Read Sumi Naga IPEKULU 31 Bible Online

IPEKULU 31 - Sumi Naga bible

IPEKULU 31

¹AMPEU no Muse vilo pike,

²“Ino Uri nu Bezalel kisheluvae, pasuye Hur eno paye Juda laghamike;

³eno ino ighungu pesu pa shou lepukuve tsuake. Vethakulu, phui thaikeu eno atshamgha shitsa shi shithikepu,

⁴akoghe ahila koghe kughu shi shuna, tsandi eno alazayi shisunikeu,

⁵ghope qhinike achiku yethanikeu, asu pesu ayeh shisuni keu eno kutau jukivi pu jeli shisukulupu kumtsu ino patsuvae.

⁶Ino itaghi Dan lagha lono Ahisamak nu Oholiab kishelu puzu Bezalel gholo mlapeni keu shivae. Atshamgha shikithimi kutamiqo ghi shitsa shi shikulupu ino tsupani tishianguno ino mlalopi ahza hipaqo tsukeu kumtsu panonguno mlalu nanike:

⁷ino achekeu Phiki, Puloshoqhi Bohu eno tipau kunha, Aphikilo pepimhe kepu thimeqo,

⁸akibepu eno tipau shou bepuakeqo,muqhamiqhi keu shunano shikeu akulu kibepu eno tipaulo peitha chekeqo, tsungquikeu mukhu pitichekeu kiptia,

⁹akumllagho pitichekeu kiptia eno tipaulo peitha chekeqo, chithakhu eno tipau ghope qhichekeua,

¹⁰Aron ngo pa nuliqo no achinemi shi qekeulo pepu kepu achinemi phimini jukighilepu,

¹¹nunikeu teli eno akimthea ghenguno ngoyini muna keu ta. Hipaqo kumtsu shikeu lo panonguye ino ahza otsuvekeu kiqilono athoshi shipelo.”

¹²AMPEU no Muse vilo ahza tsukeuno

¹³Israilmi vilo ishi pilo pike, “Ino akulhokiqhi tsala, Sabat pelulo, kughengu hiye nongu ngo idolo alho kuthu ghenguno amchipu lakhike tiye ni AMPEU no nongu pesu iwu timi shilu pekeu piyeniyeke.

¹⁴Nonguye akulhokiqhi tsala pechelo kughengu tiye akimtheke. Khuuno tipau pemo no tipa tsalani akumla shinikeno pa pithive masa.

¹⁵Nonguno akumla shikepu shi atsala tsugho anike ikemu akutsuniuye akulho qhinike ghenguno iquighai keu tsala ilau ikhipheve tsukeuke. Khuuno tipa tsalani akumla shinikeno pithive masa.

¹⁶Israilmiye puloshoqhi michipu lakhi shi hipa tsala pekepuke.

¹⁷Hiye Israilmi ikujodolo iqemokeu michipu lakhi, kughengu ni, AMPEU no kungugha ngo ayeghiqha kuma atsala tsugho lono lhophe tsuke eno atsala akutsuniulo niye akumla shitaveno akulho qhike.”

¹⁸Alhou no Muse sasu Sinai Toghilo kuptsa tave puzu atu pha kini pesu patsuke, tipau shou Alhou ampino ahzaqo yepukue.