Read Sumi Naga IPEKULU 11 Bible Online

IPEKULU 11 - Sumi Naga bible

IPEKULU 11

¹AMPEU no Muse vilo pi, “Niye Ijip kukau ngo pawu timiqo shou ghimeqhikeu lakhi likhi puwuni keu shi ani eno tipauno pano nongu pelo chevepe nani. Kuchouno pano nongu kumtsu hilauno hapuwuve nanike.

²Itehiye nowu timi Israilmi putsalo eno panoqo vilo pututa kisughumi vilo shuna ngo tsandiyino shikeu achi jeli khulo pilo.”

³AMPEU no Ijipmi pelo Israilmi qhoqhulupeke. Mutsuqheino kijemi eno timi kumtsu ghano Muse ye ighono timi kijemi kepi kumusuluve.

⁴Tileno Muse no akukau vilo pi, “AMPEU no pi ani, ‘Zubumtalo ino Ijip qhalo wunani,

⁵Ijip lo anu anoghiu kumtsu thive nani, akukau nu, akuka lakhu mheghi ighiniye akeu lono athi tsughuche keu aqeliu nu kutolo thinani. Lhoxu jeli piti tughiu ghi kumtsu thinanike.

⁶Ijip qha kumtsulo vekipighi qakeu anani. Khilemu tikithipu puzuu shimokeu momu khilemu tishi kithemo nanike.

⁷Ikemu Israilmi shou eno panoqo tsu aqushouye atsu mu gheha pukumo nanike; tileno ni AMPEU no Ijipmi ngo Israilmi dolo kothakile keu shikepi nonguno ithi nanike.’ ”

⁸Muse no ishi kishekhapi, “Oqemi hipaqo kumtsu ilau ighi no igizulo itsaqi nani eno panonguno iwu timiqo kumtsu sawuvelo pi iqhuinijiu nani. Tipa thiuno ino cheve nani.” Muse no aloghu ideve kehu akukau qhiveno cheve.

⁹AMPEU no Muse vilo pi, “Akukauye otsa initsumo kepi omili auve nanike, tishianguno Ijip lo niye iwu akumzapu michi alau shiluniye ke.”

¹⁰Muse ngo Aron pamano akukau zulo akumzapu michi hipaqo kumtsu shike, ikemu AMPEU no pamlo hekike vetsuke eno pano Israilmi pelo pano ghakhu lono chevepemoke.