Read Sumi Naga YEKIKITHI AKINIU 22 Bible Online

YEKIKITHI AKINIU 22 - Sumi Naga bible

YEKIKITHI AKINIU 22

¹Arabmi khamino zuleno le ighi puzu Akukau Jehoram nuliqo kumtsu pithive tsu eno anipau Ahazia likhi puxu puaghitsu. Ike Jerusalem lo akemi no Ahazia pelo papu shelo akukau shi thisulupe.

²Ahazia no ampe muku kini[1] shi ake lono akukau shilu eno pano Jerusalem lo ampe lakhi ayeh pe. Ahazia ghi Akukau Ahab kibolomi kuxu pape wuve kughengu paza Athalia ye Akukau Ahab nga ke eno Israil lo Akukau Omri tinuli lakhi ke eno lino akukumsu pa tsu keuno alhoksa lo pa sailove.

⁴Pano AMPEU shou axine shike kughengu papu thive kethiu Akukau Ahab kibolomi khamino pa kukutsumi shivepe eno panonguno pa pelo ikiqive kepu shivepe.

⁵Panoqo kukutsu pape keu lono pano Siriya lo Akukau Hazael sasu aghu shinike paye Israil kukau Joram sasu kuqhaluve. Ghushimino Gilead lo Ramot lono aghu shi eno Joram ye aghushi lono ghuzave.

⁶Paye aghuzaku lono viluveni ye Jezrel phughi lo idewove eno Ahazia no tilauno pa putsanike wuke.

⁷Joram putsa wukeu hipau hu Alhou no peitha puzu Ahazia ikiqive pekepu shitsu. Ahazia no tilau aphi lono Nimshi nu Jehu no pa eno Joram pama sasu kusholu, Jehu ye Ahab kuka kibo kutsavetsu peniye AMPEU no kishelu kemi ke.

⁸Alhou no akukau kibo shou xathabeve keu Jehu no pepimhe tsu akelo Judami sakiphemi no amqo lakhi shipuzu cheghi keu pano sasu kusholu eno panoqo gholo Ahazia no Joram putsawu kelo pa tilimi ighikemi ghi tipaqo gholono kusholu. Jehu no panoqo kumtsu heqhi khave.

⁹Ahazia phuju kelo paye Samaria lo itshu aghi. Panonguno Jehu lau pa sawu puzu pa heqhivepe. Ikemu panonguno pasu Akukau Jehosafat gihu kelauno pa kumoye shiqhove tsu, Jehosafat ye pano shiluke thaqhu AMPEU qenikeu shicheke. Akukaqha lo ayeh penikemi Ahazia kibolomi lakhimu aghimove.

¹⁰Akukau Ahazia paza Athalia ye panu heqhive tsuae pikeu ithive kemtsa Juda lo kukami kibolomi kumtsu pithive penikeu shi lino ahza tsuve.

¹¹Ahazia ye achepu kishe lakhi ache, lije Jehosheba, liye achinemi lakhi Jehoiada ipikemi sasu kulakupu shike. Lino kusuuno Ahazia nu gholo Joas ipikeu xaphelu, kukami nu kutami khunoqomi heqhiveniye akeqo gholono sasu wuno kusupe qhive eno Achineki lo azuabo lakhi lono pa tuchomujo che. Pa kusupe puakeu lono lino Athalia ulono pithive pemono xaluke.

¹²Athalia no akukaliu shi ayehpe ake thaqhulo ampe tsugho kuto paye kughutshu pe puacheke.