Read Sumi Naga IPEKULU 13 Bible Online

IPEKULU 13 - Sumi Naga bible

IPEKULU 13

¹AMPEU no Muse vilo pi,

²“Kiptimi anoghiu kumtsu ilau ikhiphe tsuve lo, kughengu Israilmi kiptimi anoghiu eno lhoxu atsu piti tughiuye kumtsu iwuke.”

³Muse no timiqo vilo pi, “Hipa tsala kumsu chile lulo, nonguno Ijip qhivekeu tsala, tilau nonguye aqemi shi acheke. AMPEU no pa kuka kije pesu hipa tsala lono pano nongu saipeghiluveke. Kholaqhi sukeu sho chumoni.

⁴Nonguye hi aqhi atughiu Abib qhi ishi tsala lono Ijip lono cheveanike.

⁵AMPEU no nopuasuqo vilo tsaquino tushoqhive ake, pano Kananmi, Hatimi, Amarimi eno Jebusimi yeghi nongu tsunikeu shivae. Kughou pano aghuma eno kinikulu yeghi tipaulo nongu sasu ighinikeno nonguye ampe atsutsu aqhi atughiulo hipau pinye ikhilu masake.

⁶Atsala tsuni nonguye kholaqhi sumokeu sho chumoayesake eno atsala akutsuniulo AMPEU gihukeu pinye ghulhu shilo

⁷Atsala tsunilo nonguye kholaqhi sukeu sho chukevilo; tishi akelo noyeghilo kholaqhi momu kholaqhi sukeu sho qhikevilo.

⁸Kughou tipau pinye huthuni keno nongu nuliqo vilo chixe chilei pilo, ike nonguno Ijip qhiveno cheve ke ghulokilo AMPEU no kiu nongu ghenguno shitsukeno tipau ghenguno nonguno hipaqo kumtsu shichenikepi pilo.

⁹Hipau tsala ikhilu keuno kiuala noulo momu nongu kishelo khapu chekeu toi nongu pelo kumsuchilelu penanike; hipauno nongu pelo AMPEU yezah phuju eno lhekideju apenikeu shi nongu loputsu tsu nani, kughengu AMPEU no pa kuka kije pesu Ijip lono nongu saipeghike.

¹⁰Ampe atsutsulo kihitha puatsukeu do hipau pinye ikhilu chelo.

¹¹“AMPEU no nongu sasu Kananmi yeghilo ighi nani tiye nongu eno nopu asuqo tsunikeu shi pano tsaquino tushoqhi veake. Kughou pano tipau nongu tsuni keno,

¹²nonguye anu anoghiu kumtsu pesu AMPEU lau pakuta keu shi mlla masake. Nowu lhoxu atsu piti tughiuye kumtsu AMPEU wuke,

¹³ikemu nonguno gadaha atsu piti tughiuye AMPEU launo qhuchile luve masake, tipau thelilo bheriti lakhi pesu mllalo. Nonguno gadaha tsu qhuchilelu nishimoaye tipau kuo suchheve tsulo. Nonguye kiptimi anoghiu kumtsu qhuchile luve masake.

¹⁴Ighinikeu ghulokilo nongu nuliqono hipau chinye kiqi ye kiu kelapi iniju aye, nonguno ishi pa khochilelo,’ AMPEU no akuka kije peitha no Ijip lono ningu saipeghike, ninguye tilau aqemi shi acheke.

¹⁵Kughou Ijip lo akukauno pa mlo hekikeauve puzu ningu pelo wupemo keno, Ijip yeghilo kiptimi anoghiu thaqhu timi na lhoxu kutau pinamu kumtsu AMPEU no heqhive tsuke. Ikehu ninguno lhoxu atsu piti tughiu thaqhuye AMPEU lau heqhi mlla cheni, ikemu anu anoghiu ye qhuchileluve chenike.’

¹⁶Hipau chine ikhilukeu ye kiwala ni ulo momu ni kishelo khada pukeu toi kumsuchile lukeu lakhi shinani ke; hipauno AMPEU no pa kuka kije pesu Ijip lono ningu saipeghikeu ningu pelo kumsukidelu peniyeke.”

¹⁷Kughou Ijip lo akukauno timiqo pelo wuvepe keno, AMPEU ye azughi kumxa lo Filistiya kudau wukeu laghi lono Israilmi sawumoke, tipalano akughukhou la shia kemu. Alhou no ishi kumsuve, “Niye timiqo pelo panonguye aghushi kepushive keu ithulu kelo amlo kiliveno Ijip lo xaidewove penishi moe”

¹⁸Tipa zuqhulo, pano panoqo sasu asayeqha vechewo ala veho muxa keu la lono Akuhu Zughi kudau sawuke. Israilmiye Ijipmi yeghi lono aghushi kepushi aghunanu kutopesu wuke.

¹⁹Muse no Josef sukumo pa gholo pesu wuke, kughengu puzuuno Josef no Israilmi pelo tishini keu shi tangui tushoqhipe pua ke. Josef no pipua ke, “Alhou no kughou nongu xapheluni keno nonguye hilauno isukumo nongu gholo xapuwuve masake.”

²⁰Israilmino Sukot qhive no asayeqha kighijelo Etham lo aphiki shipe ngoke.

²¹Puchouye AMPEU no khungkusu tsukucho toishi puzu panoqo zuu wuke eno putholoye akuvu panoqo tsunike ghenguno ami tsukucho toi shi puzu panoqo zuu wuke, ikehu panonguye putho pucho chechelu kepu shike.

²²Pulhapujulo puchouno khungkusu tsukucho ake eno puthono ami tsukuchono timiqo zuu shia eno tiye hauvemoke.