Read Sumi Naga IPEKULU 23 Bible Online

IPEKULU 23 - Sumi Naga bible

IPEKULU 23

¹“Akimki uyeu tsa pesu kulha kevilo eno alhoksa shivekemi kuphu kevilo.

²Aqo akichiu shi aghinamu panoqono akumou shi aghi aye tipaqo papewu kevilo momu kuchou xakutha suchighiveni keulo ashepe shitsu kevilo;

³momu kumlhomi shou kughatha akelo pa lau agi jukevilo.

⁴“Nono oghumi mishi momu gadaha kughape cheghi keu ithulu kelo palau saideghi tsulo.

⁵Pawu gadahano ape puchekeu qholo iluqive aye tipau sunheqhe pukutsulo; vejoi wuvekevilo.

⁶“Kumlhomi lakhino kughakutha alo ighikelo kuchou xakutha pa tsumove kevilo.

⁷Akimki shi nguku kevilo eno kiumu pimimo kemi pithive kevilo, kughengu alhoksa tikithipu shikemiye ino leqhive nanike.

⁸Kulugho lukevilo kughengu kulugho huno timi pelo achipiu shinikeu lo anhethi kighichevetsu cheni eno pimimokemi vehupuqo hexapiniyi vetsu chenike.

⁹“Inaghami peitha pusa kevilo; inaghami kiu toi keno nonguye shijuveake, kughengu nonguye Ijip lo inaghami shi acheke.

¹⁰“Ampe tsugho dolo nongu luqalo yisulo eno tipaulo ipeghikeu pekutsululo,

¹¹Ikemu ampe akutsuniuye tipau mlaphemono qhivelo eno tipaulo ipeghikeu pekutsu keu shikevilo. Kumlhomi pelo tipaulo kiu ipeghikeno chupelo eno tughashi pelo tile kiu qhipaghini keno chulupelo. Nowu atsayilu ngo oliv suboqo ghi tipaphi shipelo.

¹²“Apinye dolo atsala tsugho mlalo ikemu akutsuniu tsalaloye mulakevilo, tishianguno noqemi ngo inaghami noghengu mla akemiqo eno nowu atsu-aqu pelo ghi akulho qhilupenike.

¹³“Ni, AMPEU no nongu vilo pivekeu kumtsu inilo. Kutau lhouqo lau khuini kevilo; panoqo je pinamu jekukevilo.

¹⁴“Ampe lakhilo igihu keu shi tiqhetini kuthu ikhilulo.

¹⁵Nonguno Ijip lono ipelukeu qhi Abib lo ino ahza nongu tsuvekeu kiqi lono kholaqhi sumokeu ghulhu ikhilulo. Hipau ghulhu atsala tsuni dolo kholaqhi sukeu sho khilemu chukevilo. Akumllagho pemo keloye imllanike ighikevilo.

¹⁶“Nonguno ghile huthukeu ghulokilo Ghile Tiqhetini ikhilulo.”

¹⁷Ampe atsutsu tiqhetini hipano kuthulo kiptimiqoye nongu Lhou, AMPEU, mllanike ighimasake.

¹⁸“Nonguno aghashi keulo kholaqhi sukeu shope imlla kevilo momu aghashikeu lhoxu thaye thanau kutolo pekishe kevilo.

¹⁹“Ampe atsutsu nonguno athi lutughiu pesu nongu Lhou AMPEU kilo sughilo. “Bheriti momu aneti pesu tipau paza kichhizu lono kumqho kevilo.

²⁰“Nonguno izuwu chekeulo sushokulu apenike ino kungumi lakhi nongu zuu puwutsuni eno ino kutope qhipuakeu-alo nongu saighini.

²¹Pa jukutolo eno pa gho lulo. Pa shou hebide kevilo kughengu ino pa puwu anike eno paye hebidekeu kipimi qhitsumo nani.

²²Ikemu nonguno pa gholu eno ino ahza tsukeu lu aye ino noghumi kumtsu sasu aghu shive tsu nani.

²³Iwu kungumino nongu zuu wupuzu nongu sasu Amarimi, Hatimi, Perizimi, Kananmi, Havimi eno Jebusimi yeghilo ilo nani eno ino panoqo kutsaleve nani.

²⁴Pano lhouqo lau itsaqi mlla kevilo eno panoqo chine khu-aye hakevilo. Pano lhouqo kutsalevelo eno panoqo wu achine tuqu khetsukucho kuboleve tsulo.

²⁵Nonguno nongu Lhou, AMPEU mlla aye ino achuqupu ngo azu pesu nongu kumghatsuni eno nowu kusukini kumtsu ikhisuwuve tsu nani.

²⁶Noyeghilo totimi khuumu anga alalo hauve keu shimo nani momu anuha shimo nani. Ino nongu pelo axu shulupe nani.

²⁷“Timi khunoqono nongu mujo chileni keno ino tipaqo pelo imsave penani; nonguno sasu aghu shikemiqo gholo ino kubangve keu sughive tsu nani eno ino noghumi kumtsu nongu launo idechile susu povepe nani,

²⁸Ino noghumi pelo izuvulai keulo suve nani; eno nonguno azuu haighikelo ino Havimi, Kananmi eno Hatimi halepheve tsu nani.

²⁹Noye ampe lakhi lono panoqo halephe ni chemoe; ino tishi aye ayeghiye khumu kuhaveno nongu ghenguno tughashino kumzapu shive nani.

³⁰Tishinike zuqhulo, ino kititino panoqo haphetsu nani tishianguno nongu kutomo shikethiuno ayeghi pesu nowu shilupenike.

³¹Ino noyeghi lughi pelo Aqaba Zukichikha lono Eufrati Ghoki kutolo eno Azughi kije lono Asayeqha kutolo pekhowolu penani. Ino nongu pelo tipa yeghilo kughuna akemi shou akuka alupe nani eno nonguno azuu haighi keulo panoqo hapheluve nani.

³²Panoqo sasu momu pano lhouqo sasu pulokileve keu tsa kuptsa tha kevilo.

³³Timi tipaqo pelo noghakhulo kughunauve pekevilo. Nonguno tishi aye panoqono nongu pelo ishou axine shipe nani. Nonguno pano lhouqo mlla aye nongu ghenguno tile alichhe lhoksa shive nanike.”