Read Sumi Naga IPEKULU 19 Bible Online

IPEKULU 19 - Sumi Naga bible

IPEKULU 19

¹Israilmiye Refidim qhiveno cheve eno panonguno Ijip qhivekeu aqhi akuthuu atsala atughiulo panonguno Sinai sayeqhalo ighilu.

²Tilau panonguno Sinai Toghi pukhu kuxalo ngonike aphiki shipesu qhilue

³eno Muse no Alhou sasu kusholuniye naghutolo iqhove. AMPEU no naghuto kudau pa kupuzu pa vilo Israilmi, Jakob polo kughukomi vilo pike:

⁴“Ni, AMPEU no Ijipmi shou kiu shive keno nonguno ithuluvae. eno aluquno kishi achishibo lono ati xapukeno tishi ino nongu xapuke eno nongu sasu hile ighi anike,

⁵Ike itehiye nonguno igholu eno iwu puloshoqhi pelu aye nonguye iwu timiqo shi nani. Ayeqhiqha kuchopu iwu ke ikemu nonguye iwu kishe kiphemi shi nani,

⁶ilau likhi ikhiphe tsuvekemi eno nonguye achinemi shi iqelu nani.”

⁷Ikehu Muse no ighi puzu sakiphemi kukumqo eno tipaqo vilo AMPEU no ahza tsukeu kumtsu pesu pitsu.

⁸Tileno timi kumtsu no kumtsa puzu ishi khochile, “AMPEU no pikeu thwokha kumtsu ninguno shinie,” ike Muse no hipau pesu AMPEU lau pithilu.

⁹AMPEU no Muse vilo pi, “Ino khungkusu zuchiyi keu lono olau ighini tishi anguno ino oputsa akeu timiqo pelo chilupenike eno hinguno hilauye opululu penike.” Muse no AMPEU vilo timiqono kiu khochile keno tipau pesu pi,

¹⁰ikelo AMPEU no pa vilo ishi pi, “Noye timiqo lau wulo, eno panoqo vilo mlla kepushi ishi ngo thoghiu tsala pano likhi panoqo shikimthevelo pilo. Panonguye panoqo phimini ishiveno

¹¹aghiniu tsala loye kutope ngolulo pilo. Tipanino ino Sinai Toghi shou ighi nani, tipa-alo timi kumtsuno ni ithulu nanike.

¹²Naghuto vehomuxa alughi shi amchi shipe qhilo tishi anguno timiqoye tipau katha pemo nike eno panoqo vilo naghutolo ikughi kevi momu tipau kupunu ighi kevilo pilo. Timi khuuno apukhu tipau shou nepuku nikeno paye pithive masake.

¹³Timi khuumu pa dipemo nani kehu paye atu pesu veqhive momu apiji pesu kaqhivelo. Hiye timi na lhoxu kutau pinamu athoke; tipaqoye pithive masake. Ikemu kughono afuko kuyighani keno tileno timiqoye naghutolo iqholo.”

¹⁴Muse no naghuto lono iqighi puzu timiqo vilo Alhou mlla kepushi kutope ngolulo pike. Ikehu panongu no aphimini ishive

¹⁵eno Muse no panoqo vilo pi, “Aghiniuye kutope ngolulo eno tishi akeu dolo totimi sasu zu kevilo.”

¹⁶Akuthuni inaqhe naghuto shou tsutsu-su, tsutsukulo eno khungkusu zuchiyi ipeghike eno afuko vekipighi ighakeu sutsa chilue. Aphiki shipuake alo timi kumtsu akumsa launo khokhoshive.

¹⁷Muse no aphiki shipuake-a lono panoqo pelo Alhou sasu kushope nike sasu ipe eno panonguno naghuto pukhu kuxalo puthughope ngoe.

¹⁸Sinai Toghi kuchopu amichhino kuzu pholuve kughengu AMPEU no ami lono tipa shou ighike. Amichhiye amiphoki kuloghi lono amichhi ipeghi ke toi kunguu iku ae eno naghuto kuchopu shishe ithake.

¹⁹Afuko ghughaye alau alau shikitheve, Muse no putsa keulo Alhou no tsutsukusu lono pa khochile.

²⁰Sinai Toghi kutsuqalo AMPEU no iqighi puzu naghuto kutsuqalo Muse kuluve. Muse no ikughi kelo

²¹AMPEU no pa vilo pi, “Aqhou iqilo eno timiqo vilo ijuni aye alughi kathasu ighikevilo pi kutughuvelo; panonguno tishi aye kutomo no thive nanike.

²²Achinemi ikupunu ighikemi ghi pano likhi pano shikimtheve masae tishimoaye ino panoqo ghimeqhive nani.”

²³Muse no AMPEU vilopi, “Timiqoye ikughimlae kughengu naghutoye akimthe kepi kumsululopi eno tipau lughi amichi shipe qhilopi nono ahza nitsuvae.”

²⁴AMPEU no khochile pi, “Iqilo eno ogholo Aron saighilo. Achinemi eno timiqoye ilau ikughiniaye alughi katha kepu kumoe, tikumoaye ino panoqo ghimeqhi nanike.”

²⁵Muse no timiqo lau iqighino Ampeu no kiu pikeno pesu panoqo vilo pitsu.