Read Sumi Naga IPEKULU 4 Bible Online

IPEKULU 4 - Sumi Naga bible

IPEKULU 4

¹Tileno Muse no ishi AMPEU vilo pi, “Ikemu Israilmino ipulu tsumo eno ino kiu pikeno initsumoaye kishini kya? Noye ilau ipeghimo kepi panonguno pi aye niye kishini kya?”

²AMPEU no pavilo iniju, “Oulo kiu pe ani kya?” Pano pi, “Akusu lakhike.”

³AMPEU no pi, “Ayeghilo tipau pheqhilo.” Muse no tipau pheqhive kelauye tiye apighi lakhi ilhouve, ike paye tipau lau no pocheghive.

⁴Tileno AMPEU no Muse vilo, “Itsaiqi puzu ashomhi lono ikhiqhe luvelo,” ipi. Ike Muse no itsaiqi tipau kughaluve eno tiye akusu shikitheve.

⁵AMPEU no pi, “Israilmi lau hipau shilo, tiye panoqo puasu Abraham, Isak eno Jakob Lhou AMPEU no olau ipeghi keu michike.”

⁶Itaghi AMPEU no Muse putsa no pi, “Ophi kuzu alou ou chuxusulo.” Muse no tishiju eno pano pau ikhiphe kelau ye tiye apugha shive aghi, murasu toyi keuno aqeaqe shi nhachhive.

⁷Tileno AMPEU no pi, “Ophikuzu qhou ou su kithevelo.” Pano tishive eno kughou pano pau ikhiphe keno tiye vithai, aphimpi kutau toive aghi.

⁸AMPEU no pi, “Panonguno opulumo aye momu akumzapu michi atughiu lono thebei shilumo pinamu hi akiniuno panoqo pelo thebei shilupe nani.

⁹Akumzapu michi hikuma ithuluve kethiu ghi panonguno pulumlano auve aye eno nono kiu pikeno tipau initsumo kepi auve aye, Nayil ghoki lono azu pesuwo ayeghilo leqhilo. Azuye ahji shive nanike.”

¹⁰Ikemu Muse no itaghi pi, “Moe, AMPEU, ipuwu kevilo. Niye khilemu atsa pikithimi kumoe momu nono iputsa kethiu pinamu tishiluvea keumu kumoe. Niye atsa pimtha, qei eno pikukho ghi piche kemike.”

¹¹Tile AMPEU no pavilo pi, “Khuuno timi kichi shipuatsu kya? Khuuno timi pelo akini ipo, atsa piphemla momu ithulupe cheni momu anhethi kighicheve tsu cheni kya? Ni, AMPEU no ke.

¹²Tighenguno mta wulo! Ino opelo pilupenike kuphu nani eno kiu pikepu keno ino ovilo pinanike.”

¹³Ikemu Muse no khochile pi, “Moe AMPEU, ino oqhu iniju anike kutamiu puwutsulo.”

¹⁴Tishi pikeulo AMPEU ye Muse shou amlo ideve eno ishi pi, “Omu Aron Levi laghami hu kuha kesha? Paye atsa akivishi pithi akeu ino ithi anie; eno julepi paye osasu kusholuniye chenike eno no ithulu puzu alokivi shini chenike.

¹⁵Noye pa putsalu nani eno kiu pikepukela pavilo pilo. Okujo pelo pipe nike ino okujo kuphu nani eno kiu shikepu keno ino okujo vilo pinanike.

¹⁶Pano ozuqhushi timiqo lau oghenguno pitsunikemi shinanike. Tile noye Alhou kimihi shinani, pavilo kiu pikepukeno nono pitsu nani.

¹⁷Akusu hipau ogholo pewulo kughengu noye hipau pesu akumzapu michi shi nanike.”

¹⁸Tithiu Muse no pangu Jethro lau idewo puzu pi, “Ipelo Ijip lo nisholokumi lau idewoju pelo eno panonguye xuaphi kemokeno julupelo.” Jethro no pulovetsu eno pa sasu kukhove.

¹⁹Muse no Media lo aphilono AMPEU no pavilo pi, “Ijip lo idewolo, kughengu oheqhive nishi chekemi kumtsu thikhavae.”

²⁰Ikehu Muse no panipu eno panuliqo gadaha shou puku puzu panoqo Ijip lo wuve eno pagholo Alhou no pewulo pikeu kusu ghi pewuke.

²¹Itaghi AMPEU no Muse vilo pi, “Noye Ijip lo ide iqi cheake ghenguno kuchouno noye akukau gizulo akumzapu michi kumtsu shimasa ke, khipaqo ino opelo shilu penike akuka otsuvea keno shimasa ke. Ikemu ino akukau pelo kuthovi auve pe nani eno paye timiqo pelo wupemo nani.

²²Tileno noye pa vilo pilo, ike ni, AMPEU no pi anike, ‘Israil ye inu anoghiuke.

²³Ino ovilo pi anike inu pelo wuvepelo, tishi anguno pano imllalu nanike, ikemu nono mopike. Itehiye ino onu anoghiu heqhivetsu nicheni.’ ”

²⁴Ijip lo wukeu lalo akungoa lakhilo AMPEU no Muse sasu kusho eno pa heqhiveniye pukaputsake.

²⁵Tileno panipu Zipora no atu tsughaminhei keu ikhi pesu panu phighu yiko ghavetsu eno tipau pesu Muse pukhu[1] ditsuke.

²⁶Aphighuyiko ghakeu chine ghenguno lino Muse vilo pike, “Noye nikujo dolo ahji lono kimthi chekeu kimike.” Ikehu AMPEU no Muse kuxu puxuvetsu.

²⁷Tishi ake ghulokilo AMPEU no Aron vilo pike, “Asayeqhalo wuno Muse sasu kusholo.” Ikehu pano wupuzu akimthe naghuto lono pa sasu kusholu; eno pano Muse sasu kusholu kelo pa valuveke.

²⁸Tile Muse no AMPEU no pa vilo Ijip lo idewopenike pikeu jeli thwokha kumtsu pesu Aron vilo pive; AMPEU no pa vilo akumzapu michi shilopi ahza pa tsukeu ghi pesu pavilo pi.

²⁹Ikehu Muse ngo Aron pama Ijip lo wuno Israilmi sakiphemi kumtsu hekutsu kumqo.

³⁰Aron no panoqo vilo AMPEU no Muse vilo pikeu kumtsu pesu pie eno tithiu Muse no timiqo gizu lono akumzapu michi kumtsu shipe piye.

³¹Panonguye puluve eno AMPEU no panoqo lau ighi ani eno kishi ayikushushi panoqo peitha akeu pano ithuluvae pikeu chilu puzu panonguno itsaiqino mllae.