Read Sumi Naga YEKIKITHI AKINIU 33 Bible Online

YEKIKITHI AKINIU 33 - Sumi Naga bible

YEKIKITHI AKINIU 33

¹Manase no Juda kukau shilu kelo paye ampe chighi kini shi a eno Jerusalem lo ampe lhopungu pungu ayeh opelu.

²AMPEU no pawu timiqo no azuu hawo ighikelo ashiayeh khunoqomi aghakhu lono hapheve keno timi tipaqono aphikumqhupu ghusho ghili shiche keu pape keu lono Manase ye AMPEU shou axine shive.

³Papu Hezekiya no asu-atu chine kumlla-a kutsaleve keqo pano shikitheve tsu. Pano Baal mlla kepushi akiptiaqo mlatsu, Ashera lhou liu julho shipe qhi eno ayepuqo mllake.

⁴Achineki khilehi AMPEU no alhokupuju lo pa mlla chelo pikeno tipa-a lo pano asu-atu kumlla kiptia mlape qhike.

⁵Achineki bocho kinilo pano ayepu mlla kepu kiptia shipe qhi.

⁶Pano panuqo pesu akipti kumllagho shi Hinom Khila lo agha shi heqhike. Pano saqhisali ngo kuduu pepimhe, auye kujumi pichekemi eno tumumi sasu kusholu che. Pano AMPEU shou ighono axine shike eno pa loghu shikighide ke.

⁷Alhou no David ngo panu Solomon vilo pipua keu Achine ki lo pano ajulho lakhi qhike. Alhou no pi keuno: “Jerusalem Achine ki hipauye Israil lo ashiayeh chighi kini ghakhu gholono ino kishelu puzu tipa-a lono imlla penikeu shike.

⁸Israilmi no aghokulu shi ino ahza tsukeu pelu eno iqeu Muse no panoqo tsukeu Ayezah kumtsu pelu aye tithiu no ino panoqo puasu tsukeu yeghi lono panoqo haphevemo kepu shi nani ke.”

⁹AMPEU no pawu timiqono azuu haighi kelo ashiayeh khunoqo pano hapheve keno tipaqo nguno alaushi axine alhoksau Manase no Juda lo akemiqo pelo shipeke.

¹⁰AMPEU no Manase ngo pawu timiqo lau kutughu puwu anamu panonguno initsu moe.

¹¹Tighenguno AMPEU no Asiriyami ghushimi shou ampimi pelo Juda le ighipe. Panonguno Manase kughaluve, ayi kughuhono pa fuluve, ayi kichhe pe tshuluve eno Babilon lo pa sawuve.

¹²Pa ghimeqhi akelo paye akumtsha shi chuni iqighive eno AMPEU pa Lhou vilo kuphu penike ghenguno qhuinijuke.

¹³Alhou no Manase kighini ikhiluve tsuno tipau khochiletsu no pa pelo Jerusalem lo idewolupe eno ayeh pekithelu peke. Hipau lono AMPEU ye Alhou kepi Manase no mutsumishei ithiluve.

¹⁴Hipa thiu, David phughi kipela kudau putu puakeu khalau akiniu pesu Manase no chuqumghai shikithe pukuve, tiye Gihon Zupuki kupunu lo akhila lo a-a lakhi lono ahuu Akha Khagho kutolo shike, aphughi tipaqha pesu Ofel ipi chenike. Pano ghushimi kijemi lakhi gholo ghushimi amqo lakhi khi ghi pesu Juda lo aphughi puwu pua keqo lakhi khilo qhiwoe.

¹⁵Pano Achineki lono inaghami lhouqo eno ajulho tilehi qhikeu ikhive eno Achineki achekeu toghilo ayeh kumthami kiptiaqo eno Jerusalem lo a-a kutauqo lo aghikeqo pano ikhipeve; pano tipaqo kumtsu aphughi nguno khalau pesu ipe puzu vepuwu khave.

¹⁶Khilehi AMPEU mlla chekeno tipau lo akiptia ghi pano mla kitheve eno tipaulo pano kuposhukulu ngo shikimthi kumllagho pesu aghashi tsue. Juda lo akemi kumtsu AMPEU, Israil Lhou mlla penike pano ahza tsue.

¹⁷Timiqono akumlla-a kutaulo aghashi keu shikibe ache kemu panonguye AMPEU lau likhi pesu mlla cheuve.

¹⁸Manase no shikeu thwokha kumtsu pano pa Lhou lau inikhu keu eno tungkupmi no AMPEU, Israil Lhou je lono pa vilo atsape shikeu kumtsu Israil lo kukami Xughili lo yekike pe puani.

¹⁹Akukau no inikhu keu eno Alhou no tipau khochile keu eno pano xaideighi mphi lo axineqo shipe puakeu, tiye pano alhoksa kumla shikeu, asu-atu kumlla-a eno Ashera julho pano shikeu eno ajulho pano mlla chekeu kumtsu Tungkupmi Xughili lo yekike puani.

²⁰Manase ye thive eno kukakilo qhove eno panu Amun no pa shelo akukau shiluve.

²¹Amun no Juda lo akukau shilu kelo paye ampe muku kini shia eno Jerusalem lo ampe kini ayeh pelu.

²²Papu Manase toi pano AMPEU shou axine shike eno papuno asu-atu julho mlla keu pa ghi mllake.

²³Ikemu paye papu no chuni iqighive keu toi shimoke eno AMPEU lau ideighimo ke; paye papu no shiche keu nguno alau shi axine shiveke.

²⁴Amun wu kijemino pa shou kumquveno kukaki lono pa heqhi pithive.

²⁵Juda lo akemiqono Amun heqhive kemiqo ghiqhive eno panu Josiya pesu akukau shivetsu.