Read Sumi Naga IPEKULU 29 Bible Online

IPEKULU 29 - Sumi Naga bible

IPEKULU 29

¹“Aron ngo pa nuliqoye akimthe shi ikhiphe tsu puzu achinemi shi iqepe nike nono hipau shilo. Noye tukutiye kuhakeu amshitsu alhothe lakhi eno bheritsu kini ikhilulo.

²Asho mukhu akiviu peithalo ikemu kholaqhi peitha kevilo, eno oliv telino ashopa hami mulalo eno hamiye tipau sumokeu pesu shilo eno hamiye teli pesu hedano pugha putho lo.

³Tipaqo pesu ashoghilo supuzu nonguno amshitsu ngo bheri kuma aghashikeu gholono tipaqo pe imllalo.

⁴“Ino ngochekeu Phiki ikulolalo Aron ngo pa nuliqo saghilo eno panoqo vilo achineyeh zukuchhu shilo pilo.

⁵Tipathiu no Aron pelo achinemi phimini, aphikuzu ngo ephod phi, ephod shou ukeu phikuzu, amla lo xipukeu eno apokha pepu pelo.

⁶Akutsu nhapu kepu pesu pa pipelo eno akimtheshi tsuve keu michi yepuku keu, ‘AMPEU lau ikhiphe tsuvae’ ipikeu pesu tipau lo tsughada pukulo.

⁷Tipathiuno nukepu teli pesu pa kutsulo lesu tsulo eno nuphove tsulo.

⁸“Pa nuliqo saghi no aphikuzu pu-ulo;

⁹panoqo pokhalo aphi chighiche khapipelo eno akutsulo nhapukepu khapipelo. Hipaphi lono noye Aron ngo pa nuliqo pesu akimthe shi qhilo. Panongu eno pano lagha no alhokupujulo achinemi shi iqemasa.

¹⁰“Ino ngochekeu Phiki gizulo amshitsu saghilo eno Aron ngo pa nu-liqo pelo a-u pesu tipau kutsu shou bepelo.

¹¹Ino akimthe shi achekeu Phiki gizu lono amshitsu ghiqhilo.

¹²Amshitsu jih hami lupuzu ou loti pesu akipti alo aku akeulo dilo. Tishi no ahji aghikeu kumtsu pesu akipti-a bolo leqhivelo.

¹³Tipa shelo, kighinoli kuzupe aghikeu atha kumtsu eno aloshi leqhi akiviu ngo amchi lothi kuma ishi atha gholono tipaqo pesu akipti-alono pitipe imllalo.

¹⁴Ikemu amshitsu shi ngo ayiko eno kighinoliye akubalau no pitilo. Hipauno achinemi xine ikhive tsuni keu kumllaghoke.

¹⁵“Bheritsu lakhi lulo eno Aron ngo panuliqo vilo tipau shou a-u belo pilo.

¹⁶Tipau ghiqhilo eno tipau jih pesu akiptia ako bidi kujo shou kuzupukulo.

¹⁷Bheri tipau aleqhi shi ghethalo; tipau kighinoli ngo aluko kuma qhuvelo eno tipaqo pesu akutsu ngo aleqhi kutau qo shou belo.

¹⁸Achuqupu kumllagho lakhi shi bheri tipau akuchopu pitivelo. Hipau kumllagho xoye ipulokutu chenike.

¹⁹“Bheri kutau hu lulo akimthepu shikeulo ikhiphe tsukeu bheri hu eno Aron ngo pa nuliqo vilo pa noqo u tipau kutsu shou bepelo pilo.

²⁰Tipau ghiqhi lo eno tipau jih hami pesu Aron ngo pa nuliqo akini niqe ajeu ditsu, auloqu ajeu eno apukhu loqu ajeu ditsulo. Ahji aghikeu thaqhuye akiptia ako bidi qha kumtsulo kuzu te pukulo.

²¹Akipti-a lono ahji hami lulo eno nukepu teli hami lulo eno tipau pesu Aron ngo pa phimini eno panuliqo ngo panoqo phiminilo kuzute pukulo. Tithiuye pa eno pa nuliqo eno panoqo phiminiye ilau akimthe shiveniake.

²²“Bheri tha ngo atha akeu ashomhi, kighinoli kuzupe akeu tha eno aloshi leqhi akiviu,amchi lothi ngo tile atha akeu eno ajeu akeu luko ngo ishi ghetha kututa shilo.

²³Asho ashoghi lakhi pesu imllavekeu lono ashopa jelilo lakhikhi ikhilulo: oliv teli pesu shikeu sho lakhi ikhilulo: oliv teli pesu shikeu sho lakhi eno tipau telino shimo keu sho lakhi eno pugha keu sho lakhi ishi lulo.

²⁴Hipaqo kumtsu pesu Aron ngo pa nuliqo ulo sutsulo eno panoqo vilo tipaqo pesu pakutakeu gho chhekeu lakhi shi itsulo pilo.

²⁵Tithiuno panoqo launo tipau ikhilu no piti mllakeu gho shou akiptialo qhipuzu achuqupu kumllagho lakhi shi ilau piti pesu tsulo. Hipau kumllagho xoye ilokutu chenike.

²⁶“Hi bheri lupuzu pakutakeu kumllagho shi ilau akimthe shi tsulo. Ashi leqhi hipauye owu shilulo.

²⁷“Kughono achinemi lakhi akimthepu shini keno, tipau kimthepu shikeulo amlashi ngo aluko kuma peitha keu pesu pakuta keu gho shi ilau ikhiphe tsu lo eno achinemi ghenguno tipau qhilo.

²⁸Hiye khilemu kili kithemo keu shi ino xathave tsukeu kughou iwu timiqono kuposhukulu kumllagho shinikeno amla shi ngo aluko kumaye achinemi sala shi nani. Hiye timi qono Ni, AMPEU lau agho tsukeuke.

²⁹“Aron no thivekethiu pa phiminiye pa nuliqo pelo panoqo akimthepu shikethiu no upe kepushi pekishe pechepelo.

³⁰Aron nu khipauno pa qhusuni keno eno khuuno ino achekeu Phikilo Akimthe-alo iqenike iloni keno pano atsala tsuni ghenguno aphimini hipaqo pepu masa.

³¹“Aron ngo pa nuliqo akimthepu shikeu lo bheri peithakeu ashi pesu akimthe-a lono lholo.

³²Ino ache keu Phikilo ikulola lono panonguno ashoghilo asho aghi keu gholono tipau shi chumasa.

³³Panoqo pesu akimthepu shikelo axine pevekutsuu chinikeulo kiu peitha keno tipau panonguno chu nani. Achinemi lakhino achuqupu hipau chulu nani kughengu tiye akimthe shiveake.

³⁴Ashi hami momu asho hami thanau inaqhe kutolo chukhamono aghi aye tiye pitive masa; tiye chukepu kumo, kughengu tiye akimthe shiveake.

³⁵“Aron ngo panuliqo akimthepu shinike mutsuqheino atsala tsuni chininikeu ino ovilo ahza tsuveke toi shilo.

³⁶Ghulo atsutsu, axine qhivetsu penike ghenguno amshitsu lakhi pesu aghashikeu kumllagho shilo. Hipau no akiptia thakimthe nani, tishi no tipau akimthe shipenike oliv teli pesu nulo.

³⁷Atsala tsunilo ghulo atsu-tsu hipau shilo. Tithiuye akipti aye qhoi mitheve nani eno timi na kiu kiu pinamu tipau dilu keuye tipau kimthe kukano kutsave nani.”

³⁸Tamono tsalakipetsulo bheriti ampe lakhi shive keu kini pesu akiptialo aghashilo.

³⁹Bheriti lakhi pesu inaqheno aghashilo eno lakhino avelauno aghashilo.

⁴⁰Bheriti atughiu gholono asho kukubo kilogram lakhi pesu kiumu kitemokeu oliv teli liter lakhilo kunuveno mllalo. Atsayiji liter lakhi pesu akumllagho shikeulo leqhilo.

⁴¹Bheriti akiniuye avelauno aghashilo eno tipau gholo inaqhe mllakeu lo qhemi asho ngo oliv teli eno atsayi ji pe mllalo. Hiye ni AMPEU lau achuqupu kumllagho lakhike eno tipau xoye ilopivitsu cheni.

⁴²Tamono piti mllakeu hipau pesu ino achekeu Phiki ikulola lono igizulo mllalo. Tipa-a lono ino iwu timiqo sasu kusholuni eno oputsanike.

⁴³Tileno ino Israilmi sasu kusholuni eno ino akeulo saghu saghuikeu kuvuno tipa aye akimthe shitsu nani.

⁴⁴Ino Aphiki ngo akiptia shikimthe nani eno ino Aron ngo pa nuliqo pesu achinemi shi iqe penike panoqo kutave keu shi qhini.

⁴⁵Ino Israilmi gholo ache nani eno niye panoqo Lhou shive nani.

⁴⁶Niye panoqo Lhou AMPEU, Ijip lono panoqo saipeghi keu kepi panonguno ithi nani ikehu niye panoqo gholo ache kepu shilu nani. Niye panoqo Lhou AMPEU ke.