Read Sumi Naga NEHEMIA 12 Bible Online

NEHEMIA 12 - Sumi Naga bible

NEHEMIA 12

¹Hi aqhou kithikiyi yepuakeuye akughu lono ideighikemiqo ke:

²Achinemi: Seraia, Jeremia, Ezra, Amaria, Maluk, Hatus, Shekania, Rehum, Meremot, Iddo, Ginethoi, Abija Mijamin, Maadia, Bilga, Shemaia, Joiarib, Jedaia, Salu, Amuk, Hilkia eno Jedaia. Timi hipaqono Joshua ghulokilo pano kusami achinemi gholo sakiphemiqoke.

⁸Levimi: Timi hipaqono shikimthi keu le kiphelo atsukupumi ke: Jeshua, Binui, Kadmiel, Sherebia, Juda eno Matania.

⁹Hipaqono khokichile lephe ghenguno amqo shikeu: Bakbukia, Uni eno pano kusami Levimiqo.

¹⁰Joshua ye Joiakim papuke; Joiakim ye Eliashib papu ke; Eliashib ye Joiada papu ke;

¹¹Joiada ye Jonathan papu ke; eno Jonathan ye Jadua papu ke.

¹²Kughono Joiakim no Achinetou shi akeno achinemi hipaqono achine limi shou akutsu shi ake: [Achineu] — [Alimi] Meraia — Seraia Hanania — Jeremia Meshulam — Ezra Johohanan — Amaria Jonathan — Majuki Josef — Shebania Adna — Harim Helkai — Merailt Zekharia — Iddo Meshulam — Ginethon Zikhri — Abija …[2] — Mimamin Piltai — Moadia Shamua — Bilga Jehonathan — Shemaia Matenai — Joiarib Uzi — Jedaia Kalai — Salai Eber — Amuk Hashabia — Hilkia Nethanel — Jedaia

²²Achinetomi hipaqo kuxu tivilo Levi kibolomi ngo achinemi kibolomi qolo atomi yekithi kaku qhipuatsu che: Eliashib, Joiada, Jonathan eno Jadua. Kughou Darus no Persia lo akukatou shi akeno tileno yekithi kaku hipau ashetove.

²³Levi kibolo atomi qoye akhoto kakulo yekithi keu likhi shiche eno tiye Eliashib tinu Jonathan kutolo tishike.

²⁴Hashabia, Sherebai, Jeshua, Binui eno Kadmiel no mijetsukeu qholono Levimiye amqoshi kithikithewo. Amqo kinino kivetsughu ghi Alhou sheqhe eno pa shikimthi cheke, tiye akukau David Alhou wu timino kichepiye keu kiqi lono shike.

²⁵Achineki khemi hipaqono khaghoqolo anhemgha kiqhia lono Achineki kutolo khekuto nikeu makho puke: Matania, Bakbukia, Obadia, Meshulam, Talmon eno Akub.

²⁶Timi hipaqoye Joshua nu eno Jehozadak tinu Joiakim ghulokilo eno Nehemia no ahng shiake ghulokilo eno Ayezah kighithiu achineu Ezra ghulokilo xu achekemiqoke.

²⁷Kughou Jerusalem phughi kupuwu shikimthe keno Levimi a-a kututalo akemi saighi eno panongu pelo shikimthikeu leqo alebo eno akighilebo lono ale phepe shikimthe ke.

²⁸Levimi kibo gholo ale kiphemiqono Jerusalem sukumxalo eno Netofa taun sukumxalo kughuna achekeu lono ighino kumqolu,

²⁹Bethgilgal, Geba eno Azmavet lono ighieno kumqolu.

³⁰Achinemi ngo Levimino pano likhi pano ghengu, timiqo ghengu, khaghoqo eno aphughi kupuwu ghenguno aphi kimthe chine chinilu.

³¹Ino Juda lo sakiphemi sawo akupuwu kutsuqalo kumqolupe eno panongu pelo Alhou shikimthi ghi aphughi homxani kemi amqo kijeje kini shou ampemi shipe. Atughiu muqono akupuwu kunguuno ajeu kudau chesu Xinexugha Khagho kudau wupe.

³²Hoshaia ye ale kiphemi thiu cheche, Juda lo sakiphemi tuxano pa papeche.

³³Achinemi hipaqono afuko igha pa shelo shiche: Azaria, Ezra, Meshulam, Juda, Benjamin, Shemaia eno Jeremia. Tipashelo Zekharia ighi, paye Jonathan eno Shamaia tinu ke. (Pa puasuye Matania, Mikaia eno Asap laghalo Zakur.)

³⁶Pano limi kutamiqono pa papecheke, Shemaia, Azarel, Milalai, Gilalai, Maai, Nethanel, Juda eno Hanani, panoqo kumtsu akukau David, Alhou wu timi huno pechekeu lebo kimihi pecheke. Akighithiu Ezra no hipaqo shekujojo chekeu tughiu shicheke.

³⁷Azupuki Khagho lo panonguno David phughilo anepa iqhochekeulo cheiqho eno David kukaki vechesu Azu Khagho ti aphughi kipelau akeulo akupuwulo wuve.

³⁸Shikimthikeu muqo kutau lakhiu huno akupuwu kutsuqa lono piyiu kudau chesuwu eno ino timi amqo tuxaqo sasu papeke. Ninguno Amphoki Qoki hechesu Qhaghalaikeu Khagholo wu,

³⁹eno tilauno ninguye Efraim Khagho ngo Aqau Khagho, Akha Khagho, Hananel Qoki, Aqhe Qoki vechesu Bheri Khagholo wu. Ninguye Achineki khagho phivi lono kishekhave.

⁴⁰Tishi kehu shikimthi akeu muqo kinikujo Achineki qhalo wo toluve. Igholo chekemi sakiphemi nguno alau ghi

⁴¹iqomi gholo achinemi hipaqono afuko ighache: Eliakim, Maaseia, Miniamin, Mikaia, Elioenai, Zekharia eno Hanania;

⁴²eno panongu pape chekeqono, Maaseia, Shemaia, Eleazer, Uzi Jehohanan, Malkhija, Elam eno Ezer. Ale kiphemiqoye Jezrahia no sakipheu shi puzu panoqo sutsa kumgha lono ale pheke.

⁴³Tipa tsalani aghakishi kutomo pesu tsuke eno timi qono alokivino chhitoi ake kughengu Alhou no panongu loshipivi tsu ake. Totimi ngo atinuliqo ghi tipau pinye lo sukuqha no asutsa mubumughu ake hu putou ghi panoqo sutsa chiluke.

⁴⁴Tipa ghulokilo achineki ghenguno tuqhatuzu qhiche keu anhemgha kiqhia jukutsuni kemi timi ache, tile chighi saje eno ampelo amsu-u tuxatini eno axathi nivekeu xotughiu pe sucheke. Timi tipaqono achinemi ngo Levimi ghenguno tuqhatuzu tsukeu aphughi kupunulo alu kichimi launo qhanikeu makho puche, tiye Ayezah lono tipau avehupu shi akeu pipuake. Judami kumtsuno achinemi ngo Levimi shou amloqi ache,

⁴⁵kughengu panonguno shikimthe keu pinyeqo hu eno kutau akimthe yeh Alhou no ahza tsukeqo peitha cheke. Achinekilo alekiphemi eno achineki khemi ghi akukau David ngo panu Solomon no ayezah tsukeqo kiqi lono panongu kumlapu saje mlacheke.

⁴⁶Akukau David ghuloki lono eno Asap no ale kiphemi shichekeu ado kushuwa shive kethiuno, alekiphemi no Alhou kishele eno Alhou shikimthi keu kishele saphetsuke.

⁴⁷Zerubabel ngo Nehemia ghulokilo ale kiphemi ngo achinekilo akhemi kuphunike ghenguno atsalalo agho pe tsuche. Timi qono akimthe gho pe Levimi tsuche eno Levimino tsukepu saje pesu achinemi tsu cheke.