino AMPEU qeni keu shi xathalu ke.)

¹⁷Benjamin lagha lono ghushimi shou zahtsu shikeu ye Eliada, ghushimi ajekipimi lakhi, pano azuto ngo asuzu pekemi timi 2,00,000 shou zahtsuu shike.

¹⁸Pa shelo zahtsuu akiniu shi achekeu ye Jehozabad no timi 1,80,000 no aghushi kepu kutokupui pesu pa gholo ake.

¹⁹Timi hipaqono Jerusalem lo akukau qecheke eno tinguno alau ghi Juda lo putukha puakeu phughi kutauqolo pano ghushimi qhiwo ke.