Read Sumi Naga ESTHER 8 Bible Online

ESTHER 8 - Sumi Naga bible

ESTHER 8

¹Tipatsala lono akukau Ahaserus no Judami ghumi Haman ki pe Esther pelo ngovepe. Mordekai no akukau zulo ighi kughengu Esther no liye kiu lono Mordekai pama lakhi keno akukau vilo pive.

²Akukauno pauloti kukhayi Haman ulo akeu ikhi chile luveno pe Mordekai tsuve eno pa kishepe ayehpetou shi kisheveno Esther no Mordekai pelo Haman kilo ngovepe.

³Tipashelo Esther no akukau pukhu philo ikiqiveno Haman no Judami shou amqu mla pua keu lakhavetsu lopi anhezu piji qhuiniju.

⁴Itaghi akukauno pa kuka kusu peqhepe Esther tsu eno lino pa zulo puthugho no

⁵ishi pi, “Akukauno pulokepu shi eno ikimiye aghi aye, Haman no akukau yeghiqhalo Judami kutsave nike ahza tsupuakeu tukideve keu zah tsuvelo.

⁶Kughengu niye iw timiqo ghiqhi akeu ithuluno kishi kutuu luani kya?”

⁷Tileno akukau Ahaserus no kukaliu Esther ngo Judami Mordekai pama vilo pi, “Ino Haman kukaki pe Esther tsuvae eno pano nongu puhave niye aghike ghenguno tshuqhivae.

⁸Ikemu akukau jelono eno pa uloti kukhayi pe chishiveno pikulhave keuye xavemlae. Tishinamu itehiye nokujono Judami ghenguno kishi yenishi keno akukau jelono yelo eno akukau uloti kukhayi pe chishiveno puwuvelo.”

⁹Mordekai no mtazu akukau qholo akihemiqo kusu eno ti aqhi akuthuu Sivan qhi atsala muku akuthuu shia kelo akukau yeghiqha 127 India lono Ethiopia kutolo Judami kumtsu ahza tsupuwu. Asutsa tipaqo pututa yeghiqha tsauno yepuwuve. Mordekai no akukau Ahaserus jelono akukau uloti kukhayino chishiveno kighithe khurshi ngo kemel eno gadahaqo shouno pewu khavepe.

¹¹Atsa tipauye Judami khile khile aghimu kuqhaluveno panongu ghumi mujochile heqhiveno tipaqo nhemgha kumtsu luvetsu penike eno pano Judami bolomi xaluve penike ahza tsuve.

¹²Tipa tsala hu ye ayeghiqha kumtsulo Adar qhi, atsala chighi akuthuu lo kihitha vetsu.

¹³Ayeghiqha kumtsulo yepuwu keu hu timi kumtsu lau vekulha eno Judami no pano ghumi kutsaluve nike kutoluvelopi ahza shive.

¹⁴Ayezah tipauye akukau no ahza tsuketoi kighitheno wuve, eno tipau zah Shusa phughi loghi kulhave.

¹⁵Mordekai ye akukau zulono akukaphi tsulabiye metsughoi keu pepu, shuna kutsu kuqho puveno Shusa phughilo ipeve eno aphughi tipaulo akemino alokivi shive.

¹⁶Judami ighono alovi sheve eno aqha kumtsu lono panongu ikhiluve.

¹⁷Akukau yezah ayeghiqha eno aphughilo ighikeu kumtsulo Judamino alokivino chhitoive eno kuchukusho shi pinyi eno thhe auve. Aghakhulo xu akemi Juda kumomi kutomo no Judami msa akehu panongu ghi Judamike piuve.