Read Sumi Naga ESTHER 3 Bible Online

ESTHER 3 - Sumi Naga bible

ESTHER 3

¹Kushuwo kumolo akukau Ahaserus no pa qholo kumtsu nguno akijeu ayehkipeu lakhi paje Haman ipikeu Agagmi, Hamedatha nu kishepe akukau shelo kijemi kumtsu nguno alau akuka kipeu shipe.

²Akukauno ahza tsuke toi kijemi pa yeghilo akemi thaqhu pa hechewu kelo pa zulo itsaqi gihu tsu che, ikemu Mordekai ye tishimo.

³Tileno akukau qemi ahukikhalo akemiqono Mordekai vilo paye kushiye akukau zah hebide anikeno iniju.

⁴Tsalakipe panonguno pa iniju che, ikemu pano initsumo no ishi piche, “Niye Judami lakhi tighenguno Haman qhoqhumlae.” Ikehu panonguno Mordekai ghili pesu Haman vilo paye kutuuluni kemo keno pivetsu.

⁵Haman ye muqhumzaiveno Mordekai ye Judami lakhi kepi ithive puzu Mordekai likhi kumono pa limi lagha eno akukau yeghiqha kuchopulo Judami shiyeh kumtsu puhavetsu nikeu kumsuve.

⁷Kiu dolono shikepu keno michithai shiveni ke Haman no asaqhi. Nisan qhi lono asaqhi eno Adar qhi atsala chighi akuthuulo qhibelu.

⁸Haman no tipau tsa pesu akukau lau wuno hitoi pithu, “Okuka yeghiqhalo timi aqo lakhi acheku kumtsulo vekuphape ani, panonguye timi kutami khuaye toimokeu pepimhe acheni eno panonguye akukau yezahqo lutsumoe, tighenguno panonguye akukau kivipu ghenguno xua kuzupu kumoe.

⁹Akukauno pulo aye panongu puhave nike ahza shivelo eno ino tsandiyi kilogram 340,000 pesu akukau kinibolo sutsuni.”

¹⁰Akukauno pa uloti kukhayi lo michije chishida kepu ikhipe Haman Judami ghumi hu tsuve.

¹¹Akukauno Haman vilo pi “Timi tipaqo eno panoqo wu kuakini otsuvae eno nono puloke toi shilu nani.”

¹²Tithiu akukau wu akiyemiqono aqhi atughiulo atsala chighi akuthuu lono kukutsulu, ayehpemi ngo kijemiqo kumtsu lau pututa yeghiqha tsauno yeno akukau uloti kukhayi jemchi huno chishiveno yekili puwuve.

¹³Yekililo hu Judami kichi-iti kumtsu atsala lakhi lono pughave lopi yepu-a eno pithive kemiqo nhemgha ghi luvelopi, tiye Adar qhilo tsala chighi akuthuni zah shivetsu.

¹⁴Tipau zah kaku lakhikhi pa yeghiqhalo ayehpemiqo lau puwuve eno timi jeli kumtsu vilo pikulha peni keu shivetsu, tishianguno tipa tsalanilo kutokupuluve peniyeke.

¹⁵Akukau zah kutsu lono kighitheno yekiliqo puwuve, atughushi Shusa phughilo kulhave, tishiveno akukau ngo Haman pamaye kumtsa iqano aji sho auve. Aphughi tipaulo timiqoye shikumsape avehu izuve.