Read Sumi Naga YEKIKITHI AKINIU 8 Bible Online

YEKIKITHI AKINIU 8 - Sumi Naga bible

YEKIKITHI AKINIU 8

¹Solomon ye Achineki ngo pa kukaki shi keulo ampe muku luve.

²Akukau Hiram no patsu keu phughiqo ghi pano shikitheluve eno Israilmi pelo ngo penike tilau puwu.

³Pano Hamat ngo Zoba ghakhuqha ghi haphe luve

⁴eno asayeqhalo Palmira phughi aliwo putukhalu. Pano Hamat lo aphughiqo kumtsu shikithelu, tipaqoye tinhemgha ngo kuchukini kike eno kiyepuwu keu phughiqo shi acheke.

⁵Solomon no aphughi hipaqo ghi shikithe ke: Bet Horon Lashou ngo Bet Horon Chhiliu (Aliwo putukha keu eno akhadu pe khathalu keu phughiqo ke),

⁶Ba lat phughi, pano khilehi kuchukini kike eno kiyepuwuche keno tipaqo phughi kumtsu eno khilehi pano pawu khurshi ngo khurkulu qhiche keu phughiqo. Jerusalem lo ngo Libanon eno pano ayehpe akeu qhalo aki kuloghi ghenguno pano akukughu shikeu kumtsu pano shiqhilu.

⁷Israilmino ayeghi luveke ghulokilo Kananmi khijehi heqhimove keno tipaqo kughukomi kumtsu Solomon no pesu anguka lono akumla shipenike peitha. Tipaqo gholo Hatimi, Amarimi, Perizimi, Havimi eno Jebusimi ghi ke, tipaqo laghaye itehi kutolo aquaxemi shi achenike.

⁹Israilmi ye akuaghashi akumla shikeulo peithamo ke ikemu ghushimi, kijemi, khurkulu peithakutsumi eno khurshi ghushimi kumlaqo shicheke.

¹⁰Aki jeli shikeu kumla lo akuaghashi akumla shi achekemi shou kijemi 250 ake.

¹¹Solomon no pa nipu Ijip kukau nonga, David phughi lono pekiqe sasu pano li ghenguno shitsu keu ki lakhilo sawuve. Pano pi, “Liye Israil lo Akukau David wu akuka kilo ngo kepu kumoe kughengu a-a khile khile pinamu Puloshoqhi Bohu ache keuye akimthe ke.”

¹²Solomon no Achineki gizulo pano akiptia shi puakeu lono agha shikeu pesu AMPEU lau mllake.

¹³Muse Yehza lo shilo pi puakeu kiqi lono akimthe tsala lakhi khilo pano piti mlla keu gho pesu mllake: Sabat pinyeqo, Aqhi Kithe Pinyeqo eno ampe lakhilo apine kuthuqo - Kholaqhi peithamo keu pine.

¹⁴Papu David no ayeh kithipe qhitsu keu papeghi pano achinemi ngo achinemi kuphu chekemi Levimi kumla kishekulu kithikiyi shitsu ke, tiye ale phekeu lo eno panoqo kumla mla keulo. Alhou wu timi David no ahza tsukeu kiqi lono pano achineki khemiqo pelo ghi amqo amqo shi puzu pututa shelo khagho lakhi khilo tsalakipe kumlapu saje kutotsu ke.

¹⁵David no achinemi ngo Levimi pelo pekutsukiqo ngo kutauqo vehulo akukutsutsa tsupua keu apasu shi shipeke.

¹⁶Tishi tave kethiu Solomon kukughu kumtsu shiqhiluve. AMPEU Achine ki boqha qhakeu lono tipau shi qhiluve ke kutolo akumla kumtsu achipi lono tokulu shilu.

¹⁷Tipathiu Solomon no Aqaba Zucheku mukulo ashuka ngoche keu Eziongeber ngo Elath lo wu, tiye Edom ghakhulo ke.

¹⁸Akukau Hiram no pawu kijemi zah kutsu qholono eno puju shijuve kemi ashuka kusamino peithape puzu Solomon lau ashukakiqo tsupuwu. Panonguno Solomon wu kijemi gholo Ofir ghakhulo wu eno tilauno shuna kilogram 15,000 nguno alau shughitsu.