Read Sumi Naga IPEKULU 34 Bible Online

IPEKULU 34 - Sumi Naga bible

IPEKULU 34

¹AMPEU no Muse vilo pi, “Atughiulo tsukeu toi atu pha kini yethalo, eno atughiu khikhi nono kubove keno tipaulo akeu tsaqo ino tipaqo shou yepuku ni.

²Thoghiu inaqheno kuto pesu Sinai Toghilo akutsuqa lono isasu kusholu kepushi ikughilo.

³Timi khuumu osasu ikughi pekevilo; timi khuumu naghuto qha khilemu ithulupe kevilo; bheri momu amshiqo pelo naghuto qholo achu muza pekevilo.”

⁴Ike Muse no atu pha kini kutau hethalu eno thoghiu inaqhe itheno Sinai Toghilo tipaqo xapusu iku, tiye AMPEU no ahza tsukeu tho lono tishike.

⁵AMPEU no khungkusu lakhi lono iqighi no pa sasu tilehi puthugholuve eno pa kimthe je AMPEU ipi shuphe.

⁶Tithiu AMPEU no pa gizuuno hechesu wu eno ishi kuke. “Ni, AMPEU ye kimiye qhiyikeu eno kupukeu no chhitoi akeu Lhouke, mllalei axu ideve chemoe eno kikimiye ngo pukhukulu kutsasa piye chekeuke.

⁷Niye tiqheli qhethonhe kutolo ino tushoqhive keu pelu acheni eno alhoksa ngo axine pevetsu chenike; ikemu apu aza xine ghenguno niye ati anuli eno tipaqo tianuli tiqheli akuthuu eno abidiu, kutolo ghime move keu shimo nanike.”

⁸Muse no mutazu ayeghilo itsaqiveno mllae.

⁹Pano pi “AMPEU, kuchouno nono ilau amlo qi ani pi aye nisasu wutsulo pi ino oqhuiniju ani. Timi hipaqoye kuthovilo kemiqoke ni lhoksa eno ni xine peivetsulo eno owu timiqo kepi ningu ikhiluve tsulo.”

¹⁰AMPEU no Muse vilo pi, “Ino itehino Israilmi sasu puloshoqhi lakhi shi ani. Panoqo gizu lono ino thime kutsasa shini cheni tikithipu ye ayeghi qhalo khilehimu ashiayeh gholomu shimphikeu shini cheni. Timi kumtsuno ni AMPEU no kiu kuloghi shinikeno ithulu nani kughengu ino nongu ghenguno akichiqhiyi kepu lakhi shini cheni.

¹¹Ishi tsalalo ino ayezah nongu tsu akeu gholulo: Amarimi, Kananmi, Hatimi, Perizimi, Havimi eno Jebusimiye nonguno azuu hawo kemtsa ino haphevetsu nani.

¹²Nonguno wuche keu ghakhulo timi akeqo sasu kulashi keu shoqhi shikevilo, kughengu tipauno nongu ghenguno akithipu lichhe shi aghiluvike.

¹³Tishinike zuqhulo panoqo wu akiptia tuleqhive tsulo, panoqo wu chini chekeu tsukucho tulave tsulo eno panoqo lhouliu Ashera michipuqo heqhive tsulo.

¹⁴Nonguye alhou kutau mllakevilo kughengu ni, AMPEU ye isuxakemi ghumo nanike.

¹⁵Aghakhulo timiqo sasu alashikeu shoqhi shi kevilo kughengu kughou panoqono kichile lhouqo mlla eno tipaqo lau aghashini keno panonguno panoqo gholo supeniye nongu kusu nani eno nongu pelo pano lhouqo lau mllavekeu chuqupu chupenike nongu ghukeluve nani.

¹⁶Nongu nuliqono inaghami totimi hupaqo sasu kulakupu shive nani eno tipaqono panoqo pelo ilau pukhu bemovepe nani eno kichile lhouqo mullawuve penanike.

¹⁷“Ayino shikeu lhou mlape qhikevilo momu tipau mlla kevilo.

¹⁸“Kholaqhi sumokeu ghulhu pinyi chekeu pechelo. Ino ahza nongu tsuvekeu toi, Abib qhilo atsala tsuni ghenguno kholaqhi sumokeu sho chulo kughengu tipau qhi lono nonguno Ijip lono ipeghike.

¹⁹“Anu anoghiu eno tikishi gholo atsu piti tughiuye kumtsu iwuke,

²⁰ikemu nonguno gadaha atsu piti tughiu thelilo bheriti lakhi pesu akumllagho tsuno tipaqo xa chile lulo. Nonguno tipau xa chilelu monapiaye tipau kuo hechheve tsulo. Anu anoghiu thaqhuye qhuchile luvelo. “Timi khuumu akumllagho pemono igizulo ipeghikeu shikevilo.

²¹“Nonguno akumla shi kepu do atsala tsugho ani ikemu atsala akutsuniu loye aghisho tusho shi aghi pinamu akumla shikevilo.

²²Kughou nonguno ashothi amsuuqo ghile huthuveni keno Ghile Pinye ikhilulo eno kughou nonguno tixi qhilo axathi xope kutsuni keno Apusho Pinye ikhilulo.

²³Ampe lakhi nowu kiptimi kumtsu ni, AMPEU, Israil Lhou mlla nike ghuthu kuthu ighi masa.

²⁴Ino nongu zulono ashiayehqo hapheve tsu eno nowu alughi pekhovetsu kethiuye hi apinye kuthu ghulokilo timi khuu nomu noghakhu lenike pukaputsamo nani.

²⁵“Nonguno lhoxu pesu ilau aghashikeulo kholaqhi sukeu sho pesu mllakevilo. Hechekulu pinye shi akelo lhoxu heqhi kevilo.

²⁶“Ampe atsu-tsu nonguno ghile hukelo amsuu pesu nongu Lhou AMPEU kilo sughi masa. “ Nonguye khilemu bheriti momu aneti pesu tipau paza kichhizu lono kumqho kevilo.”

²⁷AMPEU no Muse vilo , “Atsa hipaqo yepesu qhilo,kughengu atsa hipaqo pesu aboqha shipuzu ino Israilmi ngo osasu puloshoqhi shi anike.”

²⁸Muse no atsala lhobidi putho pucho kiumu chu shomono AMPEU sasu ngove. Pano atu pha shou puloshoqhi tsa, Ahza Chighiyepuku ke.

²⁹Muse no Ahza Chighi pesu Sinai Toghi lono iqi chekelo pagiye yevuqaike kughengu paye AMPEU sasu kuptsa akehu ikeghi paye tipau mthake.

³⁰Aron ngo timi kumtsuno Muse lau jupuwo eno pagiye yevuqai akeu ithulu eno panonguye pa kupunu wunikeu msave.

³¹Ikemu Muse no panoqo kuke, ike Aron ngo aqo-aholo sakiphemi kumtsu palau wu eno Muse no panoqo putsa.

³²Tipathiu, Israilmi kumtsu pa suhope kumqo ighi eno Muse no Sinai Toghilo AMPEU no ayezah pa tsukeu kumtsu pesu panoqo tsue.

³³Muse no panoqo putsa tave kethiu pano aphi pesu pagi nhaluve.

³⁴Kugho kughomu Muse no AMPEU putsanikelo AMPEU no achekeu Phikilo ilonikeno, nhapu akeu phi tipau pano ikhive che. Pano kughou khalau ipeghi keno pa vilo pilopi ahza tsukeu kumtsu pesu Israilmi vilo piche,

³⁵eno pagiye yevuqai akeu panonguno ithulu che. Tighenguno pano akiniu AMPEU putsawu moke kutolo itaghi aphi pesu pagi nhapu kitheluve cheke.