Read Sumi Naga YEKIKITHI AKINIU 35 Bible Online

YEKIKITHI AKINIU 35 - Sumi Naga bible

YEKIKITHI AKINIU 35

¹Akukau Josiya ye AMPEU gihu keu shi Jerusalem lono Hechekulu Ghulhu ikhilu; aqhi atughiu atsala chighi abidiulo panonguno apine ikhiluni ke lhoxuqo heqhi.

²Pano achinemi pelo Achineki lo panoqo kumlapu shipenike kutotsu eno tipaqo kithikiyi shipenike amlo shikumtotsu.

³Pano akukutsu tsa hipaqo pesu Levimi, Israil lo kutsuchekemi AMPEU lau akimthepu shi tsuvekemi lau tsuke: “Akimthe Puloshoqhi Bohu, David nu Akukau Solomon no shiqhikeu pesu Achinekilo qhilo. Nonguye tipau xapusu a-a lakhi lono lakhiu lo pukishe chekevilo ikemu nonguye AMPEU nongu Lhou eno paw timi Israilmi qelo.

⁴Nonguye Achineki lo alagha kiqi lono a-a akeulo ngolo, tiye Akukau David ngo panu Akukau Solomon no akumlapu makho nongu kutotsu keu kiqi lono ngowolo.

⁵Nonguno kithi pesu ngo puzu khamiye Israilmi akiboqo lakhikhi kuphulu kepu shilo.

⁶Nonguno Hechekulu bheriti ngo aneqo ghiqhilo. Itehi nonguye achinepu lo akimthe shilo eno aghakishi kutolo tishi anguno nokusami Israilmi pelo AMPEU no Muse vechewo akukutsu tsa tsupua keu papelu penike.”

⁷Timiqo pelo Hechekulu ghulhulo peitha penike Akukau Josiya no pa mishi ngo bheri loji lono bheri, bheriti, aneti 30,000 eno amshitsu 3,000 qhasutsu ke.

⁸Pawu kijemi ghi timiqo, achinemi eno Levimi pelo peitha penike qhasutsu. Achineki lo ampimi shi akemi kijemiqoye Achinetou Hilkiya, Zekharia eno Jehiel, panonguno bheriti ngo aneti 2,600 eno amshitsu 300 pesu achinemi tsuke tiye aghulhu lo aghashi kepu ghenguno tsuke.

⁹Levimi sakiphemi, Konania, Shemaia eno pa thikuzuu Nethanel, Hashabia, Jeiel eno Jozabad noqono bheriti ngo aneti 5,000 eno amshitsu 500 qhasutsu, tiye Levimi pelo aghakishi gho tsupeniyeke.

¹⁰Hechekulu ghulhu ghenguno thwokha kumtsu kithi pesu shiluve kethiu, akukauno ahza tsuke toi achinemi ngo Levimino pututa alo ngoluve.

¹¹Bheriti ngo aneti heqhive kethiu Levimino tipaqo yiko khovetsu eno achinemino akiptia lo ahji kuzute puku ke.

¹²Tithiu panonguno timiqo dolo akibo muqo kiqi lono lhoxuqo pesu akumllagho shipenike kijetsu tishi anguno Muse Yezah lo akukutsu tsa kiqi lono panoqo pelo mllalu peniyeke.

¹³Levimino ayeh lo shilo pikeu kiqi lono aghashikeqo pesu ami shouno ghuke eno akimthe kumllaghoqo pesu ali jeli lono lhoqhi puzu papashi timiqo lau ashi asajetsu ke.

¹⁴Hipau shitave kethiuno Levimino pano sala eno Aron polo kughukomi achinemi sala ashi kutolu ke, kughengu achinemiye putho kutolo mighimghai lhoxu kumtsu pesu tsukeu eno aghashi keu tha piti ake.

¹⁵Asap lagha alekiphemi Levimi hipaqono Akukau David no akukutsu tsa tsupua keu kiqi lono pututa alo ngoluve ke: Asap, Heman eno akukau wu tungkupu Jeduthun. Achineki khagholo ghukhe shi akemiqo ye panoqo-a qhikepu shimoke kughengu Levimi kutamino panongu ghenguno Hechekulu ghulhu kutotsu ake.

¹⁶Tighenguno Akukau Josiya no ahza tsuve ketoi AMPEU mllanike Hechekulu ghulhu ikhiluni ke eno akipti kumllagho akiptia alo pitinike ghenguno tipa tsalalo thwokha mlaluveke.

¹⁷Israilmi tilehi akemi kumtsu no atsala tsuni ghenguno Hechekulu ghulhu eno Kholaqhi sumokeu ghulhu ikhilue.

¹⁸Tungkupu Samuel ghulokilo thono Hechekulu ghulhu ye khilemu hikithipu shi ikhilu mphike. Puzuu kukami lakhimu Akukau Josiya ngo achinemi, Levimi eno Juda ngo Israil eno Jerusalem lo akemino hi hechekulu ikhilu keu kimihi ikhilupe puamoe,

¹⁹tiye Josiya no kakeu mpe chighi akutacheu lono shike.

²⁰Akukau Josiya no Achineki ghenguno hipaqo kumtsu shivetsu kethiu, Ijip kukau Neko no ghushimi sasu Eufrati Ghoki lo Karkhemis lo aghushiniye sawu. Josiya no pa lakhanike pukaputsa

²¹ikemu Neko no Josiya lau asutsa hipau tsupuwuve: “Aghukishi hipau ino shiwu chekeu lo ovehu kuhake, Juda kukau! Niye osasu aghushiniye ke kumono ighumi sasu shiniye chenike eno Alhou no ivilo mtazu shilo pi anike. Alhou ye ikudau su anike tighenguno noye imujochile kevilo tikumoaye pano okutsave nanike.”

²²Ikemu Josiya no tsuyikhomo aghushini keu shive. Paye Alhou no Akukau Neko vechewo kiu piani keno tipau initsumo nikeu shi auve tighenguno paye paju kimchimla kepushi pekiliveno Megido khilalo aghukishi lo wuve.

²³Aghu shi akelo Akukau Josiya ye Ijipmi piji no pa veve. Pano paqemiqo vilo ishi ahza tsu, “Isasu wuvelo; niye aghuza kitikhi shivae!”

²⁴Panonguno khurkulu lono pa khapeqheluve eno khurkulu eno akiniu pa gholo chepekeulo pa pesuluve eno Jerusalem lo pa xapu wuve. Tilauno paye thive eno kukami kumoki lo qhove. Juda ngo Jerusalem lo akemi kumtsu no pa kithi lo mloqah ke.

²⁵Tungkupu Jeremiya no Akukau Josiya ghenguno akumlo le lakhi iqiphetsu. Israil lo alekiphemi ghenguno kiptimi na totimi namu kughou panonguno pa ghenguno mloqani keno ale hipau peithani keu khuayeh shiluve. Ale ye akumlole pekike puakeqo gholo ani.

²⁶Josiya no shikeu thwokha kumtsu pano AMPEU lau amlo tsuqhiyi keu, pano Ayezah papekulu shikeu,

²⁷pawu xughili abothu lono ashekha kutolo kumtsu Israil ngo Juda lo Kukami Xughili lo yekikepe puanie.