Read Sumi Naga ESTHER 4 Bible Online

ESTHER 4 - Sumi Naga bible

ESTHER 4

¹Mordekai no tipaqo sutsa chiluveno pa kuuphi suxuveno yeqhiyephi u-luve, ayevu kuchuveno ighamuku qa mlo aphughi xu.

²Tipathiu paye akukaki khagho khalau ngo auve, kughengu khuu pelomu amlo ghime phi-uno khagho alou iloghi chepemoke.

³Pa yeghiqha kumtsulo Judami dolo akukau yezah ghenguno amlo ghime, akuqa kumlo eno kumvu auve eno kutomono ayevu kuchhuno yeqhiyephi uno ayeghi lo ihiauve.

⁴Esther wu aqelimiqo eno shokomiqono ighino li vilo Mordekai ghili pikelo liye shishe amlo imeve eno aphimini xakideluve penike tsupuwu ikemu Mordekai no ikhilu tsumove.

⁵Tipathiu Esther tucho peniye qhitsu keu shokomi lakhi Hatak kupuzu Mordekai ye kiu ghenguno tishi anikeno iniju pe ighilo pive.

⁶Tighenguno Hatak no akukau khagho zulo aphughi toghilalo wuno Mordekai sasu kusho.

⁷Mordekai no pa vilo asutsa kumtsu lheve, Haman no Judami kutsave nike ghenguno tsandiyi kilogram 340,000 pesu akukau kinibolo sunikeu piqhive keu tsa pesu pitsu.

⁸Mordekai no akukau yezah kaku hu pe Esther piye lopi Hatak tsu eno kiu shiveniye anikeno pa vilo pi eno liye akukau lau wuno timiqo ghenguno qhuiniju ghi pimaye sae ipive.

⁹Hatak no Mordekai tsa pesu Esther lau ideighi.

¹⁰Esther no Hatak vilo idewono Mordekai vilo hitoi pilo pive.

¹¹“Akukau qemi kumtsu eno pa yeghiqhalo timi kumtsu, kiptimi momu totimi khuno pa momu li kuighimo namu pa kutoshino kughaki sholokuu iloghini keno pithive nikeu zah ani eno khuno akukauno akuka kusu peqhepuwo tsu nikeno xulu kepu yezah tsuvekeu ithi ani putsae, ikemu hi atsala shighi kutolo akukauye iku puwu mphie.”

¹²Esther sutsa Mordekai no chilukelo

¹³pano hitoi Esther khochile, “Judami kumtsu thiveno noye xulu anani kesha?

¹⁴Nono hitoike ghulokilo inaqhoi ngo auve aye Judami lau kungugha kudauno Judami kuphu nikeu ighiveno panonguye xaluveluvi ikemu no eno opuno kiboye puhave nani eno khuno ithi ani nomu, noye hitoi keu ghuloki ghenguno akuka alo ighi aghi luvike.”

¹⁵Esther no Mordekai vilo ishi khochile.

¹⁶“Wulo eno Shusa phughilo Judami jeli hekutsulo eno nonguye tsala kuthu ighenguno putho pucho chumo shomono kumvulo titoi ni eno igholo ilimi aqemiqo ghi tishini eno ayezah kiqilo kumomu ino akukau lau wuni eno pithive kepushi namu thiniake.”

¹⁷Ike Mordekai no wuve eno Esther no pikeu toi shi.