Read Sumi Naga JOB 21 Bible Online

JOB 21 - Sumi Naga bible

JOB 21

¹Itsa initsulo, tilikhinomu nonguno ilokughunotsu keu shipelo.

³Ino pinike kut-ulo eno ino piveke thiuno nonguno pulo aye thaigha alo.

⁴Niye timi shou mutomushu anike kumoe. Ino kutu-u mlano akeuye akiqi kuhake kumoe.

⁵Ijulo, eno akumza mokesha? Eno a-u pesu nongu kichi kujukha luvelo.

⁶Ilau kiu shivekela kumsulu aye niye thughuyive anie, eno iphi kumtsu sukuthu ithauve anie.

⁷Kushiye kusakughami pelo axushupe eno panongu pelo kinikulu shi thuwulupe kya?

⁸Panongu nuli eno atianuli pelo pano kuxu lono tsaqui xuluve peke.

⁹Alhou no panongu shou khilemu kusakusho sughimoe, eno panongu kiboye akumsapu kuhano iqunei acheni.

¹⁰Panou atsuaquno aghupalo ati vemlave keu shimoe, eno pano mishino piti kelo ati samlakeu shimoe.

¹¹Panongu nulino bheritiqo toi poqhopoqi ililue, eno pano nuli no phaphashi ilhe cheni.

¹²Akighi lebo ngo atuthu fusukeu lebo ishi ighaghi panonguno ale phe alovi cheni.

¹³Pano kuxu shekha kuto akivishi ano, sumomithe puzu iqunei thive cheni.

¹⁴Panonguno Alhou vilo ishi picheni, Hula wuvelo! Ninguye opulou ithi nikeu puloamoe.

¹⁵Tuchomujo kutsuu ye khuu keno ninguye pa qe ania? Eno pa vilo inikhu anguno kiu heshelu kepu ania?

¹⁶Kusakughami no kinikulu shilu anike kumo kesha? Ikemu niye pano kuxu ghola launo putosu anie.

¹⁷Alhou ye ghuthu khije kusakughami kulu fupinhe tsua kya? Panongu lakhi nomu kusakusho sholu akesha? Alhou ye axuide kelo khije panongu ghime akya?

¹⁸Panonguye amlhu zulo khauteni toi momu pasapaghano khughu fupe wuke toi shiju akesha?

¹⁹Nonguno ishi picheni, “Alhou no panongu kipimi hekutsu pesu atianuli ghenguno qhipua cheni.” Tiye kumoe, Alhou ye pimivekeu ghimeqhi kepue, tishi anguno panongu pelo ithipenike.

²⁰Pano nhethi pelo pano shikighime keu ithulupelo, pano pelo Tucho mujokutsu Lhou loghu muxoju pelo.

²¹Timi lakhiye akuxu suthahuve kethiuye pano kilo amlo tsukulupu akesha?

²²Alhou no kungughami shou ghi xakutha bechenike khuno akighithi Alhou shikakulupu kya?

²³Khami ye thwokhalo kinikulu shi ano thicheni, eno alokivi shi-ghi mulalei thi cheni.

²⁴Panoye aphilo atha pubeyi eno aghilo ghi aqu chhitoi acheni.

²⁵Kutamiye alokivi kiu kela michemla no akukhu kimji xapu xuano thi chenie.

²⁶Ikemu panongu kumtsu thivekethiu ye apighi shi akumo shive cheni, eno apitheno panongu kuzuluve chenie.

²⁷Ikipimi shitsuni aye nonguno kumsu pesu akeu eno amqu shipe akeu nighi ithi anie.

²⁸Kughengu nonguno ishi picheni, “Kijemie pikeu ki khile ani kya? Eno kusakughamino achekeu ki khile ani kya?”

²⁹Nonguye alalo kicheghuzu shiche ghi kemi vilo inijumo kesha? Panonguno amchi shipe piyekeu lono nonguye ithivemo kesha?

³⁰Ike ti Alhou no pukhupile puwu ke tsalalo kusakughami ye kughu tshuve cheni. Alhou loghu tsalalo pano ye sunhephe sasu wuve cheni.

³¹Khuno kusakughami gi lo musute sulu akya? Momu pano mlave keu qhemi kulokileve tsuju akya?

³²Pa kumo akumokilivelo pewu keloghi timi kumzapuno athiu azuu shi shekujojo wucheni. Ayeghi muqo ghi mukhano pa kumo shou ikughie, eno pa kumona ghi akivishi khetsu cheni.

³⁴Imaye, kishi puzu nonguye avehu kumsa keu pesu ilokughunotsu ani kya? Nonguno pivekeu kumtsu akimkie.