Read Sumi Naga IPEKULU 15 Bible Online

IPEKULU 15 - Sumi Naga bible

IPEKULU 15

¹Tileno Muse ngo Israilmino ale hipau AMPEU shipilike: “Ino AMPEU shipilini, pano ajekipishi tokulu lakhi tsue Pano khurshiqo ngo tipau shou ikuchekeqo azughilo vesuveke.

²AMPEU ye akumtoshi isushokuluu; ixaluchekeuye pake. Paye iLhou eno ino pa sheqheni, ipu Lhou ke, Paye kiu toi kije keno tipau ghili ino pheni.

³AMPEU ye aghutomi lakhi; Pa jeye AMPEU ke.

⁴“Pano Ijip ghushimi eno tipaqo khurkulu azughilo vesuvetsu, kijemi akiviu qoye Akuhu Zughi lono putsu qhive.

⁵Azughi kuthono panoqo nhaluve; panonguye atuqu toi alou ikiqi ilove

⁶“Ou ajeuye akukano puchopungo kepue, O AMPEU; tipauno aghumi hephopinyive cheni.

⁷Akiqheu hukulushi nono oghumiqo hasuluveke; Ologhuno iquipeghi puzu aghijini toi tipaqo pitiveke.

⁸Nono azughi shou fupuku eno azuno qhemghai tukucho kumqoluve; tiye atozu puwu keu toi muzuchoi puthughove; azughi kutho qhai mutotoive.

⁹Aghumino pi, ‘Ino panoqo hawo kughaluveni; ino panoqo kinikulu kijethaluveni eno ino lunishi keu kumtsu luveni; ino izutakihi sujope panoqo ghiqhiveno panonguno akeu kutsu luveni;’

¹⁰Ikemu AMPEU launo atuthu kishe lakhi ighi keuno Ijipmiye putsu qhive; Panonguye azukumsapulo shisayi toi thumyi ilove.

¹¹“AMPEU, alhouqo gholo otoikeu khuu ani kya? Akimtheno akumzapu ke, omihikeu khuu ani kya? Khuuno nono shikeu toi akumzapu kumla eno amichipu shiluni kya?

¹²Nono ou ajeu xachho keu lo ayeghino nighumiqo munoveke.

¹³Oshoqhilo amikuchoke, nono xaphelukemiqo nono sawuke; okumto pesu okimthe yeghilo panoqo kiche piye sawuke.

¹⁴Ashiayeh kutamino chiluvae eno panonguye musa khokhoshike; Filistiyamiye akumsano qaluve.

¹⁵Edom lo sakiphemiqoye kichimamavae; Muab lo aje kughushumiqoye khokhoshi ani; Kananmiye panoqo mlo kumto puhavae.

¹⁶Akumsa eno ighukeuno panoqo shou ikughi. O AMPEU, panonguno okumto ithulu, aqemi kuxu lono kuqho pheve kemiqo owu timiqono hechesu wuvemoke kutolo, panonguye msano chochiyi puthugho ake.

¹⁷Nono owu timiqo saghi no owu naghutolo panoqo shosuke, tiye okungo a shinike nono kishelukeu alo, Achineki, No ampino shiqhi tsukeu-alo.

¹⁸AMPEU, noye alhokupujulo akukau ke.”

¹⁹Israilmiye qhaikeu yeghi shouno azughi vechesu chewuke. Ikemu Ijip khurkulu ngo khurshi eno tipaulo ikuche kemiqono azughilo wukelo AMPEU no azu saideghi puzu panoqo yimveke.

²⁰Aron chepu Miriam tungkupliuno amqulebo ikhilu eno totimi kumtsuno li papesu amqulebo kuigha eno ilheke.

²¹Panoqo ghenguno Miriam no hipaule phe: “AMPEU shipililo, pano ajekipishi tokulu lakhi shiluvae; pano khurshi ngo tipau sachekemiqo azughi lo vesuve ke.”

²²Tipathiu Muse no Israilmi sasu Akuhu Zughi lono Shur sayeqha kudau sawuve. Ghulo kuthu kutolo panonguye asayeqha vechesu wuke ikemu azu phumlave.

²³Ike panonguno a-a lakhi Mara ipikeulo ighi, ikemu tilehi azu aghikeuye ighono khumtsayi kehu panonguye tipau yemlave. Ikehu tipau je pesu Mara ipike.

²⁴Timiqono Muse vilo muchhouveno pi, “Ninguye kiu yelo pikya?”

²⁵Muse no AMPEU vilo amlo tsuqhiyi akighini shi, ike AMPEU no asuta lakhi pa piyekeu pesu pano azulo vesu eno azuye yelu kepu shiluve. Tileno AMPEU no panoqo pelo pe xuche penikeu yezah pesu tsuke eno tilehino pano panoqo ghukejuke.

²⁶Pano ishi pi,”Ino khipaqo pesu achipiu kepi chenikeno tipau shikeu eno ino ahza tsukeu pelu aye ino Ijipmi shou akusu jeli sughikeu lakhimu pesu nongu ghimeqhimo nanike. Niye AMPEU nongu shipivi chekeuke.”

²⁷Tishiwo thoghiu panonguno Elim lo ighie, tilehi azupuki tsuni eno amsabo lhotsuni ake. Panonguno tilehi azu phivilo aphiki shike.