Read Sumi Naga ESTHER 1 Bible Online

ESTHER 1 - Sumi Naga bible

ESTHER 1

¹India lono Ethiopia kuto ayeghiqha 127 shou akukau Ahaserus no ka ache.

²Tipa ghulokilo akukau Ahaserus no kawo ampe kuthu shi akelono Shusa phughilo ayehpemi eno pa gholo kukami kijemi eno aqemi kutomo kusuno aghulhu shi.

⁴Aghulhu tipau ajekipishi atsala 180 kutolo kuakini kuthole shilu.

⁵Tishikhave kethiu akukauno Shusa kuka phughilo kuami kumtsu ghenguno aghulhu lakhi pakutashi pa kukaki ghutu khalauno tsala tsuni shi.

⁶Kukakikhala marbel tsukucho akeqoye tsandiyi bocholo phepheyi phi kivi kighi pesu xi eno tsulakibiyei eno metsughoi keu nhaqhiphi pesu tshukumughu tunatunu shi puae. Shuna ngo tsandi jukimihi lakhu qono tsubui huchuyi eno metsughoi qhapuakeu tu shou qhi.

⁷Panonguno shuna jukhu qolono kukamino shochekeu ji pe kumtsu je eno khumu shonishimove kethiuye angkashi pa jemoni ikemu pano shonishi ke thaqhu sholu nikeu akukauno ahza shivetsu.

⁹Kukaliu Vashti ghi akukaki tipau lono totimiqo ghenguno aghulhu lakhi tsu.

¹⁰Atsala akutsuni ni akukauno chu-shopu amloqi sheveno pa kujumi shokomi tsuni Mehuman, Biztha, Harbona, Bigtha, Zethar, Abagtha eno Karka ku puzu hipaqo pelo kukaliu Vashti ye akuka nanu pepuno ighikuami zulo li jukivihu piyepe nike ahza tsu, kughengu liye ajukivimi lakhi.

¹²Ikemu kukaliu no ahza lumono ighimove eno tino akukau mlo ighono shikighideve.

¹³Akukauno amlo shimoveno pa gholo akighithimi sasu kuptsa kughengu timi tipaqoye aghuloki ghili eno Persia yeghilo yezahqo ithikemike eno akukauno panongu shou pulube chekemike eno timi tipaqoye, Karshena, Shethar, Adnatha, Tarshia, Meres, Marshena eno Memukan noqoke. Media ngo Persia yeghiqhalo pano tsunino ighono kije shi achekeu likhi kumono akukau kusamiqoke.

¹⁵Akukauno timi hipaqo vilo iniju, “Ayezah kiqi lono kukaliu Vashti shou kiu shiveke pua, kughengu lino akukau yezah lutsumo eno kijemiqono aghinishi ighikeu initsumovae.”

¹⁶Ike Memukan no kijemiqo zulono khochile pi, “Kukaliu Vashti ye akukau zulo pimive keu likhi kumono ayehpemi zulo eno akukau Ahaserus yeghiqhalo timi kumtsu zulo pimivae.

¹⁷Kughengu totimi jelino akukaliu Vashti jupesu pututa kimi gholumo thuve nani. Titoi totimiqono kukaliu ghili chilukeu pe pano yeghi Media eno Persia lo ayehpemi qo vilo piuve nani,

¹⁸ayeghiqha kumtsulo ayeh shipsakeu eno amlo kishi kumo ipeghive nani.

¹⁹Akukauno pulo aye kukaliu Vashti pelo akukau Ahaserus zulo ighipemoni eno akukauno li nguno akiviu kisheluveni pi Persia ngo Media yeghilo ayezah shive pelo.

²⁰Atsa hiye ighono kijeke ghenguno akukau yezah pa kukaqha kumtsulo kulhavekelo anipu qono pututa kimi kijemi kitilami shi aghimu gihu cheuve nani.”

²¹Memukan no pikeu akukau eno ayehkipemi qono puloveno

²²ahza shipe pa yeghiqha kumtsulo tsupuwuno pututa tsauno “Kiptimi no pututa kilo ampiu shi peni.” ipi yepuwuve.