Read Sumi Naga YEKIKITHI AKINIU 7 Bible Online

YEKIKITHI AKINIU 7 - Sumi Naga bible

YEKIKITHI AKINIU 7

¹Kughou akukau Solomon no pa kighini tave keno kungugha lono ami iqighino piti kumllagho kuchopu pitive eno AMPEU jukuvuno Achineki chhive.

²AMPEU jukuvuno Achineki chhive kehu achinemi qoye tile ilo mlave.

³Kughou Israilmi no kungugha lono ami iqighikeu ithulu keno panonguye agi pishiqhope aghuzalo ikiqiveno AMPEU je she auve eno pa mlla auve tiye pano akivi ke eno pawu lhokta kikimiye ghenguno ke.

⁴Tithiu Solomon ngo pawu timi kumtsuno AMPEU lau aghashi keu kumllagho pesu tsu.

⁵Pano amshi 22,000 eno bheri 120,000 pesu kuposhukulu kumllagho shi tsu. Titoi shi puzu pa eno pawu timiqono Achineki ikhiphepe tsuke.

⁶Achinemi ye panongu pelo ngole pikeu alo puthugho eno panongu gizulo panoqo kudau ju ghi Levi laghano puthugho. Panoqoye Akukau David no tsukeu lebo jeli pesu AMPEU sheqhe eno “Pa kikimiye ye lhokta kutolo ke” ipikeu le phe ae, tiye David no huthuphe tsukeu toi shike. Achinemiqono afuko igha keulo timi kumtsu ghano puthughove.

⁷Solomon no Achineki khala amtau hu ikhiphe pe shikimtheveno tilehi aghashi keu gho pesu mllae tiye akuchopu pitive kepu, athi kumllagho eno kuposhukulu kumllagho lono atha pesu mllake. Pano hipau shikeu ye kutau ghenguno kumono alazayi pesu akiptia pano mlakeu huye akumllagho hipaqo ghenguno mughulove ke.

⁸Solomon ngo Israilmi kumtsu atsala tsuni kuto lo Apusholo ngokeu Pinye ghulhu shike. Tilehi timi kumzapu ighi ke, khamiye ahuu Hamat Kita lono eno apeu Ijipmi lughi kutolo no ighikha ke.

⁹Panonguye akiptia ikhiphe pe shikumthetsu keu ghenguno atsala tsuni puwove eno Apusho Pinye ghenguno atsala tsuni alau puwoveke. Ashekha tsalanilo panonguno Pinyi keu shekha tsala ikhilu,

¹⁰eno tishiwo thoghiu, aqhi akutsuniulo atsala muku akuthuni no Solomon no timiqo akilo puwoke. AMPEU no kukumgha kumtsu pesu pawu timi Israilmi lau, David lau eno Solomon lau tsuke ghenguno timiqoye ighono alokivi shive.

¹¹Akukau Solomon no Achineki ngo kukaki shikhaluve, pano tipaqo ghenguno pa kukughu shikeu kumtsu kupukulai shiluve kelo,

¹²AMPEU no putho lono pa lau ipeghi. Pano Solomon vilo pi, “Ino okukhu kighini chiluvae eno Achineki hipau lono ilau aghakishi mlla penikeu a shi ino ikhiluve tsuae.

¹³Kugho kughomu ino tsughuqhi pemoveni momu tulhaqu puwu puzu axatsuni chuve peni momu iwu timiqo shou asagha puwuni keno,

¹⁴tsala iwu timi ijeku chekeqono kuchunuluno inikhu iphu ighilu eno panongu lhoksakugha lono ide ighi aye, ino kungugha lono panongu kighini chilu tsuno panongu xine qhivetsuni eno panongu yeghi shipivive tsunani.

¹⁵Ino Achineki hipau khekuto anani eno hilehino inikhu keu kighini kumtsu initsuni ke kutope ani,

¹⁶kughengu hipa-a lono pulhapuju imla che peni keu shi ino kishelu eno akimthe shi hipa-a ikhi phetsu keu ke. Ino hipa shou jukhe anani eno ado kumtsulo hipau susho anani.

¹⁷Nono opu David no shike toi iyezah gholu eno ino ovilo ahza tsuve keu thwokha kumtsu shilu puzu amikucho shi iqe aye,

¹⁸ino opu David lau piqhive keu tsa ino qhi nanike, tiye Israil lo pulhapuju pa polokughukomi no ayehpe nani kepi ino pa vilo pipuani ke.

¹⁹Ikemu no eno owu timiqono ino nongu tsukeu yezah ngo ahzaqo hebideveno kutau lhouqo mllawuve aye,

²⁰tileno ino nongu tsupua keu yeghi lono nongu ikhive nani eno imlla penike-a lakhi likhi ino shikimthe pesu ikhilu keu Achineki hipau ino qhive nani. Aqha kumtsulo timiqono hipau thaigha eno kutha kughapu shi hipau peitha nanike.

²¹“Achineki khikhi itehi ighono gihu anikeno tipa ghulokilo ye tipau vechewu chekemi lakhikhino akumzaqhiyive no ishi iniju nani, ‘AMPEU ye kushiye ayeghi hipau shou eno Achineki hipau shou hitoi shive kya?’

²²Timiqono khochile nani, ‘Hiye kutau lono kumono panonguno AMPEU panoqo Lhou khuu no Ijip lono pano puasuqo saipeghi keno tipau pheve keu ghenguno ke. Panonguno kutau lhouqo lau kutshukime luve eno tipaqo mllauve ke. Highenguno AMPEU no panoqo shou kutsakungo keu hipau sughiveke.’ ”