Read Sumi Naga YEKIKITHI AKINIU 21 Bible Online

YEKIKITHI AKINIU 21 - Sumi Naga bible

YEKIKITHI AKINIU 21

¹Jehosafat ye thive eno David phughilo kukami kumoki lo qhove eno panu Joram no pa shelo akukau shi pa thisuluve.

²Juda Kukau Jehosafat nu Jehoram ye athikuzumi tsugho ake: Azaria, Jehiel, Zekharia, Azariahu, Mikhael eno Shefatia.

³Panoqo papuno shuna ngo tsandiyi eno amekusho mheghipu jeli kutau kutomo panoqo tsuke eno panoqo milakhi khi pesu Juda lo putukhasu puakeu phughi lakhi khi shou ampiu shipe. Ikemu Jehoram no akichiu ke ghenguno Jehosafat no pa pelo pa thisuvepe.

⁴Jehoram no akuka qha mutotoi peithaluve kemtsa pa thikuzumi kumtsu ghiqhive eno Israilmi kijemi khami ghi pithivetsu.

⁵Jehoram no ampe shighi kini shi ake lono akukau shiluve eno paye Jerusalem lo ampe tache ayeh pelu.

⁶Pano Akukau Ahab ngo Israil lo kukami kutamiqono lhoksa kugha kumla shipiye keu papewuve, kughengu paye Ahab nga gholo lakhi sasu kulakupu shike. Pano AMPEU shou axine shike,

⁷ikemu AMPEU ye David kuka mheghi kutsave tsunishimo ke, tiye pano David sasu puloshoqhi lakhi shiveke eno piqhi puakeu no pa laghano pulhapuju ayeh pepeni keu shike.

⁸Jehoram no ka ake ghuloki lono Edom no hebide ipeghive eno pano ghoshi xukeu kukaqha shive.

⁹Ike Jehoram ngo pawu kijemi no khurkulu sasu Edom lewuke. Tilau Edom wu ghushimi no panoqo suhuluve ikemu panongu ye putho lono akushukulu vexusu pokawuluve.

¹⁰Tinguno tipathiu ye Edom ye Juda launo pano ghoshi acheuve. Tipa ghulokilo, Libna phughi ghi hebide ipeghive, tiye kutau ghenguno kumono Jehoram no pa puasu Lhou AMPEU qhive ke.

¹¹Pano Juda lo ato yeghi ghi asu-atu kumlla-a shipe qhi eno Juda ngo Jerusalem lo kuamiqo sasu AMPEU pheveno axinelo sailove.

¹²Elija tungkupu no Jehoram lau yekili lakhi hitoi tsu puwu: “AMPEU osu David Lhou no oleve anie kughengu nono opu Akukau Jehosafat no xupiye keu pape moke momu osu Akukau Asa papemo ke.

¹³Tishinike zuqhulo noye Israil lo kukami kuxu ghola papewuve ke eno Ahab ngo pa thisulu kemiqo no Israil sasu amikucho kumolo sailove keshi Juda ngo Jerusalem lo akemiqo Alhou lau amikucho kumolo sailove ke. Nono othikuzumi ghi heqhi pithi veke, panongu ye onguno akivimiqo ke.

¹⁴Tishi kehu AMPEU no akijiksa pushi nowu timi, onuliqo eno onipuqo ghimeqhi nani eno nonguno pighi aghi keu kumtsu kutsaleve tsu nani.

¹⁵No ampi ghi akighilo kusu su nani eno tiye tsala kipetsu alhoksa shikitheve nani.”

¹⁶Filistiyami ngo Arabmi khamiye Sudanmi no azughi mukulo ngoche keu kupunulo kughuna ache. AMPEU no panoqo hakite puzu Jehoram sasu aghu shi peni keu shi.

¹⁷Panonguno Juda le ighi, akukaki xule puwuve eno akukau nipuqo ngo anuliqo kumtsu akughumi shi sawuve, panu anipau Ahazia likhi ghupuaghi tsuke.

¹⁸Hipaqo kumtsu tikhauno AMPEU no akukau shou akighilo kusu lakhi pukutsu.

¹⁹Ampe kini kutolo tipauye asheshino alhoksa shi kutuuve eno ashekha lo akukau ye amloksa shi thive. Pawu timiqo ye pa puasu thive kelo amloksa michi ami kuiqu chekeu pa ghenguno kuiqu tsumoe.

²⁰Jehoram ye ampe shighi kini shi akelono akukau shilu eno Jerusalem lo ampe tache ayeh pelu. Pano thive kelo timi khuumu amloksa shimoe. Panonguno David phughilo pa kumo shiqhove ikemu kukami kumoki lo qhomo ke.