Read Sumi Naga EZRA 7 Bible Online

EZRA 7 - Sumi Naga bible

EZRA 7

¹Ampe kusho wove kethiu Persia lo Ahaserus no akukatou shi akelo timi lakhi Ezra ipikeu ache. Pasuye achinetou Aron launo hitoi ikoighike: Ezra ye Seria nu Seria ye Azaria nu Azaria ye Hilkiya nu Hilkiya ye Shalum nu Shalum ye Zadok nu Zadok ye Ahitub nu Ahitub ye Amaria nu Amaria ye Azaria nu Azaria ye Meraiot nu Meraiot ye Uzi nu Uzi ye Buki nu Buki ye Abishua nu Abishua ye Eleazar nu Eleazar ye Aron Achinetou nu.

⁶Hi Ezra ye Babilon lono wuke; paye Judami sakiphemi lakhi eno paye AMPEU Israil Lhou no tsukeu Muse Yezah akiyemi lakhi shia eno pano Jerusalem lo idewoni keu iniju eno akukauno pa kukhu initsu.

⁷Ahaserus akukauno kawo ampe akutsuniu lo Israilmi khami, achinemi khami Levi lagha alekiphemi eno ahukikha khemi eno achinekilo akumlamiqo Ezra no sasu Jerusalem lowu.

⁸Akukauno kakeu ampe akutsuniulo aqhi apunguu lono pano Jerusalem lo ighi,

⁹Alhou kukuphu vechewo panonguno aqhi atughiulo atsala atughunino Babilon lono chesu wuveno aqhi apunguulo atsala atughuniye Jerusalem toluve.

¹⁰Ezra no amlo tsuqhiyi AMPEU yezah phi eno pelunike pulolu eno puloshoqhi kukutsu eno tipa yezahqo pe Israilmi kutsunikeu shi.

¹¹akukatou Ahaserus no kaku hipau pesu achineu Ezra, khuuno AMPEU no Israilmi lau ayezah eno ahzaqo tsukeno tipau akivishi ithi akeu lau tsue:

¹²“Akukatou Ahaserus launo achineu Ezra Kungugha Lhou yezah kighithiu tsuani.

¹³“Ikuka ghakhulo Israilmi kumtsu, achinemi eno Levimi khunoqo ogholo Jerusalem lo wunishikeqo wulupenike ino ahza tsu ani.

¹⁴Ni, eno igholo iwu akukutsumi tsunino nongu pelo Jerusalem eno Juda lo kiutoi anikeno phukide kudai jupenike eno nongu Lhou yezah khikhi nongu shou pichetsu keno akivishi pelu anikeo mokeno phujulo.

¹⁵Nonguye shuna eno tsandiyi kumllaghoqo khikhi ino eno iwu akukutsumino Israil Lhou khuu chinekiye Jerusalem lo anikeno tipaulo tsupuwu niye akeu nongu gholo pesu wulo.”

¹⁶Nonguye tinguno alaughi Babilon ghakhu lono qhakutsulu keu tsandiyi eno shuna ngo Israilmi eno panongu chinemiqono Jerusalem lo panongu Lhou Achine ki ghenguno akumllagho sutsukeu kumtsu pesu wulo.

¹⁷“Nonguye ighono kutokupui shi pisa hipaqo peithalo eno amshitsu, bheritsu, bheriti, athi, eno aji ishi qhuno Jerusalem lo akumlla kipti-a lo pesu mllalo.

¹⁸Tsandiyi ngo shuna achili shilu keu pesu noghakhumi no pulokeu eno Alhou pulou lono peithalu nani.

¹⁹Jerusalem lo Achineki hoholo peithapeniye akhu ajukhu otsu puwukeu pesu Alhou gizulo qhitsulo.

²⁰Ipuzu Achineki ghenguno kiu kiumu avehupu shi aghiaye akukau kini bohu lono khulu nani.”

²¹“Eufrati kulola ghakhulo akukau, kinibo peithakemi pelono Ezra, achineu eno Kughugha Lhou Yezah kighithiuno khukeu kumtsu,

²²tsandiyi kilogram 3,400 kutolo, asho thi kilogram 10,000 aji liter 2,000, oliv teli liter 2,000, eno amiti ghi lunishi ke thaqhu tsupenike pai kuphu tsupenike ni Ahaserus no ahza tsu ani.

²³Kungugha Lhou no pa chineki ghenguno kiu avehupu shi aghini keno kumtsu nonguno tsulo, tishianguno pa pelono ilau momu khukhu uno ithiu ka pinamu agha idepemo kepu shilo.

²⁴Nonguye Achinemi, Levimi, ale phemi, aghukhemi, akumla kishimi momu Achineki lo kutshukimepe mla akemi lau kiu kiu zahme mu qhakevilo.

²⁵‘No, Ezra, oLhou no alokutsu otsukeu peitha puzu Eufrati kulola ghakhulo akemi noLhou yezah qhoqhughi xuche kemi shou ayeh pepenike ghenguno Ayehkipemi eno xakuthami sukusu shilo. Noye khunono Ayezah mthakeno tipaqo shikalo.

²⁶Tsala khuu khumu oLhou yezah hebide momu akuka yezah hebide keuye anile lono aghime tsuveghi shilo: ike tiye akithi mu, hapupoveni mu momu pa nhemghaqo khathaluvelo moaye kugha pesu akughu shivelo.’ ”

²⁷Ezra no pi, “AMPEU sheqhelo, paye nipuasu Lhou ke! Pano akukatou pelo hikithipu shi Jerusalem lo AMPEU chineki gihunikeu pulolu peke.

²⁸Alhou kukupu lono akukatou ngo pawu kijemi akhotomi eno pawu akukumsu kutsumi akhotomi zulo niye amlo kiqipu shilu peke; AMPEU iLhou no amlo kuloghi itsu puzu Israil laghalo atomi kutomo pelo igholono ideighilu penike ino panoqo putsaqhilu peke.”