Read Sumi Naga YEKIKITHI AKINIU 2 Bible Online

YEKIKITHI AKINIU 2 - Sumi Naga bible

YEKIKITHI AKINIU 2

¹Akukau Solomon no AMPEU kumllaki lakhi eno pa kukaki lakhi shinike xathaluve.

²Pano asuyezu pekishenike timi 70,000 qhi eno atu chhitha nikemi timi 80,000 qhike. Tipaqo kumla tucholuvenike timi 3,600 ake.

³Solomon no Tur lo akukau Hiram lau asutsa ishi puwu: “Puzuu nono akukau ipu David lau alhi shipuwuno pa kukaki shilu penike kedarsu tsupuwu cheketoi nighi tsulo.

⁴Julo ino AMPEU iLhou je kipipu ghenguno aki lakhi shinike kuto ani. Tipau aye akimthe khipa alo iwu timi eno ino axokutsunguno pitikumlla ni eno tamono akimthe ghoqo peighino ina kijili Sabat pinye tsala qolo aqhithe pinyeqolo eno akimthe tsalaqolo akimthe chuqu pe pa mllaniyeke. Pano Israilmi vilo pulhapuju ti shichelo pivae.

⁵Ino achineki kije lakhi shinike kumsu anie, kughengu niLhou ye kutami lhou nguno akijeu.

⁶Ikemu khuno Alhou ghenguno aki shilunia, kughengu kungugha eno akiqheu kungugha ghi pa ghenguno tulalo. Niye khuu keno Pa ghenguno aki shilunia, piti kumlla kepua likhi kumoaye.

⁷Itehi shuna tsandi eno ayijeliqo pe yethano mlanikemi shitsami itsulo eno aphi aju ajeli mlakulumi itsulo. Pa pelo khaghi ipu David no Juda ngo Jerusalem lo atshamugha shikithimiqo kishelukeu muqo gholo mla peni ke.

⁸Owu asu kumlamiye kiu toi shitsa keno ino ithi anie, tighenguno asu jeli kedarsu eno junipersuqo hu Libanon lono itsu puwulo. Ino iwu timiqo pelo owu timiqo kuphunike puwuni tiye

⁹asu kutomo mlaphepe nike, kughengu ino achineki hi shiniye akeuye kije eno jukivipu shiniye anike.

¹⁰Oqemi asu kulalumi khunoqono asu mla cheni keno panoqo ghenguno achuqupu ye ino ashothi kilogram 20,00,000 eno barlithi kilogrm 20,00,000 eno aji liter 4,00,000 eno oliv teli liter 4,00,000 tsupuwunike.”

¹¹Akukau Hiram no yekili lakhi Solomon khochile. Pano ishi yepesu tsu, “Kughengu AMPEU no paw timiqo kimiye ke ghenguno pano opelo panongu kukau shipeke.

¹²Israilmi Lhou AMPEU shelo, kungugha eno ayeghi lhokutsuu! Pano alokutsu nu lakhi pe akukau David tsue, tsukhutsuvai eno shitsami khuu itehi AMPEU ghenguno achineki lakhi eno pa ghenguno akukaki lakhi shinike kughu ani keno.

¹³Ino shitsa eno tsukhui kemi ampimi shikulumi lakhi Huram pesu olau puwutsu anike.

¹⁴Pa zaye Dan lagha lono ikighimi eno pa puye Tur ghakhumi ke. Paye shunayi, tsandiyiqo pe eno asuatu jeli pe iqikulumike. Paye aphi jeli ghi mlakulumike. Paye atu pe ajeli yekutha kumla shicheni eno shilo pike toi shilu cheni. Pa pelo owu timiqo gholo eno opu David no kishekulumi gholo mlapelo.

¹⁵Tishi aye nono pivekeu toi ashothi, barli, aji eno oliv teliqo itsu puwulo.

¹⁶Nino Libanon naghutolo kedarsu nono avehupu shike toi buqhini eno tsugha kumqono Jopa kutolo azu lono yipe piqini eno tileno nono Jerusalem lo puwulu nani.”

¹⁷Akukau Solomon no papu David no pawu timi kihike toi Israilmi yeghilo inaghami xu akemi thaqhu kihi. Tilehi inaghami: 153,600 kihilu.

¹⁸Tipadolo 70,000 no kisuyezu pekishe penike eno 80,000 no naghutolo atu yetha penike picheve eno 3,600 no sakiphemi shi akumla hekutsu kiyi penike kisheluve.