Read Sumi Naga ESTHER 2 Bible Online

ESTHER 2 - Sumi Naga bible

ESTHER 2

¹Tithiu akukau Ahaserus no pa mlo iqu iqighike thiuno Vashti kumsulu eno pano pa nipu shou kiu yezah beve keno kumsulu.

²Akukau lau akukumsu tsuchekemi ayehkipemi khamino pi, “Ningu itehiye ayeghiqha kumtsulo ilimi akimthe ajukivi akukau ghenguno phuni.

³Akukau pelo pa yeghiqha lakhikhilo ampemi lakhikhi kishe pelo eno panongu pelo ilimi jukivi jeli kishepe Shusa phughilo tsupuwu pelo. Akukau qholo shokou Hegai, totimi kheu lau saighi pelo eno linoqono nupu kepu nhemgha tsupelo.

⁴Tipaqo gholo khuno akukau pulou shinikeno lino Vashti thelilo kukaliu shipelo.” Akukauno ti pulove eno tishive.

⁵Akukau kilo Judami lakhi paje Mordekai ipikeu Benjamin laghalo Kish nu Shimei eno Shimei nu Jair polono ighikemi ache.

⁶Paye Nebukadnezar Babilon lo akukauno Jerusalem lono Juda kukau Jehoiachin akughulo sawuve kelono pa gholo sasu wuvekemike.

⁷Timi tipau gholo papu thikuzuu nga ajukivi lakhi ache. Lijeye Esther Ibri tsauno Hadasa, lipuaza noqoye thive eno Mordekai no saluve no panga toi lojiluve.

⁸Akukau zah kutsu gholo Esther ghi ilimi kutami gholo lakhi shi Shusa phughilo Hegai lau saighi.

⁹Hegai no ailiu tipauju pa mloqive eno nupukepu thime jeli li tsuve, li ghenguno chuqu kusho akiviu pe tsu eno akukau ki lono ilimi tsuni pephepe li kuphu penike tsuve eno a-a alokelo alojilimi muqolo puave.

¹⁰Mordekai no li vilo liye Judami kepi pikevilopi ketoi liye pimono ache.

¹¹Esther ye kishive nani eno kiu toi acheni kela pi Mordekai no tsalakipe alojilimi muqo ki khalalo iqhoiqi chheju ache.

¹²Akukau Ahaserus lau wumphilo ahza tsupua keuno ilimi lakhino aqhi chighikini dolo juvive penike aqhi tsugho teli pe nupu eno aqhi tsugho ye axokutsungu teli pe nupuno juvive nikeu shi ache.

¹³Titoi shiveno ilimi lakhino akukau lau wunikelo lino pulokeu nhemgha pepusu wulu che.

¹⁴Kijiliuno akukau kilo wuno thanauye idesu alojilimi muqo ki kutau lo sawuno akukau jukutokemi lakhi Shaashgaz, akheu shoko lau qhiche. Liye akukauno kuidemo ke kutolo akukau sasu kushomo nikeu shiche.

¹⁵Kughou Abihail nga Esther, Mordekai tiliu, pa ngashi salu keu no akukau kilo wukepu shive keno liye Hegai, linoqo kheu shi akeuno kiu pepulopi akukumsu tsukeno tipau likhi pepuke. Li ithulukemi kumtsuno li jupesu alovive.

¹⁶Esther ye akukauno kawo ampe akutsuniulo aqhi achighiu lono akukau lau wu.

¹⁷Akukauno ilimi kutami nguno alau li kimiyeve. Ighono pa mlo qiveno akuka kutsukuqho pe li pipeno kukaliu Vashti thelilo kisheluve.

¹⁸Tipathiu akukauno Esther jelono pa yeghiqhalo ayehkipemi eno aqemiqo kusuno aghulhu shi eno aghotsu keu kiqi lono pa yeghiqhalo zahme lutsumove.

¹⁹Kughou ilimiqono akiniu idewo kumqolu keno tipa ghulokilo Moderkai ye akukau hukikhalo ngoluve aghi.

²⁰Ti kutolo Esther ye Mordekai no li saighike ghuloki lono li vilo Judami kepi khuvilomu pikevilo pi ke toi pimono ache.

²¹Ghulo lakhi Mordekai no akuka kilo khe akelo akukau jukuto kemi shoko Bigthan ngo Teres pamaghi akukau hukikha khea eno pamaye amlo ideno akukau pithive nike amqu phuve.

²²Mordekai no ti ithiveno tipau sutsa pa nga Esther vilo piveno lino Mordekai ghili pi-ghi tipau sutsa pe akukau vilo pive.

²³Tipau ghili kishekulu phuluve eno timi pamaye tsuqhi pithive. Tipau tsa kumtsu kukami ghili yekithi kakulo yepuani.