Read Sumi Naga IPEKULU 24 Bible Online

IPEKULU 24 - Sumi Naga bible

IPEKULU 24

¹AMPEU no Muse vilo pi. “Naghutolo ilau ikughilo no ngo Aron, Nadab, Abihu eno Israilmi sakiphemi lhotsuni; eno nonguno putosuu chephi lono itsaiqi no mllalo.

²Kutami gholo khumu sumo puzu olikhino ipunu khoi ighilo. Timiqoye ogholo mu ikughipekepu kumoe.”

³Muse no timiqo lau ighi puzu AMPEU no ahza tsukeu eno shilo pikeu tsa kumtsu pesu pike ike timi kumtsuno ishi khochile, “AMPEU no pikeu kumtsu ninguno shinike.”

⁴Muse no AMPEU zahkutsu kumtsu yepe qhive. Thanau itheno pano naghuto pukhu phivilo akiptia lakhi shipe qhino Israil shiayeh chighikini jehi pano atuqu chighi kini pewo qhi.

⁵Tipathiu pano lhothemiqo puwu eno panonguno AMPEU lau piti pesu agha shikeu tsue eno kuposhukulu gho mllakeu shi amshi tsu pesu aghashi.

⁶Muse no lhoxuqo jih tuxa pesu akhulo su eno tuxa pesu akiptia shou kuzute.

⁷Tishi puzu puloshoqhi kaku, khilehi AMPEU zahkutsu yepuakeno pano ikhilu eno timiqo lau asutsa vekipighi tipau phisu. Timiqono pi, “Ninguye AMPEU gholunike eno pano ahza tsukeu kumtsu shini.”

⁸Tipathiu Muse no akhu lono ahji ikhilu eno timiqo shou kuzupuku. Pano pi, “Ahji hipauye AMPEU no nongu lau ahza tsukeu mekha ani.”

⁹Muse ngo Aron, Nadab, Abihu eno Israil sakiphemi lhotsunino naghutolo ikuve

¹⁰eno panonguno Israil Lhou ithulu,

¹¹Israilmi sakiphemi hipaqo no Alhou ithulu kelo ghimemo eno pa pukhu qholo safirtu qhapua keuno atsutsu kutsughu toi ithulu no panongu kumtsa chu shoe.

¹²AMPEU no Muse vilo pi, “Ilau naghutolo ikughilo eno nono hilau akelono ino atu pha kini otsu nanike; tipaulo timiqo kutsu kepu tsa ayezah kumtsu ino yepuanike.”

¹³Muse ngo pa kukuphuu Joshua pamano kutoluve eno Muse no akimthe naghutolo ikuche.

¹⁴Muse no sakiphemi vilo pi, “Nikujono ideighimoke kutolo aghazulo nikhe aghilo. Aron ngo Hur pamano nongu sasu anike khualano kutsame keu xatha kepushi aghiaye panoqo lau wulu nani.”

¹⁵Muse no Sinai Toghilo ikuve eno khungkusuno tipau kuzu pholuve

¹⁶AMPEU no sa-akeu saghu saghui keu kuvuno naghuto shou iqighi. Israilmi ghenguno akuvu tipauye naghuto kutsuqa lo ami iquakeu toi ithuluake. Khungkusuno atsala tsugho naghuto kuzupholuve eno atsala akutsuniu lo AMPEU no khungkusu lono Muse kuluve.

¹⁸Muse no naghutolo khungkusulo ilove. Tilehi paye putho pucho atsala lhobidi tilau ngove.