Read Sumi Naga IPEKULU 21 Bible Online

IPEKULU 21 - Sumi Naga bible

IPEKULU 21

¹“Israilmi gizulo noye ayezah hipaqo qhitsulo:

²Nonguno Ibrimi aqemi lakhi qhulu nikelo paye ampe tsugho no qepelo. Ampe akutsuniulo paye ame kiumu lochilekeu shipemono phepuwuvelo.

³Paye kulakupu shimphi lono no qeu shilu aye pano noqhive ke ghulokilo paye pagholo pa nipu sasu wu vepe kevilo; ikemu pano no qeu shimphi lono kulawuvekemi shi aghiaye paye pa nipu sawulu nani.

⁴Pa mpiuno pa nipu lutsu eno pa nipuno ati anuli lhoqhi tsu aye anipu ngo li ti anuliqoye ampiu wuke eno timi tipauye pa likhi wulu nani.

⁵Ikemu aqeu tipauno paye pa mpiu ngo pa nipu eno pa tianuli qhuivulaikeu mutsuqhei pilu puzu eno pa phe puwuve penishimo aye,

⁶pa mpiuno aqeu tipau sasu Alhou kilo wulo eno papelo ahukikha momu ahukikha kucho mungu pe puthugho peno pa mipiu pelo ayi pesu pa kini vuphetsulo; tithiu paye akuxu kupujulo pa mpiu qeu shive nani.

⁷“Timi lakhino panga totimi pesu aquaxemi lakhi shipenike jesuve aye li ye aqemi kiptimi lakhi toi puwuve keu shimo nani.

⁸Li pesu pa nipu shini shikemi lakhi vilo jesuveni, ikemu timi tipauno li jupe alomo aye liye lipu vilo jekidesuveni; likimiye inaghami kutami lau li pesu jekidevemoni, kughengu paye achipikumo lono li peithave akeke.

⁹Timi lakhino pa ghenguno aqelimi lakhi qhu aye paye pa nga toi li peitha masa.

¹⁰Timi lakhi no anipu amishiu luve aye pa nipu akuchou laughi achuqupu, aphi mini eno li chipiu puzuu tho lono aqhemi shi tsuache masa.

¹¹Pano li lau shikepuqo shikupu tsumo aye paye li phepuwuve keume kiumu lukepu kumoe.

¹²“Timi khuuno kutami hepithiveni keno pa ghi pithive masa.

¹³Ikemu kutungu lukeu thono pithive niye shiaghimo aye, paye ino nongu ghenguno a-a kishepe qhitsukeu alo powuluve nani, tilauye pa shou kiumu shimo nani.

¹⁴Ikemu timi lakhino amlo ideve puzu puthaputsano kutami lakhi heqhi pithive no pa xalu peniye iwu akipti alo posu wuve namu pa pithive masa ke.

¹⁵“Timi khuuno papu momu paza henikeno tipau ye pithive masa.

¹⁶“Timi khuuno kutami kughalu no jekideni momu pa qeu shipe nikeno pa pithive masa.

¹⁷“Timi khuuno papu momu paza musuinini keno pa pithive masa.

¹⁸“Kichighilu kelo milakhino atu momu pau putshu pesu kutami shou hepuku keulo timi tipau thimo aye pa ghi ghimeqhi akepu kuhae. Timi khuu shou hepuku keno tipauno suauveni

¹⁹ikemu athiuye ithu puzu akusu kutucho pesu khalacheu ala cheiqho iqilu aye, timi khuuno pa he keno tipau ye suakeuno ado khijehi aju pukaveni keno tipau lochileni eno pano vithaimoke kutolo pa tucho hejuni.

²⁰“Timi lakhi no akusu ikhi pesu pa qepuu hekelo na pa qeliu namu tipa-a lono chhoi thive aye, ampiu tipauye aghime tsulo.

²¹Ikemu aqeuno atsala lakhi momu kini dolo thimo aye ampiuye aghime tsukevilo. Pa mheqive keu huno aghime tsukeu lukumkha shiveake.

²²“Timi khami kichighi ake lono anga mishipu akeu ghuzaveno alalo hauveni ikemu kutau kiulomu shipusakeu shimo aye, li ghuzavekeu timi shou li kimino kiu khunikeno kughakuthamino xathatsu keu kiqi lono loveni.

²³Ikemu anga shipusake likhi kumono aza ampilo izaveaye aghime tsunikeuye akuxu thelilo akuxu,

²⁴anhethi thelilo anhethi, ahu thelilo ahu, au thelilo au, apukhu thelilo apukhu,

²⁵pitikeu thelilo pitikeu, azaku thelilo azaku, hepungokeu thelilo hepungokeu shini.

²⁶“Timi lakhino pa qeu kiptimi na totimi pinamu anhethilo hetsu kelono anhethi hechhevetsu aye paye anhethi tipau lochile keu me shi ghi aqeu tipau phepuwuveni.

²⁷Pano aqeu hu lakhi helave tsuaye ahu tipau lochile keu me shi ghi aqeu tipau phepuwuveni.

²⁸“Amshitsu lakhino khuuala shoqhi pithive aye tiye atu pesu veqhi pithivelo eno tipau shi chukevilo, ikemu tipau ampiuye aghime tsukevilo.

²⁹Ikemu amshitsu tipauno timi shoqhikeu lhoaye shi acheni eno puzuuno tipau mpiu kutughuvea ikemu tipau khathape qhimove puzu tipauno khuala shoqhi pithive aye, tiye atu pesu veqhi pithilo eno tipau mpiu ghi heqhi pithivelo.

³⁰Tishie pinamu, ampiu pelo pa kuxu xaluvepe kepu shi asuchuni keu shiaye paye khuakeu metho tsumasa.

³¹Amshitsuno itimi momu anga shoqhiveni kelo ayezahye athoke.

³²Amshitsuno aqemi kiptimi momu totimi shoqhi pithive aye tipau pighiuno aqeu pighiu lau tsandiyi atachu shighi pesu lochileni eno amshitsuye atu pesu veqhiveni.

³³“Timi lakhino aqoh nhapuakeu ikhive momu aqo chhu puzu tipau nhamove no tipaulo amshitsu momu gadaha lakhi ilulove aye,

³⁴paye lhoxu tipau ghenguno lochile masa. Paye lhoxu pighiu lochile veno lhoxu thivekeu qhiluve nani.

³⁵Timi lakhi mishitsuno kutami mishitsu shoqhi pithivetsu aye, pamaye amshitsu xuakeu jeveno jelukeu pesu kijethaluni; pamaye thive keu mishi kumoghi xapha kijeni.

³⁶Ikemu amshitsu tipauye alhoaye lono timi shoha chekeu ithi ani eno tipau mpiuno khathape qhimo napiaye paye kutamino amhe qivekeu lonike pa mishitsu kutau pesu tsu chileveni eno thive keu lhoxuye pano qhiluve nani.”