Read Sumi Naga NEHEMIA 9 Bible Online

NEHEMIA 9 - Sumi Naga bible

NEHEMIA 9

¹Tipau qhi atsala muku abidiulo Israilmino panongu xine ghenguno amlo ghime piyenike kumvu nike kuho kumqolu. Panonguye inaghami launo panoqo kutashi luve. Panonguno yeqhiyephi uluveno amlo ghime michishi ayeghi mukhu pe akutsulo ebeluve. Tishieno panonguno puthughono panongu eno pano puasuno axine shivekeqo piphe thuve.

³Ayi kihedo kuthu kutolo panongu Lhou AMPEU Yehza phipe panongu piye eno tipa shelo ayi kihedo kuthuye panonguno pano xine piphe eno pano Lhou AMPEU mllake.

⁴Tile Levimi ghenguno akhache kighe lakhi ae eno tilehi Jeshua, Bani, Kadmiel, Shebania, Buni, Sherebia, Bani eno Chenani noqono puthugho. Panonguno ighono igha pano Lhou AMPEU lau inikhuke.

⁵Levimi hipaqo pelo mlla penike kusu: Jeshua, Kadmiel, Bani, Hashebenia, Sherebia, Hodia, Shebania eno Pethahia. Panonguno ishi pi, “Puthugholo eno AMPEU nongu Lhou shelo; alhokupujulo pa sheqhelo! Kumtsuno pa jekipi je sheqhelo, timi jelino sheqhe namu lukumkha kumoe.”

⁶Tishieno Israilmino hitoi inikhu: “AMPEU, olikhino AMPEU ke; nono kungugha ngo atsutsulo ayepuqo lhoke. Nono ayeghi ngo azughi eno tipa qolo akeu kumtsu lhoke; nono kumtsu lau akuxupu tsuke. Kungughalo akuka jelino itsaiqi omllake.

⁷AMPEU Alhou no Abram kishelu eno Babilon lo Ur lono pa saighike; nono pa je Abraham kukideve tsue.

⁸Paye olau amikucho shikeu nono phuluke, eno nono pa sasu puloshoqhi shike. Nono Kananmi yeghi pa tsunikeu shi tushoqhike, Hatimi yeghi, Amarimi yeghi, Perizimi yeghi, Jebusimi yeghi eno Girgashimi yeghi tsuni keu shi tushoqhi ke, Pa laghami pelo ngo chepe nikeu yeghi shitsu ke. Nono amikucho kehu oshoqhi peluke.

⁹‘Nipuasuqoye Ijip lo kishishi aghime shive keno nono ithuluve; Akuhu Zughilo panonguno kuphulepi ighakeu nono chilutsuke.

¹⁰Nono Akukau shou akumzapu kumla mlae, pawu kijemi eno pa yeghilo kuami shou, kughengu panonguno kishishi owu timiqo nedaqoda che keno nono ithie. Nono ishi tsalalo ojekipi aketoi tipa ghuloki loghi nono toluke.

¹¹Nono owu timiqo ghenguno azughi kijevetsu eno ayeghi qhaikeulo nepukughi azughi mta lono nono panoqo sawuke. Khunoqono panongu ha ighi keno azu kutholo putsuqhive, tiye atu lakhi azu kighidelo ikiqi iloveke toike.

¹²Khungkusu tsukucho lakhi pe nono panoqo nhape sawu, eno putholo nono ami tsukucho pesu panongu la yepuvutsu.

¹³Sinai Toghilo nono khungkusu lono iqighike; nono owu timiqo putsa eno ayezah kivi ngo akukutsu tsa kivi panongu tsuke.

¹⁴Owu Sabat pinye akimthe shi pepenike nono panoqo shikae, eno oqeu Muse vechewo nono oyezahqo panongu tsue.

¹⁵“Panonguno mzuthive kelo nono kungugha lono asho panongu tsue, eno panonguno tughuthive kelo atuqu lakhi lono azu tsuke. Nono panongu tsunike tushoqhive ke yeghi hu panongu vilo qhasuluvelo pike.

¹⁶Ikemu nipuasuqono qhezauve, hebidewuve eno oyezahqo gholumo no milive.

¹⁷Panonguno agholumove, nono shitsukeqo kumtsu kumsu mave; nono akumzapu kumla shikeqo panonguno kumsumave. Panongu qhekuza launo pano sakipheu kisheluve eno panongu sachile sasu Ijip lo aquaxe shive peniye kughu. Ikemu noye axine qhivekutsu Lhou ke; noye kupukini eno kimiye kiniu, asheshino amlo ide kicheuke. Okikimiye ye kije ke, noye panongu phevemoke.

¹⁸Panonguno mlla kepu julho lakhi amshitsu toi shipe qhi eno tipauno Ijip lono panoqo saipeghi keu Lhou huke ipiuve! AMPEU, panonguno kiutoi othaigha kela!

¹⁹Ikemu noye asayeqhalo panongu qhivemoke, kughengu owu iqemokeu kikimiye kijeke. Noye khungkusu momu ami tsukucho khipaqono putho pucho panongu la piye chekeno tipau ikhi suwutsu moe.

²⁰Nono akivi ke ghenguno panonguye kiu shikepu keno panongu vilo pitsuke; Nono mana pe panongu loji eno panongu pelo azu yelu peke.

²¹Asayeqhalo ampe lhobidi dolo panonguno avehupu shikeu kumtsu nono tsucheke; panongu phiminiye khilemu aqa shivemoe, eno panongu pukhuqoye suke launo ingughui keu shimoe.

²²‘Nono panoqo pelo ashiayehqo, akukaqha eno pano yeghi sumxape akeqo leluvepe. Panonguno Sihon no ayehpe chekeu yeghi Bashan leluvepe ke.

²³Atsutsulo ayepu jejehi nono atianuli kutomo pesu panongu tsuke, panongu pelo ayeghi leluve eno kughunaluve pe tipauye nono panongu tsuniepi pano puasu qo lau tushoqhive keuke.

²⁴Panonguno Kanan yeghi leluve; nono tile aghikemiqo shou tokulu shike. Nono owu timiqo pelo Kanan lo akemi ngo kukami pesu kishi peithape nishi keno shilu penike akuka tsue.

²⁵Owu timiqono aliwo kuptu phughi qo ngo aghuma yeghi eno aki kinikuluno chhitoi akeu, azukikhe chhupua ghive keu, olivsubo, axathibo eno atsayiluqo halelue. Panonguno chunishi ketoi chu puzu aquchhibo chhileilu; nono akivi nhemgha panongu tsukeu pesu alokughuno shilu.

²⁶“Ikemu owu timiqoye ohebide eno ogholumove; panonguye oyezah pe pano thikhau qhive. Panongu vilo olau ideghilo pike ghenguno panongu kutughutsukemi tungkupmi pithivetsu. Panonguno anguno anguno othaighake,

²⁷Tighenguno nono pano ghumi pelo panongu leluveno pano shou ayeh peuve pe. Panongu ghimelo kuphu lepi ovilo khu, eno nono kungugha lono khochile tsuke. Okikimiye kije lono nono sakiphemi panongu lau tsuke tipaqono aghumi launo panoqo xaphelu.

²⁸Kughou iqughaiveni keno panonguno itaghi axine shikithe, eno nono pano ghumi pelo itaghi panongu leluvepe. Tishimu panonguno xaide ghiveno panoqo xalu tsu lepi ovilo khu keulo, kungugha lono nono chilutsu eno tamono nono owu kukupu kije lono panoqo xalutsue.

²⁹Okukutsu tsa gholupe niye nono panoqo kutughuke, ikemu panonguno aqhekuza shi ozahqo milivetsu ke, tishi pinamu oyezah pelukeulo akuxupu la anike. Panonguno kuthovi puzu agholumo kepi milive ke.

³⁰Ampe atsutsulo nono kheakulu shi panongu kutughu cheke. Nono owu tungkupmi lolo muzusutsuno pipecheke, ikemu owu timiqoye akini ipoke, tighenguno nono kutami shiyeh pelo panoqo leluve peke.

³¹Tishimu okikimiye ye kije kehu noye panoqo qhivemoe momu panoqo pughave moe. Noye kupukini eno kimiyekini Lhou ke!”

³²“O Alhou, noye kiu toi kije kela! Kishi akuighupu eno akuka kughushu kela! Noye akikhishi owu puloshoqhi shikeulo piqhive keu pelu achenike. Asiriya kukamino nedaqoda cheke ghuloki lono ishi kutolo ninguye shishe imeve ake! Niwu kukami, sakiphemi, achinemi eno tungkupmi, nipuasuqo eno niwu timi kumtsu aghime shivae. Ninguye kishi aghime shive akeno kumsulu tsulo!

³³Noye nighimeqhi keu achipike, ninguno axine shivekemu noye pukhukulushike.

³⁴Nipuasuqo, niwu kukami, sakiphemi eno achinemino oyezah pelumo ke. Panonguye nono ahza tsukeu eno kutughu keu tsa ini tsumo ke.

³⁵Owu kukumgha pesu kukamino owu timiqo shou ayeh pecheke, tiye nono panoqo tsukeu aqha kuloghi eno aghuma kua yeghilo tishi cheke; ikemu panonguno axine launo xaideghi puzu oqenikeu shimlave ke.

³⁶Itehi ninguye nono tsukeu aghuma yeghi hipau achuqupu nitsuche keu yeghilo ninguye aqemi shi auvae.

³⁷Ninguno axine shiveke ghenguno ayeghi lono kiu ipeghi keno tiye nono nishou qhipuatsu kemi kukami tsukhave cheni. Panoqono ningu eno nimishiqo pesu panono pulokeu shiauve ani, eno ninguye aghime kutholo anie! “

³⁸Hipaqo kumtsu ghenguno Israilmino mutsumishei keu puloshoqhi hi yehpe qhilu ani, eno niwu sakiphemi, Levimi eno achinemino jemchi chishipuku ani.