Read Sumi Naga YEKIKITHI AKINIU 5 Bible Online

YEKIKITHI AKINIU 5 - Sumi Naga bible

YEKIKITHI AKINIU 5

¹Titoi Akukau Solomon no shini pikeqo Achineki kumla shikhave eno papu David no khipaqo nhemgha AMPEU lau ikhiphe tsuve keno tipaqo tsandi, shuna eno anhemgha kutauqo kutsupe qhive.

²Tithiu akukau Solomon no Israilmi dolo pututa laghami sakiphemi kumtsu David phughilo Zion lono AMPEU wu Puloshoqhi Bohu achinekilo sughi nike ghenguno Jerusalem lo kusu.

³Panongu kumtsu Apusho Pinye ipikeu chine tsala lono ighino kuholu.

⁴Sakiphemi kumtsu kumqoluve kethiu Levi laghano Puloshoqhi Bohu pesu achinekilo wuve.

⁵Achinemi eno Levi laghano AMPEU no ngochekeu Phiki eno tinhemgha pesu achineki lo pekiqesu wuke.

⁶Akukau Solomon ngo Israilmi kumtsuno ti Puloshoqhi Bohu zulo kuhokumqono amshi eno bheri kihikha kumla heqhi pesu mllake.

⁷Tishino achinemino Puloshoqhi Bohu pesu achine kilo ilo eno Shishe Akimthe-alo kerubim kuma qholo qhive.

⁸Kuma chishibo sukhope akeuno panonguno pe ighi keuqo khonhape ngove.

⁹Puloshoqhi Bohu pekeu sulu sheye Shishe Akimthea zulo vejoi ithulu nani ikemu kutau loye khilemu ithulumoe. (Ishi kutolo tishi acheni).

¹⁰Puloshoqhi Bohu tipau alouye khaghi Israilmino Ijip lono ipeche kelo AMPEU no Muse vechewo Sinai To lono Puloshoqhi shikeu atu pha kini nguno kutauye kiumu kuhae.

¹¹Achinemi eno timi jeli kumtsu shikimtheveno ighi kha.

¹²Levi laghami ghi alekiphemi Asaf, Heman, Jeduthun eno panongu nuliqo eno pano thikuzu zukighimi fulili, eno aheo pe akumlla-a phivilo ighi eno achinemi 120 no fulili ighakeu gholo sukuqha.

¹³Alekiphemino asutsa lakhino phe aketoi Alhou she auve eno ishi pi, “AMPEU sheqhelo kughengu paye aloe, pa kikimiye lhokta kutolo anie.” Tishi kethiu akiye khungukusuno chhive.

¹⁴Tishive kehu achinemiye khungkusu ghenguno puthughono kutsu mlave, kughengu Alhou ighi keu saghu saghukeuno aki chhive.