Read Sumi Naga JOB 22 Bible Online

JOB 22 - Sumi Naga bible

JOB 22

¹Timiye Alhou vehupu shilu nani kesha? Alokutsumi namu pa vehupu shikulupu kesha?

³Nono amikucho shiaghi keu lono Tuchomujokutsu Lhou lokiqipu kesha?

⁴Nono pa sumsake ghenguno osasu muto eno kughathakeulo osasu wuke kumoe.

⁵Moe, oxine shishe kijeke kumo kesha? Olhoksaye ashekha aghile hae.

⁶Nono akumoshi othikuzumi pelo pisa olochile peniaye pa phimini xapewuveno pa pelo aphi kumsa ngove chenipe kehu.

⁷Nono tughuthi chekemi azu yepenike tsumoe. Eno muzuthi chekemi launo achuqu pu suchileluve chenie.

⁸Ayeghiye a-u kumsa puwove eno agi ithukulumino tile ngo auve anipeke.

⁹Nono chimemi a-u kumsa puwove ke likhi kumono apu-aza kuha kemi munudaqhi chenie.

¹⁰Ikehu, itehiye osuhumuxa aqoh chhupe puanie, eno zuleno noye akumsano chhitoivae.

¹¹Akuvuno zumoivae ikehu noye ithulu amoe, eno azu kuqono ovesuluvae.

¹²Alhou no kungugha akiqheulo anike eno ayepuqono qhemghai ani kemu panongu kumtsu shou pano jupiqi cheni.

¹³Ikeghi nono pikeu no, “Alhou no kiu ithi ani kya? Paye akuzu kutho vechewo ni shou kughathabeluni kesha?

¹⁴Khungkusu no shishoi pa kuzupe ani keke paye ithulu chemoe, eno paye atsutsu ngo ayeghi kikime dolo likhi iqhoiqi achenie.”

¹⁵Okukumsuye kusakughamino pulachekeu la papewuni keu shive akesha?

¹⁶Panonguye aghuloki tomphi lono sunhe sawuve cheni, azukuqono pa no tsukucho yipewuve cheni.

¹⁷Hitoi kemiqono Alhou vilo ishi picheni, “Hula wuvelo, Tuchomujokulu Lhou ye nilau kiu shikulupu kya?

¹⁸Ikeghi Alhou no kinikulu pesu panongu ki shepichhi tsu cheni ikemu kusakughami kukughuye ilau no putosu pe anie!

¹⁹Kughou kusakughami ghimekeu ithuluni keno, kivimino amloqi cheni eno inapughami no junu ghi ishi pi cheni:

²⁰‘Nighumi kuakini kutsalua chhu, eno kutsakhamono aghi keu ami no pitivae.’

²¹Job, noye Alhou sasu alashiluve no iqunei auvelo, tishiaye oghenguno akiviu shiwolu nanike.

²²Pa kichi lono piqhi keu ikhilulo pa tsa omlolo qhilulo.

²³Nono akumtsha akughuvu shi Tuchomujokulu Lhou lau ideghi aye, eno oki lono lhoksakugha peve aye,

²⁴eno okughupu yi ayeghi lo peve aye, eno Ofir lono sughi keu shuna hu azulaki tuqu gholo qhove aye,

²⁵eno Tuchomujokulu Lhou pelo owu shuna tsandi toi olau akughupu shilu pelo.

²⁶Tishiaye nono tuchomujokulu Lhou kudau ozukuvu anani, eno Alhou lau ogi kughopuwolu nani.

²⁷Nono pa lau akighini shilu nani, pano okhochile tsu nani eno nono piqhi puakeu nono shi kupulu nani.

²⁸Nono chhosu keu kumtsulo tokulu shi nani eno akuvuno olalo yetsu nani.

²⁹Ikemu Alhou no aqhekuzami sunhe qhive nani eno akumtsha akughuvu mi xalu nani.

³⁰Pano kuqumokemi xaphe cheni; O-u kimthe vechewono oxaphelu nani.”