Read Sumi Naga IPEKULU 39 Bible Online

IPEKULU 39 - Sumi Naga bible

IPEKULU 39

¹Tsulabiyei, hughai eno huchuikeu mhi pesu achinemino Akimthe-alo akumla shike lo ukepu phimini jukighilepushi panonguno mlatsuke. AMPEU no Muse vilo ahza tsupua keu toi panonguno Aron ghenguno achinemi phimini mlatsu.

²Panonguno phephei phi tsulabiyei, hughai eno huchuikeu mhi pesu ephod phimini mla eno shunayi kighi pesu mlake.

³Panonguno shunayipa hepha puzu sayi ala-ala shi ghitha pesu tsulabiyei, hughai eno huchuikeu mhino shikeu phi eno phephei phi gholo ghosukuqha.

⁴Panonguno ephod phi ghenguno abighilo xisupu kepu kini mlano tipau pesu ajibo kudau tsughukimeke tishianguno tiye kimepe ngopeniyeke.

⁵Panonguno aye aphiphi pesu apokha aloke ghoe eno tiye ephod philo tsughuda puku tishianguno tipau sasu ashi lakhi shipeke, AMPEU no Muse vilo ahza tsupuakeu kiqi lono shike.

⁶Panongu no karnelia-tu kuto puzu shunayi ghi mukhakeu shikeu lo supuku eno akutsha shighi Jakob nu chighikiniqo je yepuku.

⁷Panonguno abighilo xipukepu ephod philo supuku, tiye Israilmi shiyeh chighikini zuqhushikeu, AMPEU no Muse vilo ahza tsukeu kiqi lono shike.

⁸Panonguno ephod phimini shikeu nhemugha pesu amlalo dapukepu shike eno tipau toi ayeh shisu ke.

⁹Tiye kodibo lakhi eno kuqhuchhe kini shikeu, akushulau sentimiter mukukini eno akije lau sentimiter muku kini.

¹⁰Panonguno amekusho tu pesu ajoshi meda woke: ajo atughiulo, rubi, topaz eno garnet;

¹¹ajo akiniulo emeral, safir eno daimon;

¹²ajo akuthuulo turgois, agate eno amithis;

¹³ajo abidiu lo beril, karnelia eno jasper. Atu hipaqoye shunano aboqha shikeulo mukhapesu suke.

¹⁴Atu hipano chighikini lakhikhilo Jakob nuqo je lakhikhi yepuku puake, tiye Israil lagha chighi kini zuqhushi sukeuke.

¹⁵Panonguno amlalo dapukepu ghenguno shuna akivi pesu pilivekeu toi keu ayila mlake.

¹⁶Panonguno mukhakepu kini shunano shikeu eno shunayi bocho kini mlake eno tipau pesu amlalo dapukepu ahuu kudau akulo shunayi bocho kini akeulo fukimeve.

¹⁷Panongu no shunayila kini kuma pesu shunayi bocho kumalo fukimeve

¹⁸eno ashe kutau kini akeu kuma pesu shunayi mekhakepu akeulo fukimeve eno tishikeu lono tipaqo pesu azuu kudau abighilo ephod xipukeulo medapuku.

¹⁹Panonguno shunayi bocho kini mla puzu amlalo dapukepu aqhou cheku alou kudauno ephod shelo shighi medapuku.

²⁰Panonguno itaghi shunayi bocho kini mla eno tipaqo pesu ephod phimini abighilo xipukepu aqhou azuu, tsughu phivilo eno apokha akivishi ghovekeu shouno medapuku.

²¹AMPEU no Muse vilo ahza tsuve keutoi panonguno amlalo dapukeulo abocho akeu ngo ephod lo abocho akeu kuma tsulabei keu aye pesu tsughuda, ike amlalo dapu keu huye apokha shou dipesu ngoke eno ijo ipeghivemoe.

²²Ephod phimini shou aphikuzu pukeuye akuchopu tsulabei keu mhino ghokeuke.

²³Akutsu ghenguno akighipe shekeu kichiye akivishi hove tiye suxu pemoniyeke.

²⁴Tipau phi ashelo panonguno phephei phi eno tsulabiyei, hughai eno huchuikeu mhi pesu khaghatu tshuqhi woke; eno tipaqoye shuna akiviu pesu amuquyi shipuzu hekivelighi tshuwoke, tiye AMPEU no Muse vilo ahza tsukeu kiqi lono shike.

²⁷Panonguno Aron ngo pa nuliqo ghenguno aphikuzu, akutsu chijepu kepu, akutsu kunha, phephei phi pesu alou ikhonhei minikepu shi,

²⁸phephei phi eno tsulabiyei,

²⁹hughai eno huchui keu mhi pesu apokha phi lakhi eno tipau aye shisupukuno mlatsu, tiye AMPEU no Muse vilo ahza tsukeu kiqi lono shike.

³⁰Panonguno shunayi akivi pesu mlake eno tipau shou “AMPEU lau ikhiphe tsuvae” ipi keu yepukuke.

³¹Panonguno tipau pesu tsulabiyei keu aye pesu akutsu chijepukeu azuu kudau tsughu puku, tiye AMPEU no Muse vilo ahza tsukeu kiqi lono shike.

³²AMPEU no achekeu Phikilo akumla kumtsu shikhave. AMPEU no Muse vilo ahza tsukeu kiqilono Israilmino thwokha kumtsu shive.

³³Panonguno Muse lau Aphiki eno tipaulo peitha kepuqo kumtsu sughike: tipaulo fukepuyi, akuchughilo khaghoqo, piphiu heptakepuqo, atsukuchoqo eno tipau kughoaqo,

³⁴nhakepu ghenguno bheri yiko huchui bevekeu eno ashiyiko akivi, susho kepu nhaqhiphi,

³⁵Puloshoqhi Bohu lo atu phaqo supuzu, tipau khaduqo eno tipau kunha,

³⁶akibepu eno tipaulo peithakepu kumtsu eno Alhou mllavekeu ashoqo;

³⁷shuna tsughukhuyi keuno shikeu akulu kibepu, tipaulo akuluqo,

³⁸shunano shikeu kiptia, nukepu teli, ngoniyi munalukeu ta, Aphiki ikulolalo sukepu nhaqhiphi,

³⁹alazayino shikeu akiptia eno tipaulo alazayi khoje, tipau xapu kepu khadu, eno peitha kepu jeli kumtsu, qhukepu ghenguno chithakhu eno tipau ghokepu,

⁴⁰bothasukeu ghenguno nhaqhiphi eno tipaulo atsukucho ngo ghokepuqo, bothasu keulo ikulola ghenguno nhaqhiphi eno tipau kighiqo, Aphiki she yekutsapu ayishu. Aphikilo peitha kepu nhemgha kumtsu;

⁴¹akighiche phimini kimtheqoye Aron achineu eno pa nuliqo pelono aphikilo peitha peniyeke.

⁴²AMPEU no Muse vilo ahza tsukeu toi Israilmino akumla kumtsu shivetsu.

⁴³Muse no thwokha kumtsu kishekulushi jukuto eno panonguno tipaqo kumtsu AMPEU no ahza tsukeu toi shipe puaghi keu ithuluve. Tighenguno Muse no panoqo kumgha tsu.