Read Sumi Naga JOB 28 Bible Online

JOB 28 - Sumi Naga bible

JOB 28

¹Tsandiyi chhuphelu keu khuki ani, eno shunayi thakutsughu keu a acheni.

²Timino ayeghi lono ayi chhuphelu cheni eno atu piti kumlla pesu akuhuyi shicheni.

³Timino akuzu kutho ashekichi shive pe cheni, eno ashekichi mutsu kuto zumoi eno zuchiyi kelo atu akeu lhekide kuda cheni.

⁴Akuvulo kughuna chekemi a lono putou, eno inamino pulamo keu alo timino akhuki chhukuthosu cheni. Panonguno kutami launo putosu pesu hulau hilau akichhe kighilo ihi cheni.

⁵Ayeghi shouno achuqupu ipeghi cheni, ikemu tipau qhouye amino piti keshi itapiniyie.

⁶Tipaqo tuqulo akughuputu aghi cheni, eno tipau lo shuna mukhu acheni.

⁷Alhaqu mu tipa la mthae eno aluqu nhethi mu ti ithumla aphie.

⁸Kiu tughashi mu tipau la pulamphie, momu abongushu ayikusa mu ti hechesu wuchemoe.

⁹Timino ayetu shou pa-u chhopuku cheni eno naghutoqo abo lono izabideve cheni.

¹⁰Pano atuqu chhupho alaghesu ilokelo pa nhethino amekusho tu ithulu cheni.

¹¹Pano aghoki wu ahu iji pemoni ye mekhave cheni, eno kusupe aghi keu akuvulo peipeghi cheni.

¹²Ikemu alokutsu puki khileno phulu nani kya? Eno tsaqui ithiluni keu a khile ani kya?

¹³Timino alokutsu me kuchou mtha aphie, eno tiye kuxumi gholo phulu chemoe.

¹⁴Akuthokuno pi, “tiye igholo kuhae” eno azughino pi, “liye isasu amoe”

¹⁵Shuna muqo pesu ti qhumlae eno tsandiyi pesu tipau me shighi mighi tsumlae.

¹⁶Ofir yeghilo wu shuna momu akughupu chiku[20] pimu tipau me qhemi kumoe.

¹⁷Shuna momu ayina kivi mu tipau sasu kimighi mlae, momu shuna kivi chi pesu tipau kili mlae.

¹⁸Azu lono ithulu[21] chekeu akughupu tu qo jeku akepu kuhae, alokutsu ye lachiku nguno amekushoe.

¹⁹Ethiopia yeghilo wu alazayi momu thakimtheve keu shuna pesu alo kutsu sasu kimghimlae.

²⁰Tishiaye, alokutsu khikudauno ighi cheni kya? Eno tsaqui ithiluni keu a khile ani kya?

²¹Tiye kuxumi kumtsu nhethi launo kughutshuvae.

²²Abadon ngo Akithi no pi, “Tipau vehu uyeu tsa likhi nikinilo ighie.”

²³Alhou likhino tipau la tsaqui ithi anie, eno pano tipau-a ithi anie.

²⁴Kughengu pano ayeghi shekha kuto jupuwoe eno atsutsu qholo akeu kumtsu ithulu ani.

²⁵Alhou no mishishei keu amlhu tsuniye kelono, eno azughi pelo kiu qhemi shikepu keno mighibe tsuniye kelono;

²⁶Pano tsutsughu pelo khije ghukepu keno kotha tsuniye kelono, eno tsutsu kukulo laghi kutotsu kelono,

²⁷tileno pano alokutsu ithuluno ti hesakutsue; pano ti kithikiyi qhi eno lhejue.

²⁸Alhou no timi vilo pi, “Ampeu sumsa keuye alokutsue, eno alhoksa lono tsughuve keuye tsaqui keu kighithie.”