Read Sumi Naga YEKIKITHI AKINIU 18 Bible Online

YEKIKITHI AKINIU 18 - Sumi Naga bible

YEKIKITHI AKINIU 18

¹Juda kukau Jehosafat no kinikulu shive eno ajekipi shiluve keulo pano pa kibolomi lakhi pelo Israil lo Akukau Ahab kibolomi sasu kulakupu shipeke.

²Ampe kini kuthu tikhau Jehosafat no Ahab putsa wunike Samaria phughilo iqho. Jehosafat ngo pa gholo chekemiqo gihu ghi ikhilunike Ahab no bheri ngo amshi kumzapu heqhi puzu aghulhu lakhi shi. Pano Jehosafat zuiza puzu Gilead lo Ramot phughi lewuni keulo pa gholo sukuqha lo pi pukaputsa ke.

³Pano ishi iniju, “Ramot lewuni ke noye igholo wunima?” Jehosafat no khochile pi, “Kugho kughomu niye kutope anie eno iwu ghushimi ghi kutope anie. Ninguye ogholo sukuqhanike.”

⁴Pano highi pi, “Ikemu atughushi ninguno AMPEU launo kighini kilejunie.”

⁵Tighenguno Ahab no tunkupumi pano 400 kutolo kusaghipe eno panoqo vilo ishi iniju, “Niye wu puzu Ramot lewu kepu kemo kya?” Panoqono khochile pi, “Tipau lewulo, Alhou no tokulu otsu nanike.”

⁶Ikemu Jehosafat no iniju, “Tungkupumi kutami hilau kuha kesha? Pa vechewo ninguno AMPEU launo kighini kilejuni ke?”

⁷Ahab no pi, “Kutami lakhi anike, Imla nu Mikaya. Ikemu niye pa junishimo ke kughengu paye ighenguno khilemu akivipu kiumu tungpu tsa pitsu chemoe; paye pulhapujulo alomo keu likhi pitsu chenike.” Jehosafat no pi, “Noye tishi pikepu kumoe!”

⁸Tighenguno Ahab no kughakilo ampimi lakhi kuno pa vilo mtazu Mikaya saghilo pi pive.

⁹Akukau pamaye kukaphi pepu puzu Samaria khagho nguno khalau aniqa lakhilo kuka lakhu lo iqa ake eno tungkupmi kumtsu pama gizu lono tungpu tsa pi akha ke.

¹⁰Panoqo gholo milakhi, Cheana nu Zedekia no ayino akibo mla pesu ighieno Ahab vilo pike, “AMPEU no piakeu ye hike, ‘Hipaqo pesu nono Siriyami sasu aghu shi nani eno tipaqo qhoi leluve nani.’ ”

¹¹Tungkupmi kutami kumtsuno tipatho pike. Panonguno pi, “Ramot kudau cheulo eno noye tolu nanike. AMPEU no tokulu otsu nanike.”

¹²Tishi akelo kughakilo ampimi khuuno Mikaya saluniye wukeno tipauno pa vilo pi, “Tungkupmi kutami kumtsuno akukau ghenguno tokulupu tsa pi tsuke noghi tipa thou shi pitsukeu pavi nanike.”

¹³Ikemu Mikaya no khochile pi, “AMPEU ye xuani keke iLhou no ivilo kiu pilo pini keno tipau pi nani ke!”

¹⁴Pano Akukau Ahab gizulo ighi kelo akukau no pa vilo ishi iniju, “Mikaya, Akukau Jehosafat ngo ikujo ye wupuzu Ramot lewu kepu kemo kya?” Mikaya no khochile pi, “Lewulo! Imapi, noye tolu nani ke. AMPEU no tokulu otsu nani ke.”

¹⁵Ikemu Ahab no inijukide, “Kughou nono AMPEU jelono iputsani keno kuchou tsa pitsulo! Niye ghuthu khije jehi ovilo tipau pilo pini kya?”

¹⁶Mikaya no khochile pi, “Israilmi ghushimiqo ye bheriqono akheu kuhave ketoi naghutoqo lo apanagha chekeu ino ithulu anie. AMPEU no pike, ‘Timi hipaqoye sakipheu kuhae; panoqoye iqunei akilo idewove pelo.’ ”

¹⁷Ahab no Jehosafat vilo pi, “Paye ighenguno akivipu kiumu tungpu tsa pitsumo nani kepi ino ovilo piveake kumo kesha; pulhapuju alhoksa likhi pitsu cheni ke!”

¹⁸Mikaya no ishi pikibe: “Itehiye AMPEU no kiu pi ani keno inilo! AMPEU ye kungugha lo pa kuka lakhulo iqa akeu ino ithulu ke eno pawu kungumi kumtsu pa phivilo puthughoe.

¹⁹AMPEU no ishi iniju, ‘Khuuno Ahab pishiqhi puzu paye Ramot lo iqhono pithive peniye ani kya?’ Kungumi khamino hiu ipi aye kutamino kutau pi ake,

²⁰ikelo aghahwu lakhi AMPEU kupunu kudau cheighi eno pi, ‘Ino pa pishiqhini ke.’ AMPEU no pa vilo inijukide, ‘Kiutoi shini kya?’

²¹Aghahwu no khochile pi, ‘Ino wu puzu Ahab wu tungkupmi kumtsu pelo mikive peni.’ AMPEU no pi ‘Wulo eno pa pishiqhi lo. Noye tokulupu shi nani ke.’ ”

²²Mikaya no hipau pesu pikishekhave: “Hitoi shipe puanike. AMPEU no owu tungkupumi hipaqo pelo ovilo miki keu tsa pipeke. Ikemu pa ampino noye kutsakungo keu hipau sholu penikeu shi kuto puavetsue!”

²³Tileno tungkupu Zedekia no Mikaya lau ikughi puzu pa gilo ghatsu no ishi iniju, “Kughou kishino AMPEU ghunguno iqhiveno oputsa ayeakya?”

²⁴Mikaya no khochile pi, “Nono itshuniye achebo alou ilo kelono tipau phulu nani ke.”

²⁵Tileno Akukau Ahab no pawu kijemi lakhi vilo ishi ahza tsu, “Mikaya tshuluve lo eno pa sasu aphughi peitha kicheu Amun ngo kukapuu Joas lau wulo.

²⁶Pama vilo pa kugha pesu akughukilo suno ino ighimo ke kutolo asho ngo azu likhi tsu aghilo pilo.”

²⁷Mikaya no ighamuku pi, “Nono akivishi ide ighi aye AMPEU ye ivechewo pipuamoke!” Pano highi pitsu, “Nongu kumtsu ino kiu pivea keno tsaqui chilulo!”

²⁸Tithiu Israil lo Akukau Ahab ngo Juda lo Akukau Jehosafat pama ye Gilead lo Ramot phughi lenike wuve.

²⁹Ahab no Jehosafat vilo pi, “Ningu aghushiwu kelo niye iju kimchimla kepu shive nike ikemu noye owu kukaphi pepulo.” Ikehu Israil kukauye paju kimchimla kepu shiveno aghulo wuke.

³⁰Siriya kukauno pawu khurkulu ghushimi sakicheu vilo Israil kukau likhi thono kutami lekevilo pi ahza tsuve.

³¹Tighenguno kughou panonguno Akukau Jehosafat ithulu keno panongu kumtsuno pano Israil kukau kepi kumsuveno panonguno pa lenike tsughu idewo haighi. Ikemu Jehosafat no ighamuku eno AMPEU Alhou no pa xapheluveno pa leni ke hacheku pa launo kighide puwovetsu.

³²Khurkulu ghushimi sakicheu no paye Israil kukau kumove aghi keu ithuluve kehu pa lenike hawu move.

³³Siriyami ghushimi lakhino kishi nialapi apiji lakhi kapuwuju kelono tipauno Ahab ghunanu kikime dolo vesuvetsu. Pano khurkulu sakicheu vilo, “Niye izavae, xaidevelo eno aghushi lono ijo ipevelo!”

³⁴Muqhumza su aghu shi akelo Ahab ye pawu khurkulu mutupe puthugho ghi Siriyami ju ake. Tsukinhe ilove kelo paye thive.