Read Sumi Naga IPEKULU 33 Bible Online

IPEKULU 33 - Sumi Naga bible

IPEKULU 33

¹AMPEU no Muse vilo pi, “No eno nono Ijip lono saipeghi kemiqoye hipa-a qhiveno chevelo ino Abraham, Isak, Jakob eno pano polo kughukomi tsuni keu shi tushoqhi pua keu yeghilo wulo.

²Ino kungumi lakhi puwu no nongu la kiche piyepe nani. Ino Kananmi,Amarimi, Hatimi, Perizimi, Havimi eno Jebusimi haphevetsu nani.

³Nonguye aghuma kua eno kini kulu yeghilo wucheni. Ikemu ni ampiye nongu sasu wumoe kughengu nongu timiye kuthovi keqoke, ino alalo nongu kutsave nosake.”

⁴Timiqono hipau chilu kelo panonguye mloqauve eno khilemu achi nhemgha pepumove.

⁵AMPEU no Muse pelo panoqo vilo pipenike ishi ahza tsu, “Nonguye kuthovi kemiqoke. Ino ado kitila likhimu nongu gholo kumtsa wunapi aye niye nongu qhoi kutsaveluvike. Itehiye nongu philo achi nanuqo ikhivelo eno nongu pesu kiu shikepu keno ino xatha nani.”

⁶Panonguno Sinai Toghi qhiveno wuve kethiu Israilmiye achi nhemgha pepumove.

⁷Kugho kughomu Israilmino aghazu shipe qhini kelo Muse no akimthe Phiki pesu aghazu lono putosuu shipe qhicheke. Tipau pesu AMPEU no akeu Phiki ipi kuche eno khualano AMPEU sasu kushonishi aye tilau wuve cheke.

⁸Kugho kughomu Muse no tikudau wuve aye timiqono pututa phiki hukikhalo puthughono Muse no tipaulo ilove moke kutolo kheju ache.

⁹Muse no tipaulo ilove kithiuye khungkusu tsukuchono iqighi puzu Aphiki hukikhalo ngove cheke eno AMPEU no khungkusu lono Muse putsa che.

¹⁰Timiqono Aphiki hukikhalo khungkusu tsukucho ithulu kemtsa panonguno itsaqi mllache.

¹¹Timino pa poshuu sasu kuptsa akeshi Ampeu no Muse sasu agi kinheqhe kuptsa cheke. Tithiuno Muse ye aghazulo ideighi che. Ikemu apumi khuu no pa kukuphuu shiche keno, Nun nu Joshua ye Aphikilo ngoauve cheke.

¹²Muse no AMPEU vilo pike, “Timi hipaqo sasu hupau yeghilo sawulopi nono ivilo pikeuye kuchouke ikemu noye khuu pelo igholo wupeni keno pitsumoe. Nono pikeuno nono akivishi ni ithi ani eno ijupe amlo qi ani pike.

¹³Kuchouno noye tishi ani aye okupughu ivilo pitsulo, tishianguno ashiayeh hipaqo pesu owu shinike kishelukeu ghi kumsululo.”

¹⁴Tileno AMPEU no pi,”Ino nongu gholo wuni eno tokulupu nongu tsuni.”

¹⁵Muse no khochile pi, “Nono ningu gholo wumo aye ningu pelo hipa-a qhive pekevilo.

¹⁶Nono ningu gholo wumo aye noye owu timiqo lau eno ilau amlo qi anikepi khuuno ithini kya? Nono nigholo achekeu ayeghilo timi kutami akeqo launo nikutashi kimchilu nikeu anike.”

¹⁷AMPEU no Muse vilo pi, “Nono iniju akeu tho lono ino shitsunike kughengu ino tsaqui noithi ani eno niye olau imlo kiqishi achenike.”

¹⁸Tile Muse no ishi qhuiniju, “Ipelo nono ache keu kuvu saghu saghuikeu jupelo.”

¹⁹AMPEU no ishi khochile, “Ino ikuvu qhivutsuni keu kumtsu ozulono hechesu wuni eno onhekithe lono ikimthe je pipheni cheni. Niye Ino kisheluve kemi shou kimiye kupuqhiyi pephe piye chenikeu AMPEU ke.

²⁰Niye opelo igilo jupuku pemo nani kughengu ilau jupuku kemi khunomu xumulave nanike,

²¹ikemu iphivilo a-a lakhi anike tilehino nono atuqu shou puthugholu nani.

²²Kughou ino achekeu kuvu saghu saghukeuno heche wuni keno atuqu ipe akeulo ino no ikhipe suve nani eno ino hechewuve moke kutolo i-u pesu onhaluve nani.

²³Tishino izupo ithulu nani ikemu igiye ithumla nani.”