Read Sumi Naga ESTHER 5 Bible Online

ESTHER 5 - Sumi Naga bible

ESTHER 5

¹Kumvu wo tsala akuthuni Esther no kukaliu nanu pepuno akukauno ngo chekeu kughaki alou ilo akukauno iqa akeu zulo puthugho.

²Kughou kukaliu Esther no kughaki alou puthugho aghike akukauno ithulukeno pano pa ulo akuka kusu peqhepe tsuno li ikhilu eno Esther no ti tsuqulu.

³Tishino akukauno li iniju, “Esther, noye kiu avehupu shi ania? Iyeghiqha tuxatsamu pe otsunie.”

⁴Esther no khochile “Akukauno pulokepu shi aye ino kuto akeu ghulhulo ishi Haman okujo ighi penishi anie.”

⁵Akukauno Haman vilo mtazu ighilo pi ahza tsupuwu. Akukau ngo Haman pama Esther no kutope puakeu ghulhulo ighi.

⁶Aji sho ake dolono akukauno Esther vilo iniju, “Kuchouno noye kiu pulo ani kya? Ino ikukaqha tuxatsamu otsunike pilo.”

⁷Esther no khochile, “Ino qhuiniju anike akukauno kuchouno ikimiye ani aye eno ipulou shitsu nishi aye thoghiu ghi Haman okujo aghulhulo ighitsulo, ipulou kuchouye kiu ghenguno keno ino ovilo kishekulu pinie.”

⁹Haman ye aghulhu taveno alokivishi wove, ikemu kughou pano ipe ahukikhalo Mordekai ithulu keno pa gizulo pishiqhomo kehu amlo idesheve.

¹⁰Tishimu pa mlo ghaqhi luveno pa kilo wove eno pa kusami eno pa nipu Zeres pelo pano kukusu shikeulo ighipe.

¹¹Paye kiu toi akukau yeghiqhalo akukau shelo pa akijeu shi ani eno kishi kinikulu ati anu kutomo sasu acheni keno aqhekuza shi panongu vilo pi.

¹²Tinguno alaughi pano ishipi. “Iye Esther akukaliuno ni kumo aye khumu aghulhulo akukau gholo wupemoe eno thoghiu ghi akukau gholo ikusu anie.

¹³Ike tishimu kughono ino Judami Mordekai hu akukau khagholo ngo aghike ithulu aye hikumtsu kumu avehupu kuhae.”

¹⁴Tileno pa nipu Zeres eno pa kusami qono ishi pi, “Tshukiqhia akiqhe lau miter mukukini mlapelo eno noye thoghiu tileno Mordekai tshuqhive pelo pi akukau vilo pivelo eno noye alokivishi akukau sasu aghulhulo wulo.” Tino Haman mlo qive eno titoi tshukiqhia mlavepe.