Read Sumi Naga ESTHER 6 Bible Online

ESTHER 6 - Sumi Naga bible

ESTHER 6

¹Tipaji akukau ye zuhumlave eno ayehkipe kaku phinike yekikithi kaku sughilopi ahza tsu eno pewo akukau phipiye.

²Tile yehpuaghi keuye Bigthan ngo Teres akukau qholo kumlami shoko pamano tuqhou no akukau Ahaserus heqhive niye aghikeu Mordekai no phuphelu keu yehpuaghi keu philu.

³Akukauno pi, “Tishiveke ghenguno Mordekai ye kiu ajekivi eno agigihu ithulu kya?” Akukau qemi pa phivilo akeqono khochile, “Pa ghenguno kumu shi tsu mphie.”

⁴“Kughaki khalau khuu ngo ania?” ipi akukauno iniju. Haman ye pano mlapua keu alono Mordekai tshuqhive penikeu tsa pe akukau vilo piniye iloche.

⁵Tilehi akukau qemi qono “Haman atsakugha alo puthugho anie,” ipi. Akukauno “Pa pelo iloghilo pilo” ipi.

⁶Haman no iloghi eno akukauno pa vilo iniju, “Akukauno gihu kepushi amlo qivekemi shou kiu shitsu kepua?” Haman no pa likhi pa putsaghi “Akukauye inguno alau kutami khuu gihu kepu ania?”

⁷Haman no akukau khochile pi, “Akukaphi akukauno pepuchekeu sughi puzu timi tipau pu-u eno akukauno ikuche keu khurshi shou ikupelo

⁹eno akuka kutsu kuqho pa pipelo eno kukami pulou shikemiye akukauno ishi gihu cheniepi akukau wu kijemi lakhi pichebeveno pa pelo pa zulono asheshu atoghilalo sawu pelo.”

¹⁰“Ighono achipie, Nono piketoi mtazu iphinhemgha eno iwu khurshi pe Mordekai lau wulo eno nono kiu piqhikeno titoi shi kupu tsulo,” ipi akukauno Haman khochileve.

¹¹Tighenguno Haman no akukau phi nhemgha pe Mordekai puu eno akukau zuqhulo khurshi shou iqapeno atoghilalo aphughilo sasu akukau mlo kiqi shikemiye hitoi akukauno gihu cheniepi ighamuku sasu wuve.

¹²Tithiu Mordekai no pa kumla alo idewove, ikemu Haman ye mghimghai pa kilo wove.

¹³Haman ye tipa tsalalo kiu shive keno pa nipu Zeres eno pa kusamiqo vilo pikelo panonguno ishi pa khochile, “Mordekai no Judami shi aghiaye noye pa shou kumu shilumo nanie, ikemu noye pa zulo ikiqiveni putsae.”

¹⁴Titoi panonguno pa sasu kuptsa akelono akukau ghinimi qono ighieno Esther no aghulhu lo ku akeulo mtazu ighilo pi kuighive.