Read Sumi Naga IPEKULU 2 Bible Online

IPEKULU 2 - Sumi Naga bible

IPEKULU 2

¹Tishiake ghulokilo Levi laghami lakhino pano laghami totimi lakhi sasu kulakupu shilu,

²eno lino mishiluveno anga lakhi punu. Anuye kiu toi jukivi kela lino ithulupuzu lino aqhi kuthu kutolo pa pekusu ache.

³Ikemu lino pa pekusu khamlave kehu amtuno shikeu shoghi lakhi ikhilu eno azu poiloghi pemo kepushi alkatra pesu medave. Lino anga tipau lo ikhisuve eno aghoki mukulo amtuli pholo qhive.

⁴Anga tipau pafono putouno puthugho puzu anga shou kiu shive nani kela juake.

⁵Ikelo akukau nonga ilimino azukuchhu nike aghoki lo iqighi eno liqelimiqoye aghoki mukulo iqho iqi ake. Akukau nga huno amtulilo ashoghi akeu pishipuwo ithulu eno tipau sughipeniye aqelimi lakhi puwu.

⁶Akukau ngano tipau lhaphe kelauye lino anga kiptimi ithulu eno anga ye qa-ae ikehu liye pa jupesu amlo ighiqhiyi veno pi, “Hiye Ibrimi nga lakhike.”

⁷Tileno anga pafono akukau nga vilo ishi pi, “Ino wupuzu Ibrimi totimi lakhi kusaghino oghenguno anga hikujuu shipeoshea?”

⁸“Tishilo” ipi lino pi. Ikehu anga pafono wu puzu anga paza saghitsuke.

⁹Akukau nonga ailiuno topumi vilo pi, “Anga hipau luno ighenguno pa tucho hijulo eno ino ojume tsu nanike.” Ikehu lino anga luvepuzu pa tucho hijuke.

¹⁰Hithiu anuno thaive ke thiu lino pa sasu akukau nonga kilo wu eno akukau nonga no panu kuchou shi pa saputhuluve. Lino alikhi aputsaghi pi, “Ino azulono pa sunhephelu kehu paje Muse kutsuke.”

¹¹Kughou Muse no kichimi shive keno pano wu timi Ibrimi xuju nike wu eno panoqoye tsuyikhomo aghichhe ghime kumla shi apekeu pano ithulu. Ijipmi lakhino Ibrimi lakhi heqhivekeu pano ithulu, timi tipauye Muse no wu timike.

¹²Muse no hula hila jukelo timi khuumu pa jukuto aghikeu ithumla ikehu pano Ijipmi heqhiveno asayelilo jonha veno kusuve.

¹³Tishi wo thoghiu pano ideighikelo Ibrimi kini kichighi aghi keu ithulue, khuuno akumou shi akeno tipau vilo pano pi, “Noye kushiye akusami Ibrimi shou hepuku ani kya?”

¹⁴Timi hunopi, “Khuuno opelo ayehkipeu eno kugha kuthau shipe kya? Nono Ijipmi heqhive ketoi noye nighi iheqhive niye ani kesha?” ipi pa khochile. Ikelo Muse ye musaveno ishi kumsuve, “Ino kiu shiveakeno timino ithivea kena!”

¹⁵Kughou akukauno tipau chilu kelo paye Muse heqhivenike phuwuve, ikemu Muse ye pove eno Media yeghilo acheuve. Ghulo lakhi Muse no azukikhe lakhi phivilo iqa akelo,

¹⁶Media lo achineu Jethro nonga pano tsuni azu shophe pesu panoqo papu bheri ngo ane qo tsunike azu khulo lesutsuniye tilehi ighi.

¹⁷Ikemu bherikhemi kutamino Jethro nongaqo hapupove. Tile Muse no tipaqo hakhotsu eno panoqo bheri ngo ane qo azu piyetsu.

¹⁸Panonguno panoqo papu lau ideighikelo pano iniju, “Nonguye kishi puzu ishiye itheno ighivea kya?”

¹⁹Panonguno pi, “Ijipmi lakhino bherikhemi kutamiqo launo nihakholuke eno pano ningu ghenguno azu shophetsuke eno niwu bheri ngo aneqo azu piyetsuke.”

²⁰Apuno panoqo vilo iniju, “Tishiaye paye khile anikya? Nonguye kushiye timi tipau hula qhive kya? Ningu gholo kuchu kusho shipe kepushi wuno pa kusaghilo.”

²¹Ikehu Muse ye tile acheuve nikeu pulove eno Jethro no panga Zipora pelo Muse sasu kulakupu shipenike tsue.

²²Lino anu lakhi punutsu eno Muse no ishipi, “Niye inaghami yeghilo kupokichemike ghenguno ino paje Gershom kutsuni.”

²³Ampe kutomo thiu Ijip lo akukau thive, ikemu Israilmiye timi qeke launo atuthughi shephemlano kuphu peniaye igha muku acheke. Panonguno igha muku keu iku Alhou tove,

²⁴eno panonguno atuthu shephe mlano ighache keu chiluve eno pano Abraham, Isak eno Jakob sasu puloshoqhi shikeu kumsu chilelu.

²⁵Israilmi no timi qechekeu pano ithulu eno panoqo ghenguno kumsu kutoju tsuke.