Read Sumi Naga YEKIKITHI AKINIU 32 Bible Online

YEKIKITHI AKINIU 32 - Sumi Naga bible

YEKIKITHI AKINIU 32

¹Akukau Hezekiya no amikucho shi AMPEU qelu kethiu Asiriya kukatou Senakherib no Juda leighi. Pano aliwo putusupe puakeqo phughi bothasuluve eno pawu ghushimi vilo putusu puakeu tupikiyeqo shoxusu alou ilopenike ahza tsuke.

²Senakherib no Jerusalem ghi lenikeu kumsu akeu Hezekiya no ithuluve kelo,

³pano pawu kijemi sasu xathaluve no aphughi nguno khalau azu puluche ku lakhaveni keushive tishianguno Asiriyamino Jerusalem kupunu ighi kelo azu kitilamu ithulu pemoniye shike. Kijemiqono timi kumzapu sasu aphughi nguno khalau ipe puzu azupuki kumtsu lakha khave, tighenguno azupuki tipaqo lono azu kitilamu ashou qoipe ghimoveke.

⁵Akukau no Jerusalem phughi lo mujo chile kepu jeli shikutowoluve tiye putu puakeu shikumto kithe, aqoki mlawo eno putukeu ajolha akiniu shiwo ke. Tinguno alauno, Jerusalem aqau lo kipelau salo ayeghi puwu sukeu qhalo mujochile kepuaqo shikumto kithelu. Pano angu ngo azuto ghi kumzapu mlape qhike.

⁶Aphughi lo kiptimi kumtsu pesu ghushimi kijemi zahkutsu qholo qhike eno panoqo pelo aphughi khala lo kodibo akeulo kumqo penikeu ahza tsuke. Pano panoqo vilo pi,

⁷“Itha kevino amlo kumto shilo eno Asiriyami kukatou msakevi momu pano sasu chekeu ghushimi jupe msa kevilo. Pa gholo akuka akeu nguno ningu gholouno akuka kumto alau anike.

⁸Paye timi launo ighi keu kuka anike ikemu ninguye nikuphuni ke eno ni ghenguno aghu shitsuni keu AMPEU ni Lhou anie.” Timiqoye akukau tsa hipaqono panoqo shikumtoluve.

⁹Ado hami thiu, Senakherib ngo pawu ghushimi qono Lakis lo aphi lono pano asutsa hipaqo pesu Jerusalem lo akukau ngo pa gholo Judami akeqo lau tsu puwu:

¹⁰“Ni, Senakherib, Asiriya kukatou no nongu Jerusalem lo akemiqoye bothape ngoluve keghi kiuno nongu pelo amlo kumto shilu anipe keno ino iniju anie.

¹¹Hezekiya no nongu vilo AMPEU nongu Lhou no nikuka lono nongu xalu nani kepi pi anike ikemu Hezekiya ye nongu pishiqhi anie eno nongu pelo akhuava shi thipe niye anike.

¹²Pa ampi no AMPEU wu achinea ngo akiptia kutsaleve ke eno tithiu ye Juda ngo Jerusalem lo akemiqo vilo akiptia lakhilo likhi no tsungqui ta piti eno mllani keu pike.

¹³Ipuasu ngo ino ashiayeh kutamiqo lau kiu shive keno nonguye mtha kesha? Ashiayeh kutami lhou khuuno Asiriya kukatou ulono pano timiqo xalu puani kya?

¹⁴Kughono aghakhu hupaqo lhou qono nilauno panoqo ghakhu xalua kya? Tishiaye kiuno nongu lhou no nongu xalu nani kepi kumsu anipe kya?

¹⁵Hezekiya pelo khilemu tikithipu shi nongu pishiqhi momu nongu sabide pekevilo. Pa pulu kevilo! Khuuno shiayeh lhou nomu Asiriyami kukami launo pawu timiqo xalu pua mphike. Tighenguno nongu xamla nanike!”

¹⁶Asiriyami kijemi ighi keqono tinguno alhoksau shi AMPEU Alhou eno AMPEU qeu Hezekiya shou pipuku.

¹⁷Akukau tipauno yekeu yekili huno AMPEU, Israil Lhou phimo veke. Tipaulo pikeuno, “Ashiayehqo lhouqo ye ikuka lono pano wu timi xaluve chemoe eno Hezekiya lhou nomu ilau no pawu timi xamla nani.”

¹⁸Kijemino Ibrimi tsauno ighamuku hipau pike tiye Jerusalem timiqono aphughi putusu puakeu shou akeqo shikumsa eno amlo shikughuthuve tsuniye shike eno tishi keu lono mlalei aphughi leluveniye ke.

¹⁹Panonguno timi kutami lhouqo, timi uno ajulho shikeu shou pipuku ke paphi lono Jerusalem Lhou shou pipuku ke.

²⁰Tithiu Akukau Hezekiya ngo Amuz nu tungkupu Isaya pamano Alhou pelo kuphupenike ighamuku inikhu.

²¹AMPEU no kungumi lakhi puwu keuno Asiriyami ghushimi ngo kijemiqo heqhikhave tsuke. Tighenguno akukatou ye kujoqhiyi Asiriya lo idechile wove peke. Ghulo lakhi paye pa lhou chine kilo ake lono panu khamino azuta pesu pa ghiqhive.

²²Hitoi shipuzu AMPEU no Akukau Hezekiya ngo Jerusalem lo akemiqo ye Asiriya kukatou Senakherib kuka launo xapheluve eno pano ghumi kutami launo ghi xapheluve. Pano wu timiqo pelo acheaxu lo akemiqo sasu kulakishi lono xulupe ke.

²³Timi kutomono Jerusalem lo ighi puzu AMPEU lau akumllagho sughitsu che eno Hezekiya lau tughotili sughi che, tinguno tilauye ashiayeh kumtsuno Hezekiya gihuqhiyi acheuve.

²⁴Tishi ake ghulokilo Hezekiya ye suve eno thiveni keshive. Pano inikhu eno paye viluve penike AMPEU no amchipu lakhi pa tsu ke.

²⁵Ikemu Hezekiya ye AMPEU no pa ghenguno kiu shitsu keno tipaulo shikimthini kepulo aqhekuza ihulo keu shive, ike Juda ngo Jerusalem ye tipau ghenguno shishe aghime shive.

²⁶Ashekhalo, tishi ae pinamu Hezekiya ngo Jerusalem lo akemiqono pano likhi pano kuchuni keu shiluve ike AMPEU ye Hezekiya no thive kethiu no timiqo ghimeqhike.

²⁷Akukau Hezekiya ye kinikulu kutsasa shive eno kumtsuno agigihu pa tsue. Pano pawu shunayi, tsandiyi, amekusho tu, vekujumukhu, azuto eno anhemgha ame kuapu kutau qo ghenguno pekutsukiqo shipe qhike.

²⁸Tinguno alau ghi pawu athi, atsayiji eno oliv teli ghenguno abi ale shipe qhike; pa mishiqo ghenguno aki shitsu eno pawu bheri ghenguno abo mlape qhike.

²⁹Hipaqo nguno alauno, Alhou no bheri ngo amshi eno kinikulu kutau pesu pa tsuke ike pano aphughi kutomo shipe qhi.

³⁰Gihon Zupuki mikekhave tsukeu huye Akukau Hezekiya no ke eno azu tipau la ghepili puzu Jerusalem puwupua keu alou kudau a-a lakhilo qoighi kepu shike. Hezekiya ye pano mla itha keu thwokhalo tokulu shilu,

³¹eno kughou Babilonmi lashikamino ti Hezekiya ghakhulo pakutakeu shive keu vehu inijuniye ighi kelo pinamu Alhou no Hezekiya pelo pa likhi pa kutoshive pekeuye pa kuxu pejuniyeke.

³²Hezekiya no shikeu thwokha kumtsu eno pano AMPEU lau amlo tsuqhiyi keqoye Amuz nu Tungkupu Isaya wu Kungunhetsu lo eno Juda ngo Israilmi Kukami Xughili lo yekutsupe puani.

³³Hezekiya ye thive eno kukami kumoki lashou muqolo qhove. Pano thive kelo Juda ngo Jerusalem lo akemi kumtsuno agigihu kije shi pa tsuke. Panu Manase no pa shelo akukau shiluve.