Read Sumi Naga IPEKULU 28 Bible Online

IPEKULU 28 - Sumi Naga bible

IPEKULU 28

¹“Omu Aron ngo panu Nadab, Abihu, Eleazar eno Ithamar ishi ku-saghilo. Israilmi launo panoqo kutashivelo tishianguno panonguye iqemi shipenike.

²Omu Aron pelo angualei eno juvi penike achinemi phimini mlalo.

³Atshamgha shikithimi kumtsu kulo eno panongu vilo Aron phimini mlalo pilo, tishianguno paye aqemi lakhishi ikumla shipeni eno pa ikhiphe tsuve penike.

⁴Panoqo vilo amla kuxa ngo ephod phimini, aphikuzu, ayeh shisukeu phikuzu, akutsu kunha eno apokha mlalo pilo. Panonguye Aron ngo pa nuliqo ghenguno aphimini hipaqo mla pelo tishi anguno achinemi shi iqelu nanike.

⁵Atshamgha kishimiqoye tsulakibiyei keu, hughai keu, khuchikeu mhi, shunayi no shikeu aye eno phepheikeu phi peithapelo.

⁶“Panonguye tsulakibiyei keu, hughai keu eno huchui keu mhi ngo shunano shikeu aye eno phepheyi keu phi ayeh shisukeu pesu ephod phi mini mlalo.

⁷Abighilo xipu kepu ashe kini shilo, tipauye ashe kumtsu medano kumkhopu kepushi.

⁸Akivishi ipumihei ghokeu aphi atho pesu apokha lakhi ephod philo kime pukulo eno tipau sasu ashi lakhi shi kepushi.

⁹Karnelia-tu kini lupuzu Jakob nuli pano chighikini je tilehi yepukulo,

¹⁰tiye akichiu ayitiu shi ghi pheyi aje tsughono atu lakhilo eno tsughono atu lakhiulo ishi yesulo.

¹¹Achi kumlami shitsami lakhi saghino Jakob nuliqo je atulo yepuku pelo eno atu qoye shunayilo meda pukulo.

¹²Tipaqo pesu abighilo xipukeu ephod phi lo sulo, tiye Israil shiayeh chighi kini zuqhu shikeu shilo. Hitoi shi puzu Aron no panoqo je pabighilo xapu pelo, tishianguno ni AMPEU no pulhapuju iwu timiqo kumsulu nanike.

¹³Atu meda puku kepu shunayipa kini shilo

¹⁴eno shunayi kutsughu pesu pilikeu kighi toi alla kini shi lo eno shunayi-palo medapukulo.

¹⁵“Achinetou pelo Alhou pulou ithinikeu lo peithape kepushi amla kuxa lakhi mlalo. Tiye ephod mlakeu nhemugha pesu shilo eno ayeh shisukeu ghi aphiphi shilo.

¹⁶tiye kodibo shilo eno kuqhuchhe kini shilo, akushu lau ghi akije lau ghi sentimiter muku kinini shilo.

¹⁷Tipau shou akughupu tu ajo bidi shi meda pukulo; ajo atughulo atu hipaqo medapukulo: rubi, topaz eno gernet;

¹⁸ajo akiniulo: emeral, safir eno daimon;

¹⁹ajo akuthuulo: turkois, agat eno amithis;

²⁰ajo abidiu lo: beril karnelia eno jesper. Hipaqoye shunayi palo meda pukulo.

²¹Atu hipau chighikini lakhikhilo Jakob nu je lakhi yepukulo, tiye Israil lagha zuqhushi qhilo.

²²Amla kuxa ghenguno shuna tsughukhui keu yila pilivekeu toi mlalo.

²³Shunayi pesu abocho kini mlalo eno amla kuxa kungu kudau kime pukulo,

²⁴eno shuna yila pesu abocho tikumalo kumkho pukulo.

²⁵Ayila she kutau kini akeu pesu kunguu abighilo ephod akeulo kumkho pukulo eno titoi shipuzu tiye agizuu kudau ephod lo kumkho pukulo.

²⁶Tishi no shunayi bocho mlalo eno tiye amla kuxa ashe chekulo alou kudauno ephod shelo akeulo meda pukulo.

²⁷Shunayi bocho itaghi kini mlalo eno azuu aqhou kudau abighilo xipukepu kighi kini akeulo atsughuku phivilono tsughudalo eno tiye apokha jukivi shi akeu sholono shilo.

²⁸Amla kuxa shunayi bochoqoye ephod lo abocho akeqolo tsulabiyei keu phi pilikeu pesu kumkho pukulo, tishianguno amla kuxaye apokhalo dipesu ngono ijove pemoniyeke.

²⁹“Kughou Aron no Akimthe-alo iloni keno paye amla kuxa hipau Israil lagha chighi kini je akeu pepuni, eno tishianguno ni AMPEU no pulhapuju iwu timiqo kumsulu nanike.

³⁰Urim ngo Thumim[3] pesu amla kuxalo qhilo, tishi anguno Aron no izulo iloghi kelo tipaqo xapu penike. Atuqhudo tipaulo paye pulhapuju amla kuxa hipau pepuni tishianguno pano Israilmi ghenguno ipulo kimchilu penike.”

³¹Ephod medapukeu phikuzuye kumtsu tsula biyei keu phi pesu mlalo.

³²Tipaulo akutsu ghenguno akighipe shilo eno akighipe tiye ixupemoni ke akichi hovelo.

³³tipau aqhou kudau ashelo, tsulakibe ngo hughaikeu eno huchui keu mhi pesu khaghatu xathi shipesu tshuqhilo eno shunayino shikeu muqubo pesu hekivelu ghi tshuwolo.

³⁵Aron no achineu shiakelo paye hipau phikuzu umasake, pano kughono akimthe alo izulo iloghini keno momu pano tipau lono ipeni keno, amuqu ghugha chiluve nani eno paye pithivemo nanike.

³⁶“Shunayi tsughukhui keu pesu achila lakhi mlalo eno tipau shou ‘Ikhiphepe AMPEU Tsuvae’ ipi yepukulo.

³⁷Tipau pesu akutsu nhapukeu agizu kudau tsula biyei keu aye kipili pesu kumkholo.

³⁸Aron ye tipau pa kishelo pepulo tishianguno Israilmino akumllagho pephepe itsu keu tsala momu timiqono tipaqo pesu imllakeulo kuquve pinamu, Ni AMPEU no ikhilu tsu nani.

³⁹“Aron phikuzuye phepheyikeu phi akivi gholo, eno akutsu kunha ghi phepheyi keu phikivino shilo eno apokhaye aye shisu ghi shipelo.

⁴⁰“Aphikuzu ngo apokha eno akutsu kunha Aron nuliqo ghenguno mlalo, panoqo pelo angualei eno jukivi shipenike.

⁴¹Aphimini tipaqo pesu omu Aron ngo panuliqo pu-ulo. Tithiu pano pesu akimthepu eno ikhiphetsu keu shi oliv teli pesu panoqo kutsulo nutsulo, tishianguno panoqo pelo achinemi shi ghi iqepenike.

⁴²Panoqo ghenguno phepheyi keuno amini ikhonhei keu shilo tiye achita lono akhonhe kuto, tishi anguno panoqo phi kumsa nhapu penike.

⁴³Aron ngo panuliqoye ino ngochekeu phikilo ilonikelo momu Akimthe-alo achinemi shi iqenike akiptia kupunu wunikelo pulhapuju tipaqo pepu masa, tishi anguno panoqo phikumsa ithuluve pekeu lono panoqo pithive nosake. Hiye Aron ngo pa polo kughukomi ghenguno alholo peitha kepu yeh ke.”