Read Sumi Naga YEKIKITHI AKINIU 34 Bible Online

YEKIKITHI AKINIU 34 - Sumi Naga bible

YEKIKITHI AKINIU 34

¹Josiya no Juda lo akukau shilu kelo paye ampe tache shia eno Jerusalem lo ampe shighi lakhi ayeh pelu.

²Paye AMPEU lopu kiu keno tipau shike; pano pasu David Akukau kuxu papeghi Alhou yezah kumtsu iqemono aghokulu shike.

³Josiya no akukau shilu keu ampe akutacheu lo, paye ighono lhothemi kughunu shi aphi lono pasu Akukau David Lhou mlla cheuve. Ampe bidi thiu pano asu-atu kumlla aqo kutsale thuve - Ashera lhouliu julho ngo asu-atu julho kutau kumtsu.

⁴Pano mijetsukeu qholono pawu timiqono Baal mlla chekeu kiptia kubolevetsu eno tipaqo phivilo tsungqui ta kiptia hepholevetsu. Panongu no Ashera julhoqo ngo kutau asu-atu julho kumtsu mukhumuno shivetsu eno amukhu pesu ajulho tipaqo lau aghashi chekemiqo kumoki shou kuthole pukuve tsu.

⁵Pano asu-atu chinemiqo saghi pesu panoqono mlla chekeu kiptia shou pitileke. Hipaqo shikeu lono pano Juda ngo Jerusalem pesu achinepu lo mithe kitheluve tsuke.

⁶Pano aphughiqolo ngo Manase, Efraim eno Simon ghakhu shipusa puakeu ghakhulo ghi hipatho lono shike eno ahuu Naftali kutolo tipatho shike.

⁷Ahuu akeu Kukaqha lo aghakhu kumtsu lo pano Ashera julho ngo akiptia qo kubolevetsu, asu-atu julhoqo mukhumuno shive tsu eno tsungqui ta kiptia kumtsu hephopinyive tsu. Tithiuno pano Jerusalem lo ideighike.

⁸Pano kakeu mipe chighi akutacheulo, pano asu-atu chine pughave no ayeghi ngo Achineki shikimtheve kethiu Akukau Josiya no AMPEU Alhou chineki pukho penike timi hipano kuthu puwu: Azalia nu Shafan, Jerusalem peitha kicheu Maaseia eno kijemi atou Hoahaz nu Joa.

⁹Achineki lo Levimi aghukhemiqo no qhakutsu pe puaghi keu pisa pesu Achinetou Hilkiya ulo suvetsu. (Pisa tipauye Efraimmi ngo Manasemi launo ngo Ahuu Akukaqha lo akemiqo launo eno Juda ngo Benjamin eno Jerusalem lo akemiqo launo qhaluke.)

¹⁰Pisa hipau pesu Achineki pukho penike ampi shipeni kemi pano kuthu ulo suvetsu eno panonguno tipau pesu

¹¹asu ngo atu mulakemiqo pelo atu ngo tokta qhu puzu Juda lo kukamiqono aki pumavetsu keu pukho penikeu shike.

¹²Timi khunoqono akumla shikeno tipaqoye amikuchomi. Levimi pano bidino timi tipaqo jukutsukemi shike: Merari laghalo Jahat ngo Obadia pama eno Kohat laghalo Zekharia ngo Meshulam pama. (Levimi tipaqoye kumtsu ale kiyiqimike.)

¹³Levimi kutamiqoye anhemgha pukishe sughi keulo ampimi shi eno akumla kutau jelilo mla akemiqo jukutsukemi shi eno itaghi kutamino yekikepe qhikemi eno aghukhemi shicheke.

¹⁴Pekikeche keu bolono pisa ikhiphelu akelo Hilkiya no AMPEU Yezah kaku ithulu, tiye Alhou no Ayezah Muse tsukeu ke.

¹⁵Pano Shafan vilo pi, “Ino Achineki lo hilehino Ayezah kaku hu phuluvae.” Pano kaku hu Shafan tsuve

¹⁶eno Shafan no akukau lau tipau pesu wuve. Pano ishi pitsu, “Nono ahza tsukeu thwokha ninguno shivae.

¹⁷Ninguno Achineki lo pisa puaghi keu ikhiphe pesu akumlami ngo tipaqo jukukutsumi lau tsuvae.”

¹⁸Pano highi pi, “Hilkiya no kaku lakhi itsukeu ghi hi anike.” Pano asutsa ipeghi ghi akukau vilo tipau phisutsu.

¹⁹Kaku phisu akeu akukauno chilu puzu pa mloksa shi pa phimini suxu

²⁰eno Hilkiya ngo Shafan nu Ahikam vilo Mikaya nu Abdon vilo, kughakilo akiyeu Shafan vilo ishi pi:

²¹“Wulo ighenguno eno Israil ngo Juda lo xuaghi kemiqo ghenguno AMPEU putsajulo. Kaku hipau lo kutsu puakeu vehu phujulo. AMPEU ye ningu shou amlo ide anike kughengu nipuasu no AMPEU tsa lumoveno kaku hipaulo shimasa kepi pikeu shimove ke.”

²²Akukau zahkutsu lono Hilkiya ngo kutamiqono totimi tungkupmi lakhi Hulda ipikeu putsajuni ke wu; liye Jerusalem akitheu salo xu acheke. (Li kimi ye Tikva nu Shalum eno Harhas tinuli ke, pano achineki lo aphi mini kusubo shou ampi shicheke.) Panonguno li vilo kiu kishive keno abo akeshi lhe,

²³ike lono panoqo vilo akukau lau idewo puzu asutsa

²⁴hipaqo AMPEU launo ighi keu pesu pilo pike: “Niye akukau lau phisu piyeve keulo musuini keu yepe puakeu pesu Jerusalem eno tile xuakemiqo ghimeqhini cheni.

²⁵Panonguno ipeveke eno kutau lhouqo lau aghakishi pesu tsuke eno panonguno mlave keu huno iloghu xukuthove tsuke. Iloghu ye Jerusalem shou xukutho pukuvae eno tiye iquilomo nanike.

²⁶Akukau ghenguno ni AMPEU Israil lhou no pi akeu ye hike: Kakulo kiu yepe puakeno nono tsaqui initsuke,

²⁷nono izulo xaidelu puzu chuni iqighike, ino Jerusalem ngo tile akemiqo ghimeqhini keu shi shikumsa keu nono chilu puzu ophimini suxuveno mloqah ke. Niye okighini chiluvae

²⁸eno Jerusalem shou ino aghime sughiniye kuto akeuye nono thi mphi kutolo ighimo nani. Ino opelo alokughuno shi thipe nani.” Tighenguno timiqono Akukau Josiya lau asutsa hipau pesu ideighi.

²⁹Akukau Josiya no Juda ngo Jerusalem lo sakiphemi kumtsu kukumqo

³⁰eno panongu kumtsa Achineki lo achinemi ngo Levimi eno timi kutami kinimi kumlhomi kumtsuno papesu wuke. Panoqo kumtsu gizu lono akukauno ti Achineki lono phulu keu puloshoqhi kaku kumtsu asutsa kuloghi lono phisu.

³¹Pano kukami tsukucho phivilo puthugho puzu AMPEU sasu puloshoqhi shi,tiye pa ghokulu shini keu,pa mlo eno pa ngulho kumtsu suno pa yezah ngo ahza kutsu papeni keu eno kakulo yepuake toi puloshoqhi lo kiu shimasa kepu shi ani keno tipaqo mlaithani keu shike.

³²Pano Benjaminmi ngo Jerusalem lo kutami aghikeqo kumtsu pelo puloshoqhi pelupe nike ashoqhi shipe. Tighenguno Jerusalem lo akemiye panoqo puasu Lhou lau panonguno puloshoqhi shi keulo shilo pi puakeu ghokulu shike.

³³Akukau Josiya no Israilmi ghakhulo aphi kumqhupu suatu julho akeu kumtsu kutsaleve ke eno pano xuake thaqhulo timiqo pelo AMPEU panoqo puasu Lhou qepemasa kepu shitsu.