Read Sumi Naga JOB 24 Bible Online

JOB 24 - Sumi Naga bible

JOB 24

¹Tuchomujokulu Lhou ye ku shiye kihikulayi kepu tsala kutope qhimo kya? Kushiye pa huthuchekemi ye Alhou tsala ithulupe chemo kya?

²Kusakughami no alughitu ikhikiqeve cheni, panonguno bheri puka suwo pighiwuve cheni.

³Panonguno apuaza kuhakemi wu gadaha hasasu wuve cheni, eno chimemi wu amshitsu api lochilemoke kuto tshupe sawuve cheni.

⁴Panonguno kumlhomi alaphelo kokulusuve cheni, eno mighimi pelo panongu musa keu lono itshuqho itshuqi chenipe.

⁵Tughalo achekeu gadahaqono tsukutho lau achuqupu phuwuke toi, kumlhomino pano tianuli ghenguno achuqupu phuwunike akumlapu sajelo azukini shi wu cheni.

⁶Kumlhomiye kutami lulo ghile hutsumaye sawuve, eno kinimi tsayililo atsayi xokutsu tsu kepu shiuve.

⁷Putholo panonguye aphi kuha kehu aphi kumsa ihozue, eno suthikelo kiumu ukepu kuhae.

⁸Atolo tsughu ighi keu huno panongu putsaqhi kelo kiu kusuqho mono atuqu dakhoi ijeh cheni.

⁹Alhoksamino mighimi tianuli aza kichhi lono lekho sawuve cheni, eno kumlhomino api lomlave aye atianuli luve cheni.

¹⁰Ikemu kumlhomi ye aphimini ghi ukepu kuhano akumlalo wukepu shiwuve, eno akhuava lono athi pukishe tsumaye save.

¹¹Panongu no alhoksami wu Oliv teli tsughuphetsu, eno atsayizu chinepho pe aji kughulhotsu anamu panonguno tughuthi kelo miche pemoe.

¹²Aphughi lono thiuchekemi no ighamukue, eno izapusu akeqono akukuphu tsupeniye ighae. Ikemu Alhou ye panongu kighini phitsu moe.

¹³Akuvu hebide kemi anie, panoye tipa laghi tsaqutsalei ithimono ti pheve chenie.

¹⁴Timi ghiqhikemino kumlhomi ngo mighimi ghiqhinike inaputhono ithu cheni, eno putholo paye puka acheni.

¹⁵Kusalhami nhethino kuzukughu khe acheni, eno ishi picheni, “Khunomu ni ithulumae”; eno ajumichimo peniye agi shonhaluve cheni.

¹⁶Putholo hipaqono aki vexu ilocheni, puchou ye aki khatha pe ngo cheni, panonguye akuvu mthae.

¹⁷Kughengu panongu ghenguye akuzu kuthono inaqhe paphie, eno akuzu kutholo ighu chekeu sasu shompami ke.

¹⁸Tipano ye azu shou lhalhai yipesu chekemi ke eno ayeghilo pano ki aluye ghushovae. Eno aqekiqemi khunomu pano tsayililo humovae.

¹⁹Akushu akumqholo murasuzu hauve ketoi kithilalo[15] axinemi sawuve cheni.

²⁰Paza kutolono pa kumsumave cheni, apitheno pa kulhu cheni, eno khunomu paje kumove cheni. Ike kusakughamiye asubo icheuve ke hutoi.

²¹Ishivekeu ye, pano anuhami sapusa puaghi nanike eno chimemi kuphu kughu mokehuke.

²²Alhou no pa kumto pesu akumtomi kutsave cheni; Panoye iku aghi namu akuxulo mutotoi kulupu kuhae.

²³Alhou no pano pelo sushokulu shi eno mumbekulu shi xu aghi peluvi, ikemu pa nhethino pulhapuju pano kuxu jukuto acheni.

²⁴Atuqhudo lakhi loye pano suqhe aghiluvi ikemu cheve cheni, alupi toi ighuyive eno idive cheni; Panoye aghibolo ape suthasuuve ketoi cheni.

²⁵Hitoi shichemo kepi khuuno ikughape akimki shitsulu nani kya? Khuuno itsaye kumoe pilu nani kya?