Read Sumi Naga NEHEMIA 6 Bible Online

NEHEMIA 6 - Sumi Naga bible

NEHEMIA 6

¹Ninguye khagho laghilo khaghoqo mlalu mphiamu Sanbalat, Tobia, Geshem eno nighumi kutamiqono ninguye akupuwu hu mlaqhive pi chiluve eno mlamokeu do kuhave api chiluve aghi.

²Tighenguno Sanbalat ngo Geshem pamano ilau asutsa lakhi sughi eno ivilo aphu lakhi Ono Ghakhuqa lono pama sasu kusholepi pi puwu. Tiye ishipusani keu muqu panonguno kuchughu keu lakhike.

³Panongu vilo piwu peniaye atsapemi hapuwuno ishi pipe, “Niye akumla akhoto shianie eno niye tilau iqighi mlae. Niye wuno okujo sasu kushonike ghenguno akumla lakhave mlake.”

⁴Pamano tipau sutsa ghuthu bidi ilau puwu eno ti kumtsu ino aphiphi shi khochileve.

⁵Tithiu Sanbalat no paqeu hape ilau asutsa apunguu peighi, tiye mekhamokeu yekili lakhike.

⁶Hitoi yeke: “Geshem no ivilo pike akisughumi timiqo dolo uyeu tsa lakhi pi akeuno no eno Judamiqono kupuna niye ani eno tighenguno noye Jerusalem kupuwu mlakithe anie pi anie. Pano highi pike noye oku toshino kaniye akupughu shi anie pike

⁷eno nono tungkupmi khami pelo noye Juda lo akukau kepi asheshu peniye kishekulu shiva pike. Akiqheu kukauno tipau sutsa tsaqui chilunishi anie, tighenguno ikujo kushono tipa ghili kuptsani kepi ikukumsu tsuju anie.”

⁸Ino khokichile lakhi pa lau ishi pi puwu, “Nono piakeu kiumu kuchou kumoe. Olikhi okutoshino iqiphe keu tsa ke.”

⁹Panonguno ni shikumsano ni kumla lakhaniye pukaputsa ke. Ino ishi inikhu, “Ikemu Alhou, itehi ishikumto tsulo!”

¹⁰Tipa ghulokilo niye Mehetabel tilimi Delaia nu Shemaia putsaniye wuke, paye aki khathape ipemlano ae. Pano ivilo pi, “Nikujoye wuveno achinekilo Akimthe-A lo itshuluve masae eno ahukikhaqo khavenie, kughengu panonguye opithive nike chenie. Kugho kughomu putho tsala lakhilo opithive nike ighi nanie.”

¹¹Ino ishi pa khochile, “Niye titoi poveno itshuwuve nikemi kumoe. Noye ino ikuxu pukhaniye pukaputsano achinekilo itshuwuve nani pi kumsu ani kesha? Niye tishi moke.”

¹²Ino tipau kumsu kideju kelo Alhou ye Shemaia putsamo kepu phulue ikemu Tobia ngo Sanbalat pamano hipau ikutughutsu peniye kulugho pa tsuve kepi phulu.

¹³Pamano pa piqepe ishi kumsa eno ipelo axine shive peniye shike. Tishieno ije shipsave tsuniye eno ishiputha niye shike.

¹⁴Ino ishi inikhu, “O Alhou, Tobia ngo Sanbalat pama no kiu mlave keno ithino pama ghimelo. Ti atotiu Nodia ngo tungkupumi kutamiqono ishikumsaniye pukaputsa keqo ghimelo.”

¹⁵Atsala lhopungu kini mlave kethiu akupuwu kumla kumtsu Elul qhi atsala muku apungunino mlaqhive.

¹⁶Kughou ashiayeh ni hokumxalo kuami nighumiqono ti chilu keno panonguye kujove kughengu akumla huye Alhou kukuphu lono mlave kepi panonguno ithive.

¹⁷Tipa ghulokilo Judami sakiphemiye Tobia lau kaku yekili che.

¹⁸Juda lo timi kutomono pa kudau ache kughengu Ara nu Shekania no pa ngukishiu shi ae. Tinguno alau ghi panu Jehohanan no Berekhia nu Meshulam nonga luke.

¹⁹Timiqono igizulo Tobia kumla kivi kutomo piche eno ino pikeu tsa kumtsu pa vilo piveche. Pano ishi kumsaniye tamono ilau yekili yeche.