Read Sumi Naga ESTHER 7 Bible Online

ESTHER 7 - Sumi Naga bible

ESTHER 7

¹Tighenguno akukau ngo Haman pama Esther ghulhulo ighi.

²Itaghi aji kusho ghuloki lono akukauno li vilo iniju, “Noye kiu khu ania, kukaliu Esther! kiu kiumu opulou shitsunie, ikukaphu tuxamu otsunie.”

³Ashekhalo kukaliu Esther no khochile, “O akukau, ino omlo kiqiu shi aghi aye eno opulou shi aghi aye ikuxu eno iwu timiqo kuxu xalu tsulo.

⁴Kughengu ni eno iwu timiqoye ningu pithiveni kemi ulo jesuvae. Ninguye heqhi buqhi puhaveni keulo ikiqi ilovae. Ningu pe aqemi kiqi lonomu jeve aye niye inaqhoi ngoveni cheke kughengu ni ghimeye akukau mhekiqi sasu kimighi kulupu kuhae.”

⁵Tileno akukau Ahaserus no kukaliu Esther iniju, “Tiye khuu kya? pa khile ania? khuu kuighu kumono oshou tishiluni kya?”

⁶Esther no khochile, “Nighumi lakhi huye hi Haman kixikilau ke.” Tishi kithishi Haman ye akukau eno kukaliu zulo msave.

⁷Akukauno pa-a lono ilhethuveno aki khalacheu aghutu kudau ipeve eno Haman ghi ilhethu kukaliu pelo pa kuxu pukhatsu penike pithu kughengu akukauno pa shou aghime pukuni keu ithive.

⁸Tithiu Akukauno aghutu lono idesu puzuu aji kusho alo iloghi eno Haman no amlo hauveno Esther no ngo akeu alo ikiqive. Akukauno mqhumzai igha ithuve, “Paye hile ikuka kilo inhekithe loghi li shipthalu nani kesha?” Akukau kichi lono tipau sutsa pike mtsa shokomiqono Haman gi kuzuvetsu.

⁹Tishiveke mtsa akukau kukuphuu Harbona no pi. “Akughushu, Haman ye Mordekai khuu akukau pithiveniye amqu mlakeu lono xaluve keno pithive niye tshukiqhia akiqhe lau miter mukukini mlape puanie.” Tileno akukauno pi, “Tipau tshukiqhia lono pa tshuqhivelo.”

¹⁰Haman no Mordekai tshuqhive nike ghenguno tshukiqhia mlapua keua lono pa tsuqhipithive. Tileno akukau mlo iquve.