Read Sumi Naga YEKIKITHI AKINIU 6 Bible Online

YEKIKITHI AKINIU 6 - Sumi Naga bible

YEKIKITHI AKINIU 6

¹Tipathiu akukau Solomon no inikhu, “AMPEU nono khungkusu eno khumkhulei keulo achenike.

²Ikemu opelo ngopeni ke ino akiqheu chineki shivae eno oghenguno alhokuthu ache kepu-a shivetsuae.”

³Tishino akukauno pagi kungupuwono Israilmi kuho akemi eno puthugho akemi kumtsu kumghatsu.

⁴Pano pi, “Israilmi Lhou AMPEU kumghalo. Pano pa kichino ipu David lau tushoqhipe puakeu pa-uno shikupuvetsuae, pa vilo ishi pipua keu

⁵‘Ino Ijip lono iwu timiqo sasu ipeghike tsala lono Israilmi shiyeh dolo khuno phughi lomu aki lakhi shinikeu kishelumoe ije puatsunike ghenguno momu ino timi khupelomu iwu Israilmi shou kapenike kishelumoe.

⁶Ikemu ije tile apenike ghenguno ino Jerusalem kishelue eno David pelo iwu timi Israilmi shou ngopenike kishelue.’

⁷Ipu David mlolo Israilmi Lhou jelono aki lakhi shinike kumsulue.

⁸Ikemu AMPEU no ipu David vilo pi, ‘Ije lono aki lakhi shinike omlo lono kumsulu keuye aloe.

⁹Tishimu noye aki tipau shimo nani, ikemu ophi lono ipeghikeu onu no shi nani, pano aki tipau ije lono shi nani.’

¹⁰Tighenguno AMPEU no piqhi ketoi shike, kughengu ino ipu David kuka thisulu eno Israil kuka lakhulo kaluke, tiye AMPEU no tushokiqhi shi puake toi Israilmi Lhou AMPEU ghenguno aki hu shike.

¹¹Ino Achinekilo Puloshoqhi Bohu qhipuani, tilehi AMPEU no Israilmi sasu puloshoqhi shikeu tupha supe puanike.”

¹²Tithiu Solomon no Israilmi kumtsu zulo puthughono pa-u chhopesu inikhu.

¹³(Solomon no alazayino akhache mlano amtalo qhi tiye akije akushulau kodibo miter kini tuxa eno akuchuqu lau miter lakhino tuxa. Tipau mlakeulo pano qhoqhune puzu pa-u kungugha kudau chhopesu ngoke).

¹⁴Pano ishi inikhu, “O Israilmi Lhou, AMPEU, kungughalo eno ayeghilo ghi otoike Lhou khuumu kuha. Noye oqemiqo lau puloshoqhi shikeu tamomitheno kikimiye pa gholuche kemi lau piye cheni.

¹⁵Nono oqeu ipu David lau okichino piqhikeu hu ishino hitoi otsa qhoi shikupuvetsu ake.

¹⁶O Israilmi Lhou AMPEU owu tushokiqhi lakhiu ipu David vilo pikeuno pa tikughuko gholo milakhino alhokuthu Israilmi shou ka apeni pi keuhu shikupu tsulo, panongu ghi pa toi oyehza pekupu cheaye.

¹⁷Titoi O AMPEU Israil Lhou no oqeu David lau piqhi puakeu kumtsu achipika pelo.

¹⁸Ikemu O Alhou, noye kuchouno timi gholo xulu nanima? Julo, kungugha eno akiqheu kungugha ghi oghenguno tulalo. Tishiaye ino achineki shikeu hiye kishino oghenguno lumkhania?

¹⁹AMPEU iLhou niye oqeuke, ikighini chilutsulo eno ino ovilo qhuiniju keu shitsulo.

²⁰Achineki hipau putho pucho khetsu alo, nono tushokiqhi shi pikeuye hipa alono omllalo pie, titoi kughou ino achineki hipaulo jupukuno khukeno itsachilu tsulo.

²¹Ikighiniqo eno owu Israilmino hipaulo jupukuno khukelo chilutsulo, oki kungugha lono chilutsuno ni kipimi qhitsulo.

²²Kughono timi lakhino lakhi lau pimivekeu nguku puzu okumllaki hipaulo paye kiumu pimi puamo kepi ashoqhi shi aye,

²³O AMPEU, kungugha lono chilutsuno oqeuqo phujuve tsulo. Pimivekemiqo akuzupu lono ghimelo eno khuno pimi puamo keno kichepheve tsulo.

²⁴Owu Israilmi no ozulo pimiveno pano ghumi ulo ikiqilove aye eno panonguno achineki hileno olau ideghino khoqhunhepe ovilo akipimi khu aye,

²⁵kungugha lono panongu kukhu chilu tsulo. Owu timiqo kipimi qhivetsulo eno panongu sachile sasu panongu eno panongu puasuqo tsu puakeu yeghilo saighitsulo.

²⁶Kughono owu timiqono ozulo pimiveno nono atsutsu khaveno tsughuqhi tsumoveni keno, tsala panonguno axine lono xaide ighino achineki kudau jupuzu khoqhunhepe ovilo inikhu aye,

²⁷O AMPEU, kungugha lono panongu tsa chilutsulo eno oqemi Israilmi xine qhivetsulo eno kiu no achipi keno shika tsulo. Tishino AMPEU, hi oyeghi shou tsutsughu puwu tsulo, khikhi nono alhokuthu pighi apeniye tsukeno.

²⁸Kughono ayeghilo puqumiye ighini, momu akusugha momu atukha ighi momu kughono owu timiqo aghumino leni keno momu kusukini jeli panongu gholo ighinikeno,

²⁹panongu kukhu kighini chilutsulo. Owu Israilmi dolo khunano amlo ghimeshi achineki kudau ju pau chhope khu aye,

³⁰panongu kukhu kighini chilutsulo, oki kunguuno panongu tsa initsulo eno akipimi qhitsulo. Olikhino timi jeli kumtsu kukumsu ithi kicheuke. Timi lakhi lau shikuzupu lono peitha tsulo.

³¹Tishi keu lono timiqono olau sukumsa anani eno panonguno nipuasuqo lau nono tsukeu yeghi lo alhokuthu oghokulu shi ache nani.

³²Ayeghi kushuwalo xu akemi inaghami lakhino noye kiutoi kije eno akuka akemi eno kiu toi alomsu, kutokupui chekemi keno chiluno Achineki hileno khunike ighi aye,

³³pa kukhu chilu tsulo. Kungugha khipa-alo nono achenikeno tileno chilu tsulo eno pano ovilo kiu pikeno ti shitsulo. Tishi keuno ayeghi qhalo timi kumtsuno owu Israilmi toi ithino ogholu nani, tishi aye Achineki hipau ino shikeuhu omllani keu ki kepi panonguno ithi nani.

³⁴Kughono owu timiqono panongu ghumi sasu aghu shiwuni keno panonguno khile khile aghimu aphughi hikudau eno Achineki khikhi ino oghenguno shikeno tikudau ju puzu ovilo inikhu aye,

³⁵Nono kungugha lono panongu kighini chilutsulo eno tokulupu pe panongu tsulo.

³⁶Kughono owu timiqono ozulo pimiveni keno kughengu pimimokemi khumu kuhakehu eno nono panongu shou ologhu ideveno panongu ghumi pelo panongu shou toluvepeno panongu pesu ayeghi kushuwalo akughulo sawuve pimu;

³⁷Panonguno tipa yeghi lono amlo pebide panonguye kiu toi ozulo hekibide xine shive keno piphe inikhuaye O AMPEU, panongu kukhu kighini chilu tsulo.

³⁸Tsala panonguno tipa yeghi lono kuchouno nono nipuasu qo tsukeu yeghi hipau jughi ovilo khuaye eno Achineki khikhi ino oghenguno shitsu keno jughi ovilo khu aye

³⁹panongu kukhu chilu tsulo, oki kungugha lono panongu tsa initsulo eno kimiye tsulo eno owu timiqo kipimi kumtsu qhivetsulo.

⁴⁰‘Itehi, iLhou, ningu lau julo eno hipa alo akighini laju keu hu chilutsulo.

⁴¹Itehi ithughilo, AMPEU Alhou, owu Puloshoqhi Bohu gholono okuka michishi, Achineki lo iloghilo eno pulhapuju acheuvelo. Achinetomi no mlakeu kumtsu kumghatsulo eno owu timi jeliqo pelo okivi hu jupe alovi apelo.

⁴²AMPEU Alhou, nono kishekeu akukau hu milive kevilo. Nono oqeu David qhu chekeu kumsululo.’ ”