Read Sumi Naga IPEKULU 1 Bible Online

IPEKULU 1 - Sumi Naga bible

IPEKULU 1

¹Israil nulimiqo pututa kibolomi sasu Jakob gholono Ijip lo iqikemiqoye hipaqoke:

²Ruben, Simon, Levi, Juda,

³Isakhar, Zebulun, Benjamin,

⁴Dan, Naftali, Gad eno Asher.

⁵Jakob polo kughukomi hipaqo kumtsu kelo lhotsunike. Panu Josef ye Ijip lo aghiveke.

⁶Tishiche ke dolono Josef ngo pa thikuzumi eno tipa tiqhelimi kutami kumtsu thikhave,

⁷ikemu panoqo lagha kughukomi Israilmiye ati anuli kutomo shive eno kihikhamla kepu shive eno akumto shiuve kehu Ijip ye panoqono nhakhaluve.

⁸Tishi akelo Josef ghili mthakemi akukau akithe lakhino Ijip lo akukau shi ipeghive.

⁹Pano pawu timiqo vilo pi, “Israilmi hipaqoye phikhamla kepushi akumto shiuvae eno ningu ghenguno akumsapu shiauvae.

¹⁰Aghushi ighiaye panonguno nighumi gholo supuzu nisasu aghu shino aghakhu lono poveluvike. Ninguye panonguno kihikha mla kepushi akeu alau shipemonike alaghi hami phu masae.”

¹¹Ikehu aghichhe kumla pesu Israilmi ghuthi kuxu puhave tsunike ghenguno Ijipmino aqemi kumla jukutsu heqhikemiqo pesu panoqo shou qhike. Israilmino Pithom ngo Ramese phughiqo shiqhike, tiye akukau kuakini pekukutsua shicheke.

¹²Ikemu Ijipmi no khijehi Israilmi qodaqhi keno tijehi Israilmiye alaushi timi kutomo shiuve eno panonguno aghakhuqha lo alaushi ikowove. Ijipmiye panoqo msaukhave.

¹³Ikehu panonguno Israilmiqo pelo aghime kusashi panoqo qepeke,

¹⁴eno panoqo kuxu kijiksa shipeke. Panonguno akikishilo ngo alu kumlalo eno akumla jeli kumtsulo Israilimi pelo mlapeke eno panoqo shou amlo kimiyekeu kuhake.

¹⁵Tipathiu Ijip lo akukauno Shipra ngo Puwa pama putsa, hipamaye Ibrimi totimino pununikelo tuchohiju cheke.

¹⁶Akukauno pi, “Kughou nonguno Ibrimi totimi sasu kupunu nikeno anga kiptimi shiaghi aye heqhivelo ikemu anga totimi shiaghi aye puxuve tsulo.”

¹⁷Ikemu totimi hipamaye Alhou sumsakemi kehu akukau gholu moveke; pano pikeu shinike zuqhulo anga kiptimi pelo xuluvepeke.

¹⁸Ikehu akukauno totimiqo kusaghipeno panoqo vilo iniju, “Nonguye kushiye hikithipu shicheni kya? Kushiye anga kiptimi pelo xuluve anipe kya?”

¹⁹Panonguno ishi khochile, “Ibrimi totimiye Ijipmi totimi toimoe; panonguye mulalei punuve cheni eno nino wo tomphi lono anga punuve aghi chenike.”

²⁰Totimi hipamano Alhou sumsakeu ghenguno Alhou no pama lau amlokiqi ae eno pama pelo pututa kibo shilupe, timiqo ghi alau ikowolupe.

²²Ashekhashi akukauno pawu timiqo kumtsu lau ahza hipau tsuke: “Ibrimi anga kiptimi anileshi punukeu kumtsu ikhipesu Nayil ghokilo vesuvelo, ikemu anga totimiqo pelo xulupelo.”