Read Sumi Naga IPEKULU 37 Bible Online

IPEKULU 37 - Sumi Naga bible

IPEKULU 37

¹Bezalel no akasia su pesu Puloshoqhi Bohu mla, akushulau sentimiter lhotsugho tsugho eno akiqhe lau sentimiter lhotsugho tsugho.

²Pano ashou ngo alou shuna pesu tipau kuzuveno shuna pesu amtsu sumxa ashekile suwoke.

³Pano xapunikepu ghenguno shuna bocho bidi mlano tipau pesu ghokepu kudau apukhu bidilo meda, hula hilalo abocho kinini suke.

⁴Pano akasia su pesu xapukepu khadu mlano shuna pesu tipau kuzuve,

⁵eno Abohu hula hila abocho akeulo xisuke.

⁶Pano tsughukhuyi keu shuna pesu tipau kunha mla, akushulau sentimiter 110 eno akije lau sentimiter lhotsugho tsugho.

⁷Pano shunayi hekuchopu puzu achishibo kupu kerubim kini mlape qhi,

⁸lakhikhino akunha shelo qhiniyeke, pano tipaqo pesu akunhalo ghope qhi puzu tipau sasu ashi lakhishi kughulho.

⁹Akunha shou achishibo kupu kerubim pelo agi kithe lepe eno tipaqo chishibono akunha nhaghi mlake.

¹⁰Bezalel no akasia su akibepu lakhi mla, akushulau sentimiter lhotache tache, akije lau sentimiter lhobidi bidi eno akiqhe lau sentimiter lhotsugho tsugho.

¹¹Tsughukhuyi keu shuna pesu tipau mutsulo shuna pesu ashekile suwoke.

¹²Pano ashe kile kepu aku lakhi akije lau milimiter lhotsuni pungu mla puzu tipau veho muxa suwo eno tiye shuna pesu kuzuveke.

¹³Pano tipau ghenguno xapukepu shunayi bocho bidi mlano tipaqoye ako bidi lo suwo, khilehi apukhu akeno.

¹⁴Akhadu chuxusu no akibepu xapu wunikeu shunayi abocho qoye akibepu kichi phivilo suke.

¹⁵Pano akasia su pesu akhadu mla eno shuna pesu tipau kuzuve.

¹⁶Akibepulo qhinike ghenguno pano shunayi tsughukhui keu pesu abohuqo kughulhoke: tsungquikeuta ghenguno akhu ngo abohu eno atsayiji pesu mllanike ghenguno ajukhu ngo chithakhu ishi mla.

¹⁷Tsughukhui keu shuna pesu pano akulu kibepu mla. Pano shunayi hekuchopu puzu tipau ghope qhikepu akumutsu kughulhoke, tipaulo axamunu koghe, akumu ngo tipau nika ghi tipa gholo shisu kuqhake.

¹⁸Tipau jibo lono aloka tsugho ika ipeghike, tuxa tuxalo kuthuthu.

¹⁹Aloka tsugho lakhi khino axamunu koghe kuthuthu shipuku, tiye almon puakelo akumu eno anika akeu toi ke.

²⁰Akulu kibepu amtsu kumtsulo almon puakelo akumu ngo anika toikeu axamunu koghe bidi shisu.

²¹Aloka tuna kuthu akeu lakhikhi qholo akumu lakhikhi ake.

²²Akumu, aloka eno akulu kibepuye shunayi hekuchopu pe ashi lakhishi mla ke.

²³Pano akulu kibepu ghenguno akulu tsuni mla eno tipau ghenguno shunayi pesu puwukepu ngo tsumtsa mlape qhike.

²⁴Pano akulu kibepu eno tipaulo peitha kepu kumtsu mlanike ghenguno tsughukhuyi keu shuna kilogram shighi pungu peitha.

²⁵Musughuta pitinike ghenguno pano akasia su pesu akiptia lakhi mlake. Tiye kodibo lakhi, akushulau sentimiter lhobidi pungu, akije lau sentimiter lhobidi pungu eno akiqhelau sentimiter lhotoku. Tipau cheku ako bidilo shengulei keu ye tipau sasu ashipa lakhi shike.

²⁶Pano tipau kutsuqa ngo ajibo kumtsu eno tipaulo shengulei keu kumtsu shuna pesu kuzuve eno tipau mtsulo shuna pesu sumxa suke.

²⁷Tipau xapukepu ghenguno akhadu xipuku nike shunayi bocho kini mla eno amtsu qholo tipaqo pesu ajibolo meda puku.

²⁸Pano akasia su pesu xapu kepu khadu mula eno shuna pesu tipaqo kuzuve.

²⁹Pano nunikeu teli kimthe eno ngoniyi munakeuta ghi mlake, tiye tsungqui keu mukhu toi xukutshu kungoke.