Read Sumi Naga YEKIKITHI AKINIU 23 Bible Online

YEKIKITHI AKINIU 23 - Sumi Naga bible

YEKIKITHI AKINIU 23

¹Ampe tsugho ngokheve kethiu achineu Jehoiada no kiwana shimasa keu kumsuluve. Pano ghushimi kijemi pungu sasu kuptsaluve: Jeroham nu Azaria, Jehohanan nu Ishmael, Obed nu Azaria, Adaia nu Maaseia eno Zikhri nu Elishapat.

²Panonguno Juda lo aphughi kumtsu izuu no panoqo gholo Levimi ngo alaghalo atomi kumtsu Jerusalem lo saghive.

³Panongu kumtsu Achineki lo kumqoluve eno tilau no panonguye akukau nu Joas sasu puloshoqhi lakhi shive. Jehoiada no panoqo vilo pi, “Hilehi akukau akithiu nu lakhi anie! Pano itehino akukau shilu nani, tiye AMPEU no Akukau David laghami no shi nani kepi piqhive ketoi.

⁴Ninguno hipau shini cheni ke. Achinemi ngo Levimiqono Sabat tsalalo akumla mlaniye ighi kelo amqo kuthulo lakhi no achineki khagho kheluveni

⁵amqo lakhiuno akukaki khe luveni eno kutamino Aboqha Khagho lo ngoluveni. Timi kutami ye kumtsu achineki khalalo kumqoluveni.

⁶Achinemi ngo Levimi akumla shi akemi kumo aye timi khuumu achineki alou pulomoni. Achinemi ngo Levimi ye ilolu nani kughengu panoqoye akimthepu ghenguno shikimthe puani ke, ikemu timi kutami ye AMPEU no pipuatsu keu gholu masa ke eno khalacheu ngo masake.

⁷Levimino puthugho puzu akukau veho pesu pututa zuta sujo pesu kheni eno akukau no khilau wuni keno pa gholo ngolo. Timi khuuno Achinekilo iloniye pukaputsani keno pa ghiqhi pithivelo.”

⁸Levimi ngo Juda lo akemino Jehoiada no pive keu tsa shikuputsu. Sabat tsalalo timi khunoqono akumla shitave keno tipaqo puwomove, ike ahza kutsumiqo ye akumla shiniye ighikemi eno shitavekemi kumtsu peithalu kepu shike.

⁹Jehoiada no kijemi lau Akukau David wu angu ngo azuto qo Achineki lo qhi puache keu ikhi pesu tsu.

¹⁰Pano akukau shusho penike ghenguno Achineki hukikha kudau akemi kumtsu azuta sujo pesu ngope.

¹¹Tithiu Jehoiada no Joas sasu khalau saipeghi eno kukami no kishi ayehpe kepu keno tipau yezah kaku lakhi pa tsu. Tishi puzu pa pesu akukau shivepe. Achineu Jehoiada ngo pa nuliqono teli pesu Joas nukishelu eno kumtsuno, “Akukau axu shupeniu!” ipi asheshu.

¹²Athalia ye timiqono akukau lopivitsu akeu sutsa chilu, ike li no Achineki lo timi kumzapu kumqo akeulo posu ighi.

¹³Tilau akukau akitheu no achineki kulaghilo kukami ghenguno atsukucho ajo shi akeu phivilo ghushimi kijemi ngo afuko kuighami no suhope aghikeu lino ithulu. Timi kumtsu alokivi shi ighamuku no afukolo fusu aghi eno achinekilo alekiphemino pano leboqo pesu tipau ikhilu akeulo saphe aghi. Athalia no avekusa launo li phi mini suxuve eno ishi igha, “Pishikiqhi! Pishikiqhi!”

¹⁴Jehoiada ye achineki bokuthabolo ye Athalia ghiqhi penishimo ke ghenguno pano ghushimi kijemi kuno pi, “Aghukhemi dolono li saipevelo eno timi khuuno li xapheniye pukaputsani keno tipau ghiqhivelo.”

¹⁵Panonguno li tsuquluveno akukaki lono li sawuve eno tilau Khurshi Khagho lono panonguno li heqhive.

¹⁶Achineu Jehoiada no Akukau Joas ngo timiqo pelo pa gholo sukuqhano panonguye AMPEU wu timiqo shinikeu puloshoqhi lakhi shi.

¹⁷Tithiu panongu kumtsu Baal chineki lo wu eno tipau xapinyive tsu. Panonguno tilehi akiptia ngo ajulhoqo kubolevetsu eno Baal chineu Matan ye akiptia gizu lono heqhive.

¹⁸Jehoiada no achinemi ngo Levimi pesu Achineki lo akumlapuqo shou ampi shivepe. Panonguye Akukau David no panoqo kumla kughupe puatsu keu kumla shi penikeu shi eno Muse Yezah kiqilo AMPEU lau aghashi keu pesu piti mllani keu shipe. Panonguye ale pheni keu eno peitha nikeqo jeli shou ghi ampi shipeke.

¹⁹Jehoiada no achineki khagho lo aghukhemi pelo khepe eno tipaqo pelo chini kepu lo mithemokemi ye sholokuu ilopemoni kehu ke.

²⁰Ghushimi kijemi, aghakhulo sakiphemi, atomi eno timi kutamiqo kumtsu Jehoiada gholo sukuqha puzu Achineki lono kukaki lo akukau saghini ke shekujojo wuke. Panonguno khagho akijeu lono ilo eno akukauno pa kuka lakhulo ngoluve.

²¹Timi kumtsu alokivino chhitoive eno Athalia pithive kehu aphughiye iquneive.