Read Sumi Naga YEKIKITHI AKINIU 30 Bible Online

YEKIKITHI AKINIU 30 - Sumi Naga bible

YEKIKITHI AKINIU 30

¹Timiqoye Hechekulu Ghulhu ado achipi lono aqhi atughiu loye ikhilu mlaveke, kughengu achinepu lo mithe akemi achinemi lukumkha kuhave ke eno timi ghi Jerusalem lo kutomo kuhokumqo mlave. Tighenguno Akukau Hezekiya ngo pawu kijemi eno Jerusalem lo achekemi no tipau ye aqhi akiniu lono ikhiluni keu shi pulo kuqhaluve, ikehu akukauno Israil ngo Juda lo akemiqo lau atsa tsupuwu ke. Pano Efraim ngo Manase lagha lau yekili tsupuwu keulo kishekulu shi jukuto kugho no, panoqo pelo Israil Lhou AMPEU gihu keu tsupeni ke Hechekulu Ghulhu ikhilu penike Jerusalem lo Achineki lo ighi lo pi kukusu shike.

⁴Akukau ngo timiqoye pano qono pughuchho keulo amlo kiqi shipe ake,

⁵tighenguno panonguno Israilmi kumtsu kukusu shi, tiye Ahuu Dan lono apeu Bersheba lo akemi kutolo puzuu nguno timi alau shi kutomo Jerusalem lo ighino kumqo pesu Ayezah kiqi lono Hechekulu Ghulhu ikhilulo pike.

⁶Akukau ngo pawu kijemiqo zah kutsu lono aghini kishimino Juda ngo Israil qha kumtsu kukusu tsa hipau pesu wue. “Israil lo akemiqo, nonguye Asiriyami no aghakhu le ighi kelo puxu puaghi peke. Itehiye Abraham, Isak eno Jakob Lhou AMPEU lau xaideghi lo eno pano nongu lau ide ighi nani.

⁷Nonguye nongu puasu eno nokusami Israilmi AMPEU panoqo Lhou lau amikucho shimovekeqo toi shi kevilo. Nonguno ithuluve ake pano panoqo shou aghime kitikhi tsuke.

⁸Panoqo toi nonguye kuthovi akevilo ikemu AMPEU gholulo. Jerusalem lo Achineki khipau AMPEU nongu Lhou no alhokupuju ghenguno akimthe shive tsu keno tilehi ighilo eno pa mllalo tishianguno paye nongu lau aloghu ide kithe pemo nike.

⁹Nonguno AMPEU lau xaideghi aye timi nosholokumi sasu akughumi shi sawuve kemiqono panoqo shou amlo ighi qhiyive nani eno panoqo pelo aghakhu lo ide ighiluve pe nani. AMPEU nongu Lhou ye kimiyekini eno kupukini ke eno nonguno pa lau xaide ghi napi aye pano nongu ikhilu nani.”

¹⁰Aghini kishimino Efraim ngo Manase lagha ghakhulo aphughi lakhikhi lo wu eno ahuu Zebulun lagha ghakhu kutolo iqho, ikemu timiqono panoqo junuqhi eno thaigha qhike.

¹¹Tishimu, Asher ngo Manase eno Zebulun laghami khamiye Jerusalem lo ighini keu pulo ake.

¹²Alhou no panongu pelo amlo lakhi shiluve penike Juda lo akumla shia. Panongu pelo Alhou tsano akukau ngo akukau nuliqo no ahza tsukeu papelu peniye shike.

¹³Aqhi akiniulo Kholaqhi sumokeu Ghulhu ikhilunike ghenguno Jerusalem lo timi kumzapu kumqolu.

¹⁴Panonguno Jerusalem lo aghakishi kumllagho mlla keu eno tsungqui ta piti keulo peitha chekeu akiptia jeli kumtsu ikhi pesu Kiddron Khila lo peve.

¹⁵Tipaqhi atsala chighi abidiu lo panonguno Hechekulu ghakishi ghenguno bheritiqo heqhike, Achinemi ngo Levimi khunoqono achinepulo mithemo keno tipaqoye shishe kujove kehu panonguno AMPEU lau akimthepu ghenguno ikhiphepe tsu eno itehiye Achineki lo panonguno akipti kumllagho aghashi kulupu shike.

¹⁶Alhou wu timi Muse yehza lo akukutsu tsa kiqi lono panongu no Achineki lo pututa alo ngoluve. Levimiqo no aghashi keu ji pesu achinemi tsu eno tipaqono akiptia shou kuzute puku.

¹⁷Timi kutomo achinepulo mithemoke ghenguno panonguye Hechekulu bheritiqo heqhi khamlano ake ikehu Levimino panoqo ghenguno shitsu ke eno bheriti qo pesu AMPEU lau ikhiphetsu ke.

¹⁸Tinguno alau no Efraim, Manase, Isakhar eno Zebulun lagha lono ighikemi kutomono shikimtheve keu chine chinimono ake tighenguno panonguye kithikiyimono Hechekulu ikhilu ake. Akukau Hezekiya no panoqo ghenguno akighini hipau shitsu:

¹⁹“O AMPEU, nipuasu Lhou, noye akivike ghenguno timi khunoqono amlo kuchopu tsu puzu omlla ani keno panonguye achinepu lo mithemono ani kemu panoqo kipimi peivetsulo.”

²⁰AMPEU no Hezekiya kighini khochiletsu; timiqo xine peivetsu eno panoqo shipsatsumo ke.

²¹Atsala tsuni kutolo Jerusalem lo timi kumqolu keqono kholaqhi sumokeu Ghulhu alokivi kije lono ikhiluke eno ghulo atsutsu Levimi ngo achinemino panongu kuka kumto kumtsu aghoshino AMPEU sheqhe.

²²Levimino kutsha kughashi puzu AMPEU kumlla hoho peitha keu ghenguno Hezekiya no panoqo akishe tsuke. Atsala tsuni dolo panongu no panoqo puasu Lhou AMPEU sheqhe aghakishi kumllagho shive kethiu,

²³panongu kumtsuno itaghi atsala tsuni alau pinyini keu shi xathalu. Tighenguno panonguno alokivi shi pinyilu.

²⁴Akukau Hezekiya no amshitsu 1,000 eno bheri 7,000 pesu timiqo pelo heqhino chupeni ke ikhiphe tsu eno pawu kijemino amshitsu 1,000 eno bheri 10,000 ikhiphetsu. Achinemi kutomo no chini kepulo mithelu keu chine shilu.

²⁵Tighenguno Juda lo akemi, achinemi, Levimi, ahuuno ighikemi eno inaghami alhokupuju Israil ngo Juda lo acheuve kemi timi kumtsuno alokivi shive.

²⁶Jerusalem phughiye alokivino chhitoive, kughengu hikithipu ye David nu akukau Solomon ghuloki thiu ye hitoi shiju mphike.

²⁷Achinemi ngo Levimino timiqo shou AMPEU wu kukumgha khubetsu. Kungugha lo pa kungoa lono Alhou no panoqo kighini chilutsu eno tipaqo ikhilu tsu.