Read Sumi Naga NEHEMIA 5 Bible Online

NEHEMIA 5 - Sumi Naga bible

NEHEMIA 5

¹Tithikhau kiptimi totimi kutomono pano thikuzumi Judami shou nhenheshi ithughive.

²Khamino pi, “Nibolomiye kutomo xu anike ghenguno achuqupu avehupu shi anie.”

³Kutamiqono pi, “Nino xu amaye sake ghenguno niluqa, atsailu eno akiqo pe atheli shighi achuqupu lupua khanie.”

⁴Itaghi kutami ghi ishi pi, “Nino ni kialuqo eno atsailu ghenguno akukau lau zahme tsuniye pisa napuanie.

⁵Nithikuzumi Judami sasu ningu ghi ashiayeh lakhie. Ni tinuliqoye pano tinuli sasu aphiphi kumoke sha? Tishimu ningu tinuli pe aqemi shive anie. Ningaqo khamiye aqemi toi jesuvae. Ningu lu eno atsailuqo ningu launo suwuve tsupuzu ninguye athokha shivae.”

⁶Kughou ino panongu kumchho chilu keno imlo ideve no

⁷kumsuluve. Ino sakiphemi, hiyam lo kumlami saighino panongu sakiyi ghi pi, “Nonguye nongu thikuzumi qhasupe anie!” Tipau vehu phujupenike ino mishi hoho lakhi kusuno

⁸pi, “Kutolukivi thaqhu ninguno ni thikuzumi pano likhi pano pe inaghami ulo jesu puakeqo qhuchileluve anie. Ikemu nonguye nolikhi nothikuzumi pe inaghami ulo jesu vekeu qhuchile sawo angka lono ni ulo jesuve niye shi anie.” Sakiphemiqoye inaqhoive eno kiumu pikepu kuhave.

⁹Tithiu ino pi, “Nonguno kiu shi ani keno tiye kuqu anie! Nonguye Alhou msa kepue eno kiu achipi keno shikepue. Tishi aye nonguye nighumi Judakumomi pelo kiu lonomu ningu thaigha pemo nike.

¹⁰Ni, ikusamiqo eno iqemiqo launo timiqono pisa eno athi nalu puani. Itehi ninguno panongu lau akuna kighishe qhive tsuni.

¹¹Olau api puakeqo pisa, athi, aji eno oliv teli akeqo qhivetsulo. Panongu lu, atsailu, oliv xathi ghutuqo eno akiqo tsuchilevelo.”

¹²Sakiphemino khochile, “Nono pike toi nino tishinie. Nino anhemghaqo tsuchilevenie eno apiqo lutsumoni ke pukaputsanie.” Ino achinemi kusu eno sakiphemi pelo panongu gizu lono panonguno piqhivekeu shikupu penike tushoqhive pe.

¹³Tithiu ino apokha yi kuqhopheno sukinighi pi, “Hitoi khuno nongu shoqhi qhimoveni keno Alhou no ishi nongu no pighi akeu kumtsu pewuveno kiumu qhipe nongu tsumove nanie.” Tilehi ngo akemi kumtsuno pi, “Amen!” eno AMPEU akishe tsu. Sakiphemino panongu shoqhi peluke.

¹⁴Juda yeghilo ino ampe chighikini ahng shi akelo, ti Ahaserus no akukatou shikeu ampe amkuu lono shighi akiniu kutolo ni eno isholokumiqoye ahng kiqi lono chushomono ache.

¹⁵Izuu ahng shi ikighimiye timiqo ghimeqhi cheke, achuqupu eno aji ghenguno atsalalo tsandiyi lhobidi khuche. Panongu qemi thotsu timiqo qhasupe acheke. Ikemu niye titoi shimoe, kughengu niye Alhou msa che.

¹⁶Ino ikuka kumtsu pe akupuwu mlakithe eno kiu ki-alu mu lutsumoe. Ighenguno mla akemi kumtsuno mla kithekeulo kuqhano mlake.

¹⁷Ino ighulhu Judami eno pano sakiphemi 150 ye tamomitheno kughulhu cheke, tinguno alau ghi timi iputsaniye hokumxa yeghi lono ighikeqo shiyeh ghi tsucheke.

¹⁸Tsalakipetsu niye amshitsu tsugho, bheri akiviuqo gholono tsugho eno awu chighi heqhi che eno atsala chighi ghilo aji kithe jeche ke. Ikemu timiqono kiu toi aghime kumla shi akeno ino ithi akehu niye ahng no atsalalo kiu lukepu keno timu khumoe.

¹⁹Ino ovilo khu anike, O Alhou, timi hipaqo ghenguno kiu mlatsu keno ti kumsulu tsulo.