Read Sumi Naga JOB 13 Bible Online

JOB 13 - Sumi Naga bible

JOB 13

¹Inhethino hi kumtsu ithuluvae, eno ikinino chiluno mutsuqhei hi ithivae.

²Nonguno kiu ithi anikeno nighi ti ithianie, niye nongu nguno akimkheu ye kumoe.

³Ikemu niye Tuchomujokutsuu putsanie, ino la-akeu pesu Alhou sasu kighejuni shi anie.

⁴Nonguye akimki lono nongu kumtha jonha anie, nonguye khumu shipivi mlakeu shikipiviu hutoi ke.

⁵Nonguno inaqhoiveke aye kutami pelo nonguye alokutsumi kepi kumsulu pelo!

⁶Ino kiu piqhiniye anikeno iniju tsulo.

⁷Nonguye kushiye miki ani kya? Eno nonguye Alhou ghenguno pishiqhini kesha?

⁸Nonguye Alhou ghenguno agikuju ani kesha? Nonguye xakutha-a lo pa zuqhupini kesha?

⁹Alhou no olheju kelo akivi aghi nani ma? Ikeo timi pishiqhiluke toi nongu ye pa pishiqhiluve nani kya?

¹⁰Pano mutsuqhei no nongu lomi pi nani, tsala nonguno tuqhouno agikuju shienapi aye,

¹¹Pa je kughushu huno nongu shikumsa moni eno pa ju ighu keu nongu shou ikughi nani kesha?

¹²Nongu wu kumsukuluye ayevu holetsa toike eno nongu tsapi ye aniba paphi ke!

¹³Ilauno wukhavelo, eno ipelo piju pelo, ilau kiu ighini keno ighiju pelo.

¹⁴Ihu lono ishi miki peni eno ikuxu iu lo ikhisuni.

¹⁵Julo, pano ighiqhive kepushive namu niye lajupu anani tishimu niye ichipiu pa zulo pewuni.

¹⁶Imlo kumto nomu ixaluni keu aghiluvie, kughengu kusakughami ye Alhou shonikeu ighue.

¹⁷Tsaqui itsa inijulo, ino nongu kini lo chixechilei pisutsuni.

¹⁸Itsa kugha kepu akivishi kutope anie, kughengu niye achipie pi pinikeu ino ithi anie.

¹⁹Khuala isasu kighekulupu ani kesha? Tishikeaye, niye inoqhoive no thivenike.

²⁰Thime hikuma inijulu pelo, tishiaye ozulono niye itshuvemoke.

²¹O-u gha ilauno pewuvelo eno akumsa pesu ishikuighu kevelo.

²²Tishieno ijulo ino okhochile nike; momu ipelo piju pelo eno nono ikhochileju lo.

²³Ikipimi eno ixine khijehi ani kya? ino kumsumave keu xine aghiaye ipithi tsulo.

²⁴Noye kushiye ogi kusuluve ani eno ipesu oghumi shighi kihive ani kya?

²⁵Noye fupesu chekeu nika shikichini kesha? Momu noye aghijiteni hani kesha?

²⁶Nono kukhu kimji vehu ishou pibe anie eno ilhothelo kipimi ipelo kumsuchilelu anipe.

²⁷Nono ipukhu lo akichhekighi pe hosuve, ipukhu kupka kumtsu kheauve. Eno inepa thotsu amchi shiuveke.

²⁸Ikehu, niye akutsu kumna toi tsuwuve eno aphinheqa toi mauvae.